35
Oo Hodáwand! Pa mani hakká jang kan
Dáuday Zabur.
1 Oo Hodáwand! Gón hamáyán bemerh ke gón mana merhant o
gón hamáyán jang kan ke gón man janga kanant.
2 Wati kasán o mazanén esparán bezur o
mani madatá jáh bejan.
3 Pa áyán ke mani randá kaptagant
wati nayzahá chest kan o áyáni ráhá band.
Mani arwáhá begwash:
“Tai rakkénók man án!”
4 Á ke mani zenday tabáhiay randá ant,
roswá o sharmendag bátant.
á ke pa mani táwáná pandala jórhénant,
poshtá bekenzát o pashal bátant.
5 Chosh ke pog o palár gwátay démá,
Hodáwanday préshtag áyán betáchénát.
6 Ráhesh tahárók o lakoshánk bát o
Hodáwanday préshtag áyáni padá bekapát,
7 chiá ke mopt o náhakká pa man dámesh chér gétkag o
pa mani arwáhá kallesh kótkag.
8 Anágat tabáhiesh chakká kapát o
wati chér gétkagén dámá kapátant,
kapát o gár o gomsár bátant.
9 Gorhá mani arwáh Hodáwanday bárgáhá shádehia kant o
pa wati rakkagá lezzata bárt.
10 Á wahdá har band o bógon gwánka jant:
“Oo Hodáwand! Tai matth kay ent?
Taw nézgárá cha zóráwarteréná rakkénay o
nezór o hájatmandá cha pol o pánch kanóká.”
11 Badwáh o bérahmén sháhed jáha janant o
hamá mayárán maná laddhant ke cha áyán sahig naán.
12 Nékiay badalá gón man badia kanant o
mani arwáh gamig o porsig ent.
13 Bale wahdé á nádráh atant,
man sugi god o póshák gwará kort o
jesm o ján gón róchag dáragá ranjént.
Wahdé mani dwá bépassaw mantant
14 gréwán bután,
hamá dábá ke pa dóst yá brátéá gamiga bant,
sar jahl o mótk árán bután,
hamá dábá ke pa mátá zára janant.
15 Bale wahdé thagalon wárt past o lagór gón mazanén shádehié mocch butant,
mani helápá wahdé man sahig naatán,
á maná derrán atant o bassesha nakort.
16 Chó Hodánábáwarán, áyán wati maskará gésh kanána kort o
pa man dantánesha drosht.
17 Oo Hodáwand! Tán kadéna nenday o cháray?
Mani arwáhá cha áyáni setamá berakkén,
mani yakkén zendá cha shéráni dapá.
18 Gorhá mazanén diwáná tai shográ gerán,
mardománi mazanén mocchiá tará satá kanán.
19 Mayl ke prébkárén dozhmen
mani sará shádehi kanant,
mayl hamá ke mopt o náhakká cha man bézár ant
chammok o pónzok bekanant.
20 Chiá ke pa sohl o émeni habara nakanant,
pa á mardomán ke molká árám o béják neshtagant
pormakrén habar payma kanant.
21 Dapá pa man pacha réchant o gwashant: “Hah, hah, hah!
Gón wati chammánen distag!”
22 Oo Hodáwand! Taw é distag, chopp o bétawár mabay.
Hodáwandá! Cha man dur mabay.
23 Ágáh bay o pa mani dádrasiá jáh bejan.
Oo mani Hodá, oo mani Hodáwand! Pa mani hakká.
24 Oo mani Hodáwandén Hodá! Pa wati adlaygi gonáhay bohtámá cha man thagalén,
mayl á mani sará shádehi bekanant.
25 Mayl wati delá begwashant: “Hah, hah, hah! Pa wati armáná rasetén.”
Mayl begwashant: “Lonkahé kort o éren bort.”
26 Harkas ke mani mosibatáni sará shádehia kant
sharmendag o sarjahl bát,
á ke watá cha man borztera kanant
gón sharm o bésharapi póshénag bátant.
27 Á ke wáhagesh mani bémayári ent
shádmán bátant o shádehiay gwánká borz kanátant,
modám begwashátant: “Hodáwand mazan ent
ke cha wati hezmatkáray salámatiá gala bit.”
28 Gorhá zobánon sajjahén róchá tai adlá gwánka jant,
tai satá o sanáyá.