2
Zendagén seng o dar chetagén kawm
1 Paméshká, har paymén badi, makr o préb, dotal o dopósti, hasadd o kénagán cha watá dur kanét o hechkaséay poshtá bad o radén habar makanét. 2-3 Nun ke shomá Hodáwanday néki o mehrabániay tám chashetag, nók pédá butagén nonnokáni paymá pa pák o ruhánién shirá shodig bebét tánke cha hameshiá dém pa wati rakkagá rodán bebét.
4 Issá Masihay némagá byáét, hamá zendagén seng ke mardomán pasond nakort o nazort bale Hodáyá gechén kort o áiay chammá Issá bématth o porarzesh at. 5 Nun shomá zendagén sengáni paymá pa ruhánién lógéay bandagá kár bandag bebét, pák o palgártagén ruhánién péshwá ham bebét o anchén ruhánién korbánig bedayét ke cha Issá Masihay wasilahá Hodáyá washnóda kanant. 6 É hamá habar ent ke Hodáay Pákén ketábá átkag:
“Bechárét, man Sahyuná sengé éra kanán.
É seng bébahá o gechénién bonheshté.
Á kas ke eshiay sará báwar bekant,
hechbar pashal o sharmendaga nabit.” * 2:6 Eshayá Nabiay Ketáb 28:16.
7 É seng pa shomá ke imánó áwortag porarzesh ent, bale pa áyán ke imánesh nayáwortag:
“Á seng ke bánbandén ostáyán † 2:7 Bánbandén ostá hamá ent ke lógay bandagá zántkár ent. pasond nakort o nazort
hamá seng, bonhesht but.” ‡ 2:7 Zabur 118:22.
8 o
“sengé ke mardomána thagalénit o
kóhé ke áyán dawra dant.” § 2:8 Eshayá Nabiay Ketáb 8:14.
Áyáni thagal waragay sawab esh at ke Hodáay habaresh nazort. Áyáni ásar o ákebat hamesh at. 9 Bale shomá Hodáay gechén kortagén bádsháhén ruhánién péshwá o pákén kawm ét, Hodáay jenday kawm ét o áiá shomárá cha taháriá dém pa wati porshawkatén rozhnáiá gwánk jatag tán áiay mazanén kárán jár bejanét. 10 Pésará shomá kawmé naatét bale annun Hodáay kawm ét. Pésará shomárá Hodáay rahmat narasetagat bale annun áiay rahmat shomárá gón ent.
11 Oo dordánagán! Shomá é donyáyá bigánag o darámad ét. Mani dazbandi hamesh ent ke watá cha á jesmáni lóth o wáhagán pahréz bekanét ke shomay ruhay helápá janga kanant. 12 Nábáwaráni nyámá pák o palgárén zend begwázénét. Bell toré á, shomárá bohtáma janant o gwashant ke shomá radén kár kanagá ét, bale gón shomay nékén káráni gendagá, Hodáay áyagay róchá Hodáyá sharap o ezzat bedayant.
Ehtiárdáráni parmánbardáriá bekanét
13 Shomá pa Hodáwandaygi, sajjahén ehtiárdárén mardománi parmánbardáriá bekanét, bádsháhay ham ke cha sajjahénán master ent o 14 hákemáni ham ke cha bádsháhay némagá pa radkáráni sezá dayag o sharkerdén mardománi sharap dayagá dém dayag butagant. 15 Hodá lóthit shomá gón wati sharrén kerd o kárán ahmakén mardománi násarpadén habaráni démá bedárét. 16 Shomá ázát ét, paméshká ázátén mardománi dhawlá zend begwázénét bale wati ázátiá hechbar pa radén kárán nimmón makanét, wati ázátiá pa Hodáay hezmatá kár bebandét. 17 Harkasá ezzat bedayét o pa báwarmandán hásén mehré delá bedárét, wati zendá pa Hodátorsi begwázénét o bádsháhá sharap bedayét.
Masihay sakki saggagay mesál
18 Oo golámán! Wati wájaháni parmánbardáriá bekanét o áyán báz ezzat bedayét. Tahná narm o mehrabánén wájaháni parmánbardáriá makanét, trond o zórákén wájaháni parmánbardáriá ham bekanét. 19 Wahdé shomá gón Hodáyá wapádár ét o náhakkén sezáyána saggét, shomay hamé sabr o ópár wat pa shomá sharapé bit. 20 Agan shomá pa radén káréá sezá dayag bebét, gorhá chón á sezáay saggag shomárá sharapdára kant? Bale agan sharrén kár o kerdéay sawabá sakki besaggét, Hodá shomárá satá kant. 21 Shomá pa hamé sakkiáni saggagá gechén kanag butagét, parchá ke Masihá ham pa shomaygi sakki sagget o nemunah o mesálé but ke shomá áiay randgiriá bekanét.
22 “Áiá hech gonáh nakort o
kassárá prébi nadát.” * 2:22 Eshayá Nabiay Ketáb 53:9.
23 Bell toré béezzat kanag but, bale angat ham hechkasi béezzat nakort. Tantanᆠ2:23 Tantaná, bezán hattá, tán é haddá ke. wahdé sakki saggagá at, kassárá pátrápi‡ 2:23 Pátráp, bezán tahdid, damki. nadát. Áiá Hodáay sará tawkal kort ke tachkén ensáp o dádrasia§ 2:23 Dádrasi, bezán hakkén paysalah, hamá shawr ke cha dádgáhána kayt, dáwari. kant. 24 Áiá wat may gonáháni bár salibay sará wati baddhá laddhet, tánke gonáh cha may delá bemerit o pa néki o páki zend begwázénén, ke shomá cha hamáiay thapp o thórán dráh butagét. 25 Mésháni paymá gár o sargardán atét, bale nun hamáiay kerrá per tarretagét ke shomay arwáháni shopánk o sambálók ent.
*2:6 2:6 Eshayá Nabiay Ketáb 28:16.
†2:7 2:7 Bánbandén ostá hamá ent ke lógay bandagá zántkár ent.
‡2:7 2:7 Zabur 118:22.
§2:8 2:8 Eshayá Nabiay Ketáb 8:14.
*2:22 2:22 Eshayá Nabiay Ketáb 53:9.
†2:23 2:23 Tantaná, bezán hattá, tán é haddá ke.
‡2:23 2:23 Pátráp, bezán tahdid, damki.
§2:23 2:23 Dádrasi, bezán hakkén paysalah, hamá shawr ke cha dádgáhána kayt, dáwari.