1 Haq che chaw teq paog, ngag nig hehd haq buhq fea che liq cheawg lehr, ni koz te koz yaog. Liq che ve ni koz awg khuhn, nig hehd thed-e ghad cawd-aw ghad duhd ngawx vix tug, duhd nuhd fea che haq cud lehq ngag nig hehd haq awg ghad pehar che yaog. 2 Pong lag thad Ghig sa ve daq kehg che cuh kar var teq pa koz lar che tawd khuhd teq pa haq duhd nuhd tug, ngag nig hehd haq duhd nuhad che yaog. Kheh te lehq Jawd mawd he lehq Thaer khuhq par nig hehd ve cuh yad* 3:2 nig hehd ve cuh yad Yer suq lez yug lar che awg laq ghuhd teq pa haq koz che yaog. teq pa haq cud lehq pid lar che tawd khuhd teq pa haq liz ngag nig hehd haq kawq duhd nuhad che yaog. 3 Awg kawd sir cawd che ted ceng awr lehr che kheh yaog. Awg leh med ve awg yand awg khuhn, su haq tar nehg lehq kaod koz gid ghig gid che chaw teq pa tuhaz tug yaog. I hehd awr lehr, nig hehd haq kaod koz gid ghig gid lehq awg suhr awg sar ve a lor awg khad haq kae tug yaog. 4 I hehd che kheh koz tug yaog. Jawd mawd Yer suq kawq yaq tug lehd koz lar che kar tiq tawd khuhd khawd-ehg kheh vawr le. A pux a pi teq pa† 3:4 A pux a pi teq pa Awg kawd ped maq ve bon hox bon nax teq pa haq koz che yaog. He 13:7 suh vehr che teq ni haq tanr lehq yaq ni kha gag awg ceng gha lia liz mig gig te phanr che thad haq kha sur suar te chehd che ma hez hawg la lehd koz tug yaog. 5 A mig thad lo liz Ghig sa ve tawd khuhd haq te lehq muhd nuh maq cawag che haq i hehd ma duhd nuhd gad. Kheh te lehq, Ghig sa ve tawd khuhd haq te lehq, a kaz awg khuhn mig gig tuhaz lehq, a kaz haq te lehq mig gig phehaq che haq liz i hehd maq sir gad che yaog. 6 Awg yand u ve khuhn, mig gig haq a kaz thunr vid lehq,‡ 3:6 a kaz thunr vid lehq Khiz 6:17, 7:21-22 haq ngawx. chaw yad teq pa haq te lug te sez vid che yaog. 7 Ghig sa ve tawd khuhd u ve haq te lehq a meha cawg lar che muhd nuh maq he lehq mig gig awr lehr a mir tox bag tug awg pun teh lar che yaog. Tawd khuhd che haq te lehq muhd nuh maq he lehq mig gig awr lehr, Ghig sa haq ma yawz maq yan che chaw teq pa haq suhx jehg lehq te lug vid che teq ni gag thad kha gag teha lar che yaog.

8 Haq che chaw teq paog, che te ceng haq nig hehd ta lend. Jawd mawd Ghig sa awr lehr, teq ni haq teq hinx khuhq heh sawnr lehq, teq hinx khuhq haq teq ni heh sawnr che yaog. 9 Jawd mawd Ghig sa kar tiq te lar che heh phehaq vid tug yawd jo jad law lehz chaw ted pehg pehar duhd che yaog. Kheh ma khuhd, kar tiq haq phehaq vid tug yawd jo che ma hez. Chaw awg gha lia vend bax haq duhd phuhz lehq te ghad-eg liz maq gha lug vehr tug yawd he gad che haq te lehq, yawd nig hehd haq yeg khanr chehd che yaog.

10 Chaw khuhd chaw naz lag che heh te lehq, Jawd mawd Yer suq ve awg ni§ 3:10 Yer suq ve awg ni Yer suq kawq yaq tug awg ni haq koz che yaog. 1 Th 5:2 lag gag tug yaog. U ve teq ni awg khuhn, muhd nuh maq awr lehr awg khuhd pehz hehnd mehz te lehq mehx vehr tug yaog. Muhd nuh maq lo cawg che awg ceng awg gha lia a mir chiz jad lehq kig vehr tug yaog. Mig gig he lehq mig gig awg thang huh kha te lar che kanx awg gha lia haq a mir toq bag tug yaog. 11 Awg ceng gha lia che teq pa che kheh te kig vehr tug haq te lehq, nig hehd awr lehr daq kehg che awg lid awg khad haq lehax te lehq Ghig sa haq yawz yan che chaw te kenr te cawd che ma hez hawg la. 12 Nig hehd Ghig sa ve awg ni* 3:12 Ghig sa ve awg ni Ghig sa suhx jehg che awg ni haq koz che yaog. Mt 25:13, 1 Th 5:6 lag che haq law lar lehq cud cad che khuhn duhd law chehd huh, u kheh te che chaw phehaq cawd che yaog. Awg ni u ve haq te lehq, muhd nuh maq haq a mir toq bag lehq mehx vehr lehq, muhd nuh maq lo cawg che awg ceng awg gha lia a mir chiz jad lehq kig vehr tug yaog. 13 Kheh ma khuhd, Ghig sa yawd kar tiq cawg lar che heh, muhd nuh maq awg suhx† 3:13 muhd nuh maq awg suhx Isy 65:17, 66:22, Pheq 21:1 haq ngawx. he lehq mig gig awg suhx cawag tug haq a nig duhd law chehd che yaog. U huh thed che cawd che ted ceng cawg tug yaog.

14 Kheh te cheaq te lehq haq che chaw teq paog, nig hehd awg ceng che teq pa haq duhd law chehd che haq te lehq, yawd mehz khuhd suhr huh chaq chiz che he lehq awg kix awg hawehd maq gha cawg tug he lehq duhd sa gad sa che ni ma gha cawg tug, cud cad lehq teo. 15 A nig ved Jawd mawd Yer suq yeg khanr che awr lehr, chaw yad thaer khuhq che haq gha tug awg pun yeg khanr chehd che lehd duhd-oq. Awg lawn che teq pa awr lehr, ngag hehd haq che a vix a nax Pawd loq liz, yawd gha lar che cud yiq haq cud lehq nig hehd haq liq buhq fea vehr che heh yaog. 16 Yawd ved liq awg gha lia awg khuhn awg lawn che teq pa haq yawd buhq lar che yaog. Liq u ve teq pa awg khuhn sir gha tug har jad che awg lawn‡ 3:16 sir gha tug har jad che awg lawn Cuhx kig nax che haq koz che yaog. ted pehg pehar liz cawg che yaog. Cud yiq mad lawq lehq ni ma mad yeg vix che chaw teq pa awr lehr, awg kag awr ve Liq phu tawd khuhd teq pa haq i hehd yug phuhz che heh, har jad che yawd ved tawd khuhd u ve teq pa haq liz yug phuhz che yaog. I hehd che kheh te che awr lehr, i hehd awg ton gha lug gha sez tug awg pun yaog.

17 Kheh te cheaq te lehq haq che chaw teq paog, awg lawn che ve haq awg kawd thad loar nig hehd sir lar peg che haq te lehq, haeg che chaw§ 3:17 haeg che chaw Ma hez hez che Sar lar haq koz che yaog. 2:1-3 che teq pa ve te yaq che awg khad haq cud lehq nig hehd haq i hehd maq gha seh kae lehq nig hehd ni ma yeg che ted ceng liz maq gha lug veh tug, sa tiq tar-oq. 18 A nig ved Jawd mawd he lehq Thaer khuhq par Yer suq Khreq ve awg bon awg khuhn he lehq yawd haq sir che ted ceng awg khuhn, khar thad liz nig hehd ir lag vid-oq. A meha liz te lehq co co taer taer yawd haq chid ir chid muh vid-oq. A meng.