Peta
Ulongozi
Chitabu cha Hisabu choloonga cholonga mbuli ya miyanza malongo mane ya wana wa Isilaili kufosela kwiichuwala, viwakalile wang'hali hawanakwingila muna iisi ya lagano, yani isi ya Kanaani. Chitabu chenyewo chotangigwa Peta kwaviya china hanhu haidi holava peta ya walume watowang'hondo wakalile muna chila kabila da Isilaili (sula 1 na 26). Kimahokelo, wasomi wa mbuli za Chibiblia wohuwila kuwa chitabu cha Peta na vitabu vimwenga va malagilizi (Mwanduso na Kulawa na Walawi na Kumbukumbu da Malagilizo), vandikigwa na mulotezi Musa. Ukweli uno ulongigwa chidogo na chitabu chanyewo kwa kulonga Mndewa Mulungu kalonga na Musa (Peta 1:1). Yodahika Musa kandika hanhu hakulu ha chitabu chenyewo, na wandikaji wamwenga wongezela chidogo muna imiyaka isondelele hamwande. Mfano, Vidala kugesa kuwa Musa yahadahile kuwa kandika aya fana ya Peta 12:3, hanhu haja unyendanyenda wake mwenyewo utogoligwa.
Muna umwanza wawo wa kwiichuwala, wana wa Isilaili walongelela na kumuleka Mulungu miyanza mingi. Kwa sang'hano zawo izo watagusigwa. Mfano wa mbuli ino ni lusita Waisilaili viwadumbile na kulongelela kuwa Wakanaani wakala na nguvu ng'hani kufosa wawo (Peta 14:1-4). Kwa sang'hano ino, Mulungu kalonga wawo wose wokala lusita luwo wahadanganike ing'hali Waisilaili hawanakwingila muna iisi ya chilagano. Ifika mbaka Musa mwenyewo kaleka kumtegeleza Mulungu, na kwa ichimu chino hata yeye hadahile kwingila muna iisi ya chilagano. Ingawa wanhu wamuleka Mulungu, yeye kagendelela kuwakaliza. Wehi wa Waisilaili viwamgoneke mulotezi wa chimhazi yatangigwe Balaamu yalave duwilo kusonhela Waisilaili, Mulungu kamuleka yalonge kutemeligwa mate muhala kumwao (Peta 22-24).
Mbuli zilimuno
1. Sula 1 mbaka 10:11 zolonga mbuli ya kupetigwa kwa Waisilaili, iviya mpangilio wa malago yawo viuwile na sang'hano za wakulu wa nhambiko na nhambiko ziduganyigwe kulawa chila kabila lusita lupango vivikigwe hakwe.
2. Maabaho chitabu cha Peta cholonga kusonhela mwanza wa Waisilaili kufosela kwiichuwala muna isula ya 10:12 mbaka sula ya 25.
3. Sula ya 26 mbaka 36 zolonga kusonhela kupetigwa mwanza wekaidi kwa Waisilaili na mbuli zimwenga. Yolonga mazina ya hanhu Waisilaili howekile malago yawo viwakalile muna umwanza kuhita kuna iisi ya chilagano, na viya isi iyo viilondeke kugoligwa hagati ya makabila yose vonda wengile muna iisi yawo.
1
Watowang'hondo wa Isilaili wopetigwa
1 Mndewa Mulungu kamulongela Musa kuna ichuwala cha Sinai, muna dihema da Mulungu, siku ya mwanduso ya mwezi wekaidi wa mwaka wekaidi viwamalile kulawa muna iisi ya Misili. Kalonga, 2 “Wapeteni Waisilaili, kwa kusondelela ng'holo zawo na kaye zawo, peteni kwa kusondelela mazina ya walume, imwe imwe, 3 waja wodaha kuitowa kuna ing'hondo, kwandusila weli na miyaka malongo maidi na kugendelela, weye na Haluni mwizayandika mazina yawo. 4 Na mulume imwe kulawa chila kabila kezakuwa hamwe na mweye, chila munhu yeli mulangulizi wa kaye ya tati yake. 5 Yano yayo mazina ya walume wondawakutaze,
kulawa kabila da Lubeni, Elisuli mwana wa Shedueli,
6 kulawa kabila da Simeoni, Shelumieli mwana wa Sulishadai,
7 kulawa kabila da Yuda, Nashoni mwana wa Aminadabu,
8 kulawa kabila da Isakali, Nasanaeli mwana wa Suali,
9 kulawa kabila da Zabuloni, Eliabu mwana wa Heloni,
10 kulawa muna yamakabila ya wana wa Yosefu,
kabila da Efulaimu, Elishama mwana wa Amihudi,
kabila da Manase, Gamalieli mwana wa Pedasuli,
11 kulawa kabila da Benjamini, Abidani mwana wa Gidioni,
12 kulawa kabila da Dani, Ahiezeli mwana Amishadai,
13 kulawa kabila da Asheli, Pagieli mwana wa Okilani,
14 kulawa kabila da Gadi, Eliasafu mwana wa Deueli,
15 kulawa kabila da Nafutali, Ahila mwana wa Enani.”
16 Wawo niiyo wasaguligwe kulawa hana umting'hano, walangulizi wa makabila ya tati zawo, walangulizi wa ng'holo za Waisilaili.
17 Musa na Haluni wawasola walume wano wowatambuligwe mazina yawo, 18 na wawatanga hamwe wanhu wose, siku ya mwanduso ya mwezi wekaidi, nawo walume wapetigwa kulawa muna zing'holo za wasaho zawo, kwa kaye za tati zawo, fana viili peta ya mazina, kwandusila weli na miyaka malongo maidi na kugendelela, imwe imwe, 19 fana Mndewa Mulungu viyamulagilize Musa. Ivo kawapeta kuna ichuwala cha Sinai.
20 Wanhu wa kabila da Lubeni mwana wa udele wa Isilaili, walume wose weli na miyaka malongo maidi na kugendelela wowadahile kuhita kuitowa kuna ing'hondo, wapetigwa kwa mazina, imwe imwe, kwa kusondelela ng'holo zawo na kaye zawo. 21 Waja wa kabila da Lubeni wapetigwe wakala 46,500.
22 Wanhu wa kabila da Simeoni, walume wose weli na miyaka malongo maidi na kugendelela wowadahile kuitowa kuna ing'hondo, wapetigwa kwa mazina, imwe imwe, kwa kusondelela ng'holo zawo na kaye zawo. 23 Waja wa kabila da Simeoni wapetigwe wakala 59,300.
24 Wanhu wa kabila da Gadi, walume wose weli na miyaka malongo maidi na kugendelela wowadahile kuitowa kuna ing'hondo, wapetigwa kwa mazina, kwa kusondelela ng'holo zawo na kaye zawo. 25 Waja wa kabila da Gadi wapetigwe wakala 45,650.
26 Wanhu wa kabila da Yuda, walume wose weli na miyaka malongo maidi na kugendelela wowadahile kuitowa kuna ing'hondo, wapetigwa kwa mazina, kwa kusondelela ng'holo zawo na kaye zawo. 27 Waja wa kabila da Yuda wapetigwe wakala 74,600.
28 Wanhu wa kabila da Isakali, walume wose weli na miyaka malongo maidi na kugendelela wowadahile kuitowa kuna ing'hondo, wapetigwa kwa mazina, kwa kusondelela ng'holo zawo na kaye zawo. 29 Waja wa kabila da Isakali wapetigwe wakala 54,400.
30 Wanhu wa kabila da Zabuloni, walume wose weli na miyaka malongo maidi na kugendelela wowadahile kuitowa kuna ing'hondo, wapetigwa kwa mazina, kwa kusondelela ng'holo zawo na kaye zawo. 31 Waja wa kabila da Zabuloni wapetigwe wakala 57,400.
32 Wanhu wa kabila da Efulaimu, mwana wa Yosefu, walume wose weli na miyaka malongo maidi na kugendelela wowadahile kuitowa kuna ing'hondo, wapetigwa kwa mazina, kwa kusondelela ng'holo zawo na kaye zawo. 33 Waja wa kabila da Efulaimu wapetigwe wakala 40,500.
34 Wanhu wa kabila da Manase, mwana wa Yosefu, walume wose weli na miyaka malongo maidi na kugendelela wowadahile kuitowa kuna ing'hondo, wapetigwa kwa mazina, kwa kusondelela ng'holo zawo na kaye zawo. 35 Waja wa kabila da Manase wapetigwe wakala 32,200.
36 Wanhu wa kabila da Benjamini, walume wose weli na miyaka malongo maidi na kugendelela wowadahile kuitowa kuna ing'hondo, wapetigwa kwa mazina, kwa kusondelela ng'holo zawo na kaye zawo. 37 Waja wa kabila da Benjamini wapetigwe wakala 35,400.
38 Wanhu wa kabila da Dani, walume wose weli na miyaka malongo maidi na kugendelela wowadahile kuitowa kuna ing'hondo, wapetigwa kwa mazina, kwa kusondelela ng'holo zawo na kaye zawo. 39 Waja wa kabila da Dani wapetigwe wakala 62,700.
40 Wanhu wa kabila da Asheli, walume wose weli na miyaka malongo maidi na kugendelela wowadahile kuitowa kuna ing'hondo, wapetigwa kwa mazina, kwa kusondelela ng'holo zawo na kaye zawo. 41 Waja wa kabila da Asheli wapetigwe wakala 41,500.
42 Wanhu wa kabila da Nafutali, walume wose weli na miyaka malongo maidi na kugendelela wowadahile kuitowa kuna ing'hondo, wapetigwa kwa mazina, kwa kusondelela ng'holo zawo na kaye zawo. 43 Waja wa kabila da Nafutali wapetigwe wakala 53,400.
44 Wawo niiyo walume wapetigwe, waja Musa na Haluni wawapeta kwa kutazigwa na waja walangulizi wa Isilaili longo na waidi, chila imwe kwa ichimu cha kaye ya tati yake. 45 Ivo walume wose wa Isilaili wapetigwa, weli na miyaka malongo maidi na kugendelela wowadahile kuitowa kuna ing'hondo, kwa kusondelela ng'holo zawo na kaye zawo. 46 Walume wose wapetigwe wakala 603,550.
47 Mbali Walawi hawapetigwe hamwe na yaja yamakabila yamwenga, 48 kwaviya Mndewa Mulungu kamulongela Musa, 49 “Leka kabila da Lawi, sekeuwapete hamwe na Waisilaili. 50 Mbali uwasagule Walawi wawe ndolezi wa hema da Mulungu da ukalangama na via vake vose na chila chinhu chili umo, wezadipapa hamwe na via vake vose. Wezasang'hana umo na kwika malago yawo kwa kudizunguluka hema ijo. 51 Hema vondadisegezigwe, Walawi wezadisegeza, vondadisimikigwe, Walawi wezadisimika. Munhu yoyose yeli siyo Mulawi yahadikwenhukila kezakomigwa. 52 Waisilaili wamwenga wose wezakwika malago yawo kwa mabumbila mabumbila, chila munhu muna dibumbila jake na hasi ya bendela yake. 53 Mbali Walawi wezakwika malago yawo kudizunguluka hema da Mulungu da ukalangama banzi zose, muladi sekekuwe na ludoko kwa Waisilaili, maabaho Walawi wasang'hanile muna dihema da Mulungu da ukalangama.”
54 Vino niivo viwatendile Waisilaili. Watenda chila chinhu fana Mndewa Mulungu viyamulagilize Musa.