1 “Maabaho chihinduka na chihita kuchuwala, chifosela Bahali ya Shamu, fana Mndewa Mulungu viyanilongele. Chizunguluka milima ya Seili kwa siku nyingi.

2 “Maabaho Mndewa Mulungu kanilongela, 3 ‘Muzunguluka mulima uno va kufaya, lelo hindukeni ubanzi wa kasikazi.’ 4 Mndewa Mulungu kanilongela nimwing'heni malagilizo yano, ‘Mwahabehi kufosa muna iisi ili kuna imilima ya Seili, isi ya wakaya wayenu, weli welesi wa Esau. Wawo wezawadumbeni, mbali muiteganye ng'hani. 5 Sekemuitowe nawo kwaviya sizamwing'hani hanhu hohose muna iisi yawo. Sizamwing'hani hata hanhu hadodo ha kubojoga. Isi iyo ya milima ya Seili niweng'ha welesi wa Esau iwe yawo. 6 Muhalonda ndiya hebu mazi kumwawo molondeka mugule.’

7 “Mndewa Mulungu, Mulungu wenu, kamtemelani mate kwa chila chinhu chimutendile. Kamkalizani vimukalile mowegela muna ichuwala chino ichikulu. Kakala hamwe na mweye miyaka ino yose malongo mane na hamuhungukilwe na chinhu chochose. 8 Ivo chigendelela na mwanza wetu na chiwafosa ndugu zetu welesi wa Esau wowakalile Seili, kutali na Alaba nzila yoilawa Elasi na Esioni Gebeli. Maabaho chihinduka kusondelela chuwala chose cha Moabu.

9 “Maabaho Mndewa Mulungu kanilongela, ‘Sekeuwagaze Wamoabu, hebu sekeuitowe nawo, kwaviya sizakwing'ha hanhu hohose muna iisi yawo. Mbali isi ya Ali niweng'ha welesi wa Lutu iwe yawo.’ ” 10 Umwaka isi ya Ali wakala Waemi, wawo ni wanhu wakulu na wengi na watali fana Waanaki, 11 fana Waanaki wamanyika fana Walefai, mbali Wamoabu wowatanga wawo Waemi. 12 Waholi nawo umwaka wakala Seili, mbali welesi wa Esau wawawinga kunze na wawakoma muladi wakale uko, fana viya Waisilaili viwatendile muna iisi ija yoweng'higwe na Mndewa Mulungu.

13 “Mndewa Mulungu kalonga, ‘Segeleni mukaloke chizanda cha Zeledi.’ Ivo chiloka chizanda cha Zeledi. 14 Ifosa miyaka malongo matatu na minane kwandusila vichisegele Kadeshi Balinea mbaka kuloka chizanda cha Zeledi. Walume wose wadahile kuhita kuitowa kuing'hondo wadanganika muna dilago, fana viyailahile Mndewa Mulungu. 15 Mndewa Mulungu kawatowa wanhu wawo na kuwakoma mbaka wose wamala.

16 “Ivo wanhu wawo wose wadahile kuhita kuitowa kuing'hondo viwadanganike, 17 Mndewa Mulungu kanilongela, 18 ‘Diyelo mwizaloka mhaka ya Moabu uko Ali. 19 Maabaho vondamufike kwa Waamoni, sekemuwasovule hebu sekemuitowe nawo, kwaviya sizamwing'hani isi ya Waamoni kuwa yenu. Kwaviya isi iyo niweng'ha wana wa Lutu iwe yawo.’ ”

20 Iviya isi iyo yomanyika fana isi ya Walefai. Umwaka Walefai wakala uko, mbali Waamoni wawatanga wawo Wazamuzumi. 21 Wakala wanhu wengi weli na nguvu na watali fana Waanaki. Mbali Mndewa Mulungu kawadanganiza viwafikile Waamoni wowaisolile isi yawo na kukala umo badala yawo. 22 Mndewa Mulungu katenda fana viyawatendele wana wa Esau, wotangigwa Waedomu, wowokala muna isi ya Seili. Waedomu viwafikile uko Mulungu kawadanganiza Waholi, wasola isi yawo na kukala umo mbaka diyelo. 23 Waavi umwaka wakala uko kuna yamabululu yeli kuumwambu wa Meditelaniya mbaka Gaza. Wakafitoli kulawa chisiwa cha Chilete wawadanganiza na wakala umo badala yawo.

24 “Maabaho Mndewa Mulungu kalagiliza, ‘Segeleni, mwanduse mwanza wenu, muloke bawe da Alinoni, nimtendani mumuhume Sihoni Mwamoli, mfalume wa Heshiboni hamwe na isi yake. Mtoweni na mwanduse kuisola isi yake. 25 Diyelo nizakwandusa kuwatenda wanhu wose wa chila hanhu wamdumbeni ng'hani, wezahulika mbuli zenu na wezagudemeka kwa kumdumbani.’ ”

26 Musa kalonga, “Niwatuma wasenga kulawa chuwala cha Kedemosi wahite kwa mfalume Sihoni wa Heshiboni wamgalile usenga wa tindiwalo. 27 Nilonga, ‘Chileke chifose muna iisi yako, chizafosela muna inzila muhala bila kuhinduka ubanzi wa kulume hebu ubanzi wa kumoso. 28 Chichuuzile ndiya na mazi ya kung'wa. Chokulamba uchileke chifose kwa migulu muna iisi yako. 29 Fana viwachitendele welesi wa Esau wowokala Seili na Wamoabu wowokala Ali, mbaka chiloke lwanda lwa Yoludani chingile muna iisi iyoching'ha Mndewa Mulungu, Mulungu wetu.’

30 “Mbali Sihoni mfalume wa Heshiboni hachilekele chifose muna iisi yake. Mndewa Mulungu, Mulungu wenu, kamtenda yawe mtatali na mwene moyo mdala, muladi chimuhume na kusola isi yake yochiihazi mbaka diyelo.

31 “Maabaho Mndewa Mulungu kanilongela, ‘Lola, nyandusa kutenda mumuhume Sihoni na isi yake, yanduseni kuisola muladi iwe yenu.’ 32 Maabaho Sihoni kalawa na wanhu wake wose muladi kuitowa na cheye habehi na bululu da Yahasa. 33 Mbali Mndewa Mulungu, Mulungu wetu, kamulava haulongozi wetu, chimtowa yeye na wanage na wanhu wake wose. 34 Chiyahoka na kuyabananga mabululu yake yose, chiwakoma walume na wanaake na wana, hachimulekile munhu yoyose yawe mgima. 35 Chisola wanyama na vinhu vimwenga vovikalile muna yamabululu yawo. 36 Kwandusila Aloeli, bululu dili mumgwazo wa bawe da Alinoni na bululu dili mgati ya bawe ijo, mbaka kufika Gileadi, hakukalile na bululu dili na mhongono nhali ya kuchihuma. Mndewa Mulungu, Mulungu wetu, kaching'ha mabululu yayo yose. 37 Mbali hachikwenhuke habehi na isi ya Waamoni hebu mumgwazogwazo wa lwanda lwa Yaboki, hebu kuna yamabululu ya zisi zili kuna imilima, hebu hanhu hohose hoyachigomile Mndewa Mulungu, Mulungu wetu.