1 Imuac niŋac ini Yesuguc meɋeli énécmiyu ɋelima kecʒuiguc iwawai ou heheya niŋac wamma kecmu. Imuaru mia Kristonéŋ Anutuac héiyaiguc tacma kecʒac. 2 Baecac iwawai niŋac qahac, néŋ iwawai ou hezac imuac mia nimma kecmu. 3 Hénia imi yomuhuc; Ini bec humudacgic kekecgina imi Yesuguc Anutuaru musaŋgé énécmiyu kecʒu. 4 Waŋu kekecgina wawaŋa Yesunéŋ wininimac nalé imuaru ini acguc edamuginaguc wininima nammu.

5 Imuac niŋac baeciguc kekera séwi taséginawac siŋ imi qegic humudacmac. Imi mia yomuhucya; kaiseroac haka silic, haka ɋakolayaguc, séwiac siŋ, biriawac siŋ niniŋ, ʒéma hémbaoc. Waŋu iwawai méŋac hémbaoc wawaŋa imi baniara mepési mimia tanec wanʒac. 6 Haka imuhucya niŋac Anutuac qeri biricac ʒérabéranéŋ nambérac ac qeqeya ionac muru hicŋi énécmianʒac. 7 Ini acguc imuac qeriaiguc kecgic nalé imuaru imuac qeriaiguc tacyac waŋaŋgic. 8 Waŋu deguc imi yoŋkanʒaŋ, qeri biric, niŋ ʒapi, ʒézé suresure, ʒéma ʒéʒoraŋ ac biria, biria imuhucya mocʒoŋ kuagina igucnec hetecgégic kendacmac. 9 Ini ic wahala ʒéma imuac wawaŋ meme imi hetecgéma ic ɋelia héima mema kecʒu, imuac niŋac eŋaoc ac ikora ménda waŋamumu. 10 Waŋu ic ɋelia imi eŋeya ʒéhicŋimiyec Anutu iwac hénia méndacma meɋeli miyu niniŋa acguc ɋelia wanʒac. 11 Meɋeli ai imuac qeriaiguc imi méŋ wai méŋ késa qahac, Girik ic me Yuda Ic, ic tuŋ séwi tasé hericheric ginaguc me ic tuŋ séwi tasé herichericgina qahac, baec méŋac icya icya me haséŋ ic,* Girik aciguc; Skite ic. weleŋ qeqe ic me miŋ kewu kekera, waŋu Kristo imi mocʒoŋ yanda, waŋu mocʒoŋ yanda ionac qeriginaiguc kecdacʒac.

12 Waŋu ini Anutuac gési énécmimia, ic embac héra téréya ʒéma wéiwécya séc kecma goi héihéi ʒéma ala siŋ ʒéma memaamuma kekec ʒéma gum bénʒénʒéŋ ʒéma qeri biricgina helanʒi amuma kekec imi malekugina ésécnec héigic meyu kecmu. 13 Waŋu méŋnéŋ méŋac ara ʒéyu eŋawu tétécgé amuma képésicgina waiamuma Miŋ Kewuninanéŋ képésicgina wai énécmiyec éséc ini acguc imuhucyanec waŋamumu. 14 Waŋu haka hiabia mocʒoŋ imuac qahaiguc goi héihéi haka imi toroqema wammu goi héihéi haka iminéŋ rikuŋ solaŋa wamma dérécgé énécmimac. 15 Luae qeamuma kecmu niŋac unuruyu séwi momac wamma kecʒu. Imuac waigic Kristoac luaenéŋ qerigina galeŋgéyu. Imuacnec toroqema ewa hia ac ézémanec kecmu. 16 Qeriginaguc Kristoac ackuaʒéc iminéŋ kuaya qeqeya qesalecgé énécmima heyu, niŋtegic qiŋtegic mocʒoŋnec eŋawu kuamuma ʒénaŋgé amuma legic ʒéra ʒéma legic ewayagucnéŋ legic téréya héima qeriginanéŋ ewa hia nimmima Anutu mepésimu. 17 Waŋu ackuaʒéc ginanéŋ me wawaŋ memeginanéŋ haka méŋac méŋ wambiŋ ʒé imi mocʒoŋ Miŋ Kewunina Yesuac qaraiguc iwac muru héima namma wammu. Imuhuc wamma iwac hia niŋac wamma Anutu maŋgocnina ewa hia ac ézému.

18 Embac ini euhécgina onac méra bacginaiguc kecmu, Miŋ Kewuninawac qeriaiguc héna iminéŋ sécya wanʒac. 19 Ic ini iniŋhécgina ionac goigina héimu. Waŋu ionac qeri howuc howuc ménda meénécmimu.

20 Nambérac ini iwawai mocʒoŋiguc neŋgoc maŋgoc hécgina ionac ac niŋtoho wandacmu. Haka iminéŋ Miŋ Kewuninawac qeriaiguc ewa hia mihicŋianʒac. 21 Maŋgoc ini merac hécgina qerigina ménda mebirimu qerigina kuha mawac niŋac.

22 Weleŋ qeqe ic ini iwawai mocʒoŋiguc baecac miŋ kewugina ionac kuagina tohomu. Ic tosara baec ic ionac qerigina mehiaruanʒu séc ic onac kicgina igucnec sac qahac, néŋ kurumeŋ Miŋ Kewuninawac bac yandi yandi wamma ewa solaŋanec wammu. 23 Ai imuac me imuac mewiŋ ʒé kurumeŋ Miŋ Kewuninawac meanʒiŋ séc wambiŋ, néŋ ic onac meanʒiŋ séc ménda wammu. 24 Imi mia tasénina imi Miŋ Kewuninanéŋ mératéc nénécmiyu mewiŋac hezac imi ini nindacma weleŋ qemianʒu. Waŋu weleŋ qemianʒu imi Kristo, imuac niŋac haka imuhuc waŋanʒiŋ. 25 Méŋnéŋ méŋ haka biria wammac imi, haka biria imuac bakia meleŋ mimac. Miŋ kewuninanéŋ séwiginawac inicma ménda énépésianʒac.