1 Wal deibin abum bigwan wol deya raidaran langa det taun, en Bowes bin go langa wan geit deya weya deibin abum miting pleis, en imbin jidan deya na.

Bambai na imbin luk det najawan ful kantrimen blanga det dedbala hasbin blanga det olgamen, en imbin jingat langa im, “Yu kaman en jidan iya basdam, dumaji ai garra tok langa yu.” En imbin kaman en jidan deya wansaid langa im.

2 Brom deya Bowes bin gajim tenbala boswan men blanga det taun, en imbin dalim olabat, “Yumob kaman iya en jidan, dumaji yumob garra witnis weya minbala main kantrimen tok.”

3 Wal wen detlot tenbala bosmen bin jidan, Bowes bin tok langa det ful kantrimen blanga im, “Yu sabi det olgamen Neiyomi hubin kambek brom det kantri gulum Moweb? Wal im wandi selim det fam blanga yunmi kantrimen det dedbala hasbin blanga im. 4 En ai reken yunmi garra tok blanga dijan. If yu wandi baiyim det fam, wal yu dalim dislot bosmen iya. Bat if yu nomo wandi baiyim, wal yu dalim mi streit, dumaji yu garram det rait blanga baiyim basdam en mi afta.”

Wal det men bin tok, “Yuwai. Mi wandi baiyim det fam.”

5 Wal Bowes bin tok, “Orait. Bat if yu wandi baiyim det fam brom det olgamen Neiyomi, wal yu lafta merrit langa det widogel brom det najawan kantri hubin kambek garram det olgamen, en wen im abum biginini bambai, yu lafta meigim det fam stap langa det femili lain blanga im dedbala hasbin.”

Bowes bin tok lagijat dumaji tharran bin lowa blanga detlot Isreil pipul wen eni men dai nomo garram eni biginini.

6 Wal det ful kantrimen blanga Bowes bin tok, “Wal ai kaan baiyim det fam, dumaji detlot biginini main kaan deigimoba det fam. Ai hendimoba langa yu. Yu lafta baiyim.”

7-8 Wal wen det men bin tok lagijat, imbin deigimat im but, en imbin gibit det but langa Bowes, dumaji det kastam blanga detlot Isreil pipul det taim bin lagijat na. Wen dubala men tok gija en wanbala tok, “Yuwai. Mi baiyim det len,” wal det najawan men im deigimat im but, en im gibit det but langa det men weya im wandi baiyim det len, en det but shoum ola pipul det dubala men bin agri gija.✡ Dyud 25:9

9 Wal Bowes bin tok langa detlot bosmen en langa ola najalot pipul deya langa det miting pleis, “Yumob lisin langa mi na. Yumob witnis blanga dijan. Tudei na aibin baiyim det fam brom Neiyomi. Aibin baiyim ebrijing blanga main dedbala kantrimen en im dubala dedbala san. 10 En det dedbala men waif hubin kaman brom det najawan kantri garra jidan main waif na. En det kantri blanga det dedbalamob garra stap langa olabat femili, dumaji olabat femili lain garra kipgon langa dijan kantri en langa dijan taun. Det femili lain kaan binij. En tudei na yumob bin irrim mi tok.”✡ Dyud 25:5,6

11 Wal wen Bowes bin tok lagijat, detlot tenbala bos en ola najalot pipul deya bin tok, “Yuwai. Melabat witnis blanga yu. En melabat askimbat YAWEI det trubala God blanga meigim det gel gibit yu bigmob biginini jis laik Reitjul en Liya, det dubala waif blanga det grengrenfatha blanga wi neim Jeikob bin gibit im. En melabat wandim yu garra go mowa ritjwan igin langa det Efrath femili. Dei garra lidimap yu neim langa dijan taun Bethlahem.✡ Jen 29:31 12 En detlot biginini weya YAWEI garra gibit yunbala Ruth garra meigim yu jidan garram bigmob femili jis laik weya wi jidan bigmob femili blanga Peres det san blanga det grengrenfatha blanga wi neim Juda en im waif Teima.” Lagijat na detlot pipul bin tok.✡ Jen 38:27-30

13 Brom deya Bowes bin merrit langa Ruth, en YAWEI bin brabli gudbinji blanga dubala. Dubala bin silip, en afta Ruth bin abum lilboi, 14 en ola olgamen bin jingat langa Neiyomi, “Melabat gibit theingks langa YAWEI, dumaji imbin gud langa yu. Im na bin gibit yu lilwan grensan blanga maindimbat yu, en ola Isreil pipul garra lidimap im neim. 15 En Ruth det yanggel blanga yu laigim yu brabliwei. Im na bin lukaftumbat yu mowa langa sebenbala san if yubin abum. Im na bin gibit yu grensan, en det grensan garra meigim yu rili hepiwan, en im garra maindimbat yu brabliwei wen yu olgamen brabli.” Lagijat na detlot olgamen bin jingat.

16 Wal Neiyomi bin gajim det lilboi, en imbin holdim im brabliwei, en imbin oldei maindimbat im.

17 Wal detlot olgamen brom det pleis bin gulum det lilboi neim Obed, en deibin jingat langa ebribodi, “Dijan na grensan blanga Neiyomi.”

Bambai na wen Obed bin growap, imbin abum san neim Jesi, en wen Jesi bin growap, imbin abum san neim Deibid. En im na King Deibid.

18 Wal iya na det femili lain brom Peres raidap langa King Deibid.

Peres bin dedi blanga Hesran, en Hesran bin dedi blanga Rem, 19 en Rem bin dedi blanga Aminadeb, 20 en Aminadeb bin dedi blanga Neishan, en Neishan bin dedi blanga Selman, 21 en Selman bin dedi blanga Bowes, en Bowes bin dedi blanga Obed, 22 en Obed bin dedi blanga Jesi, en Jesi bin dedi blanga King Deibid.

Binij na.