1 Preisim YAWEI det trubala God!

Sing nyuwan song langa YAWEI garram ol im pipul hu jidan trubalawei.

2 Ola Isreil pipul jidan gudbinji blanga yumob God hubin meigim ebrijing.

Sing song gudbinjiwei ola pipul brom Saiyan blanga yumob king.

3 Dens blanga preisim im neim.

Plei ola dram en ola gita blanga preisim im.

4 YAWEI im jidan gudbinji langa im pipul olabat.

Garram rispek im meigim ola lobalawan pipul win na.

5 Larram ola pipul blanga God sing gudbinjiwei dumaji deibin win,

en larram olabat sing song gudbinjiwei olnait.

6-7 Preisim God! Jingat adbala langa im en holdim ola bigwan shapwan naif langa bingga redibala blanga bidim en panishim detlot pipul langa najalot kantri,

8 en blanga taiyimap ola king en detlot lidamob garram tjein.

9 Olabat garra panishim detlot pipul langa najalot kantri jis laik weya God bin tok.

Lagijat na ola pipul blanga God garra win.

Preisim YAWEI det trubala God!