1 Wi gibit yu theingks, God.

Wi gibit yu theingks.

Wi dalimbat blanga hau yu jidan haibalawan,

en wi tok blanga ola brabli gudwan ting yubin dum.

2 God im tok, “Aibin meigim taim blanga jadjimbat pipul,

en ai garra gibitbat olabat feyago.

3 Nomeda dijan wel en ebrijing weya jidan laibala langa dijan wel sheiksheik nomo lilbit,

ai garra meigim im meinwan pat jidan strongwan.

4 Ai dalim detlot pipul hu laigimbat miselp,

‘Nomo meigim miselp haibala!’

5 Ai dalim detlot nogudbala pipul,

‘Stap toktok praudbalawei!

Nomo toktok oldei blanga yu pawa!’ ”

Lagijat na God bin tok.

6 Det jadj nomo kaman brom sangidapwei o sangodanwei, o brom det nowathsaid o sauthsaid.

Det pawa blanga jadjim pipul nomo kaman brom pipul.

7 Im kaman brom God, hu jidan det boswan blanga jadjimbat pipul.

Im panishim sambala en najalot im larramgo fri.

8 YAWEI jadjim ola nogudbala pipul, jis laik im holdim kap langa im bingga, en det kap im ful garram strongwan wain.

Tharran wain im det wailwan filing blanga im.

Im spilimat det wain en gibit langa ola brabli nogudbala pipul blanga dringgim.

Olabat dringgim en binijimap det wain holot.

9 Bat ai kaan neba stap toktokbat blanga det God blanga Jeikob,

en blanga singimbat preis song langa im.

10 Im garra binijimap det pawa blanga ola brabli nogudwan pipul,

bat im garra gibit mowa pawa langa ola gudbala pipul.