“YAWEI det trubala God, yu jinggabat langa melabat en wanim bin hepin langa melabat.

Yu sori langa melabat, dumaji melabat nogudwan pipul en melabat sheim miselp na.

2 Detlot najalot streinja pipul bin meigim miselp bos langa melabat kantri,

en dei jidan langa melabat kemp na.

3 Melabat nomo garram melabat dedimob na dumaji ola enamimob bin kilim olabat ded,

en blanga melabat mamimob olabat nomo garram hasbin na.

4 Melabat garra pei blanga detlot woda weya melabat wandim blanga dringgim,

en melabat garra baiyim detlot wud du blanga meigim faiya.

5 Melabat lafta wek brabli ad laiga enimul,

en melabat nokap detmatj, bat melabat nomo lau abum spel, najing.

6 Melabat bin brabli hanggri blanga daga,

en melabat bin selim miselp langa Ijip en Asiriya blanga gibit melabat daga.

7 “Blanga melabat grengrenfathamob bin oldei dumbat nogudbala ting, bat deibin ol binij na.

En wi abumbat detlot trabul en panishmen blanga detlot nogudbala ting na.

8 Detlot pipul hubin bidim melabat bin meigim olabat wekinmen bos oba langa melabat,

en nomo enibodi kaan seibum melabat brom olabat.

9 Detlot hu oldei medrimbat, oldei wokwok eniweya dei wandim,

en maitbi dei garra medrimbat melabat du wen melabat go lukabat blanga daga.

10 Melabat jidan brabli hanggriwan en tharran meigim melabat bodi barnbarn detmatj.

11 “Ola enamimob oldei fosimbat melabat waif en dodamob blanga slipslipbat garram olabat nogudbalawei, deya langa Jerusalem en langa ola taun langa Juda.

12 Blanga melabat lidamob deibin heingimap olabat garram roup langa olabat nek,

en dei nomo rispek melabat olmen en olgamen.

Dei jis tridim olabat nogudbalawei.

13 Blanga melabat yangboimob, dei fosimbat olabat blanga bitsimap det sid daga laik detlot wekinmen hu nomo gedim eni pei.

Dei meigim detlot lilboi garrimapbat detmatj wud, deibin oldei aigran.

14 Basdam detlot olmen lidamob bin oldei sodimat eni trabul langa det taun, bat najing na.

En detlot yang pipul nomo pleipleibat myusik en singsingbat song na.

15 “Melabat laif im soriwan.

Melabat kaan jidan hepiwan, najing.

Melabat oldei kraikraibat soribalawei, en melabat kaan densdensbat du.

16 Melabat kaan jidan praudbalawei blanga enijing. Nomo enijing gudwan iya blanga melabat,

dumaji basdam melabat bin dumbat loda nogudbala ting en melabat garram detmatj trabul na.

17-18 Dumaji det Serramoni Pleis im jidan miselp,

en ola wailwan dog oldei kaman en snikapbat hanggriwan blanga bif,

melabat brabli nogudbinji en melabat kaan luk gudwei na dumaji melabat oldei kraikraibat.

19 “Bat YAWEI, yu na det boswan blanga ebrijing.

Yu na garra jidan boswan olagijawan.

20 Wotfo yubin libum melabat longtaim na?

Yu garra jinggabat melabat igin, indit?

21 Yu garra bringimbek melabat langa yu, YAWEI.

Yu bringimbek melabat en meigim melabat gudbinji igin jis laik wibin jidan bifo.

22 YAWEI, yubin libum melabat olagijawan na?

Yu garra kipgon wailwailbat langa melabat olagijawan?”