1 Wal Job bin tok langa Elifas, 2 “Mi garram brabli hebiwan loud, en mi brabli nogudbinji en soribala. 3 Det loud brabli hebibala jis laik det sengraun weya jidan langa solwodasaid. Ai kaan jinggabat wanim aibin tok basdam. 4 Detlot strongbala spiya blanga God det brabli haibalawan, bin poisin main laif en mi bradin nomo lilbit langa im. 5 Buligi en dongki nomo krai adbala wen olabat nomo hanggriwan. 6 Yu reken yu gin dagat det daga nomo garram solt? Det waitwan blanga det eig nomo garram eni teist. 7 Wal lagijat na det daga blanga main nomo garram eni teist en ai nomo wandim eni daga.

8-9 “Ai wandim God garra ensim main preya en binijimap mi. 10 Afta tharran ai gin jidan brabli gudbinjiwei. Nomeda aibin abumbat detmatj pein bat ai nomo bin gibit bekboun langa det Holiwan God. 11 Dumaji mi nomo strongbala enimo, ai kaan jidan en weidabat blanga God oldei raidap mi git rili olmen. 12 Mi nomo strongbala wulijim det ston en kopa, najing. 13 Mi brabli nokap en bin lujim main munda. Nomo enibodi kaan albumbat langa mi.”

14 Wal Job bin kipgon tok, “Main fren olabat, mi brabli nogudbinji. Maitbi nomeda ai nomo rispek det boswan God brabliwei enimo, bat yumob garra stil kain langa mi. 15-16 Aibin reken yumob na main gudfren hu garra albumbat langa mi, bat najing. Yumob nomo eni gudbala. Yumob jis laik det lilwan krik weya nomo garram eni woda. Wen im stat rein im abum loda woda, 17 bat wen det san kamat im draiyimap det krik. 18 En mi jis laik wanbala men hubin gitbush langa deset kantri en lukabat blanga woda. 19 Detlot pipul brom det dubala kantri gulum Tema en Shiba, 20 bin reken olabat gin faindim woda, bat olabat brabli nogudbinji na, dumaji dei nomo bin faindim eni woda. 21 Wal im jis laik mi jidan garram yumob. Oni yumob na lukinatbat mi abumbat pein, en yumob bradin nomo lilbit en yumob ranawei.”

22 Wal Job bin kipgon tok, “Yumob reken aibin askim yumob blanga gibit mi presen o bigismob mani? 23 O yumob reken aibin askim yumob blanga baiyimbek mi brom detlot nogudbala enami? Ai nomo bin askim yumob blanga enijing. Wotfo yumob nogudbinji langa mi? 24 Yumob reken God im panishim mi blanga wanim aibin dum rong? Wal yumob shoum mi, en ai garra jidan kwaitbala. 25 Det trubala wed im oldei ardimbat, bat wen yumob tok, ai nomo agri garram yumob. Wotfo ai garra lisin langa yumob? 26 Mi brabli nogudbinji, en yumob reken main wed jis najing. Wal wotfo yumob kipgon graulgraulbat langa mi? 27 Yumob wed ardimbat mi, en yumob nomo kain langa mi. Maitbi seimwei yumob garra go en ardimbat detlot biginini hu nomo garram mami o dedi, o ardimbat yumob ronwan kantrimen. Maitbi yumob garra selim olabat blanga mani.

28 “Wal yumob luk langa mi na, rait langa main dubala ai. Ai kaan dalim yumob laiya. 29 Yumob stap dalimbat laiya blanga mi. Mi nomo giltiwan. Yumob ardimbat main gudwan neim. 30 Ai sabi wanim gudwan en wanim nogudwan, en mi nomo toktokbat laiyawan wed.”