2
Pre Lal Jonah
1 Na ke Jonah el muta insien ik soko ah, el pre nu sin LEUM GOD lal ac fahk:
2 “O LEUM GOD, ke nga muta in ongoiya nga pang nu sum,
Ac kom topukyu.
Nga pang nu sum infulan facl sin mwet misa me in suk kasru,
Ac kom lohngyu.
3 Kom sisyula nu yen loallana in meoa uh,
Acn ma kof uh apinyula
Ac noa lulap toki fuk.
4 Nga nunku mu kom sisyula liki ye motom
Ac nga fah tia ku in sifilpa liye Tempul mutal lom.
5 Kof uh tilmakinyuwi ac tulokinya monguk.
Meoa uh apinyula,
Ac kormwek uh punla insifuk.
6 Nga tilla nwe ke nga sun kapin eol ye kof uh,
Nu in acn su mutunpot kac kaul ma pahtpat.* acn ... ma pahtpat: pa infulan misa liye ke 2:2.
Ne ouinge, O LEUM GOD luk,
Kom folokinyume liki acn loal sac, ac nga moulla.
7 Ke nga pula lah moul luk apkuran in safla,
Nga pang nu sum, O LEUM GOD,
Ac kom lohngyu in Tempul mutal lom.
8 Elos su alu nu ke ma srulaola lusrongten,
Elos ngetla liki kom ac tia sifil inse pwaye nu sum.
9 Tusruktu nga fah yuk on in kaksak nu sum.
Nga fah orek kisa nu sum
Ac oru oana ma nga wulela kac.
Molela tuku sin LEUM GOD me!”
10 Na LEUM GOD El sap ik soko ah in wihtaclla Jonah nu weacn uh, ac el wihtaclla.