16
[Job]
1 Na Job el topuk ac fahk,
2 “Nga lohng tari kain sramsram ingan meet;
Ac kas in kasru lomtal ingan mwe na akkeok.
3 Mea, komtal ac sramsram na nwe tok?
Ya komtal lungse in komtal na pa aksafye sramsram uh pacl nukewa?
4 Funu komtal pa nga, ac nga pa komtal,
Nga lukun ku pac in fahk ma nukewa komtal fahk ingan.
Nga lukun usruk pac sifuk oana ngan pakomutomtal,
Ac fahkot kas puspis in lain kowos.
5 Nga lukun akkeye komtal ke kas in kasru,
Ac srumun pacna kutu kas saya in akwoye komtal.
6 “Tusruktu kas nga fahk uh tiana kasreyu,
Ac nga fin mutana tia kas, ac tia pacna aksrikyela mwaiok luk uh.
7 O God, kom oru nga arulana foroti;
Kom tuh lela sou luk in anwukla.
8 Kom kapriyuwi. Kom mwet lokoalok luk.
Inge nga sri na kolo,
Ac mwet uh pangon mu ma inge akpwayei lah oasr ma koluk luk.
9 “In kasrkusrak lal, God El eya kupasr nukewa ke monuk,
El foloyak ac suiyuwi.
10 Mwet uh isrunyu;
Elos kahkeni nu yuruk ac puok likintupuk.
11 God El eisyuyang nu inpoun mwet koluk.
12 Nga tuh muta in misla,
Na God El sruokya kwawuk;
El puokyu nwe itungyuwi.
El oreyu oana sie mwe lutlut pisr,
13 Ac pisrik sukan pisr nu keik liki acn nukewa —
Sukan pisr inge fakisyu ac kanteyuwi;
Ne ouinge, el tiana luman pakomutuk.
14 El nuna fakisyu na
Oana sie mwet mweun ma wella ke srunga lal uh.
15 “Nga asor ac nokomang nuknuk yohk eoa,
Ac nga pituki na muta infohk uh, lip na pwaye.
16 Nga tung nwe srusrala atronmutuk,
Ac kulun mutuk fafwak ac inken tungla.
17 Tusruktu nga tiana oru kutena ouiya sulallal,
Ac nga pre nu sin God ke inse na pwaye.
18 “O Faclu, nimet okanla ma koluk ma orek nu sik!
Nimet tulokinya pang luk ke nga suk nununku suwohs!
19 Aok pwayena, oasr mwet se inkusrao
Su ac fah tuyak wiyu lac, ac kasreyu. Job 19:25
20 Mwet kawuk luk inge elos aksruksrukeyu;
Ac sronin mutuk kahkla nu sin God.
21 Nga ke sie mwet ah in kwafe sin God keik,
Oana ke sie mwet el kwafe ke mwet kawuk lal.
22 Yac luk somsomlana,
Ac nga fahsr ke soko inkanek ma nga tia ku in foloko we me.