1 Ke mutawauk ah, kain kas sefanna lun mwet faclu nufon, ac mwet uh orekmakin pusra sefanna. 2 Ke elos forfor layen kutulap, elos sun sie acn tupasrpasr in acn Babylonia ac oakwuki we. 3 Elos fahk nu sin sie sin sie, “Fahsru, kut in orek brick ac omunla in ku.” Ouinge elos orek brick mwe musa, ac sang tar folsani nu sie. 4 Na elos fahk, “Inge kut ac musaela sie siti ac sie tower ma ac sun acn inkusrao, inesr in mau ku in pwengpeng, ac kut in tia musalelik nu fin faclu nufon.”

5 Na LEUM GOD El oatula ac liye siti sac ac tower se ma mwet uh musai, 6 ac El fahk, “Ingena, mwet inge ma sefanna ac elos sramsram ke kas sefanna. Tufahna pa inge mutaweyen ma elos ac mau oru uh. Ac tia paht na elos ac ku in oru kutena ma su elos ac lungse oru! 7 Fahsru, kut oatula ac akfohsyauk kas lalos, elos in tia kalem ke kas lun sie sin sie.” 8 Ouinge LEUM GOD El akfahsryeloselik nu fin faclu nufon, ac elos tila musai siti sac. 9 Siti sac pangpang Babylon,* Babylon: fahkyen ine se inge apkuran oana “fohsak” in kas Hebrew. mweyen LEUM GOD El akfohsyauk kas lun mwet nukewa we, ac akfahsryeloselik nukewa liki acn we nu fin faclu nufon.

10 Pa inge fwilin tulik natul Shem. Yac luo tukun sronot ah, ke Shem el yac siofok matwal, oasr wen se natul, pangpang Arpachshad. 11 Tukun pacl sac el sifilpa moul ke yac lumfoko, ac oasr pac tulik saya natul.

12 Ke Arpachshad el yac tolngoul limekosr, oasr wen se natul pangpang Shelah. 13 Tukun pacl sac el moul ke yac angfoko tolu, ac oasr pac tulik saya natul.

14 Ke Shelah el yac tolngoul, oasr wen se natul pangpang Eber. 15 Tukun pacl sac el moul yac angfoko tolu, ac oasr pac tulik saya natul.

16 Ke Eber el yac tolngoul akosr, oasr wen se natul pangpang Peleg. 17 Tukun pacl sac el moul yac angfoko tolngoul, ac oasr pac tulik saya natul.

18 Ke Peleg el yac tolngoul, oasr wen se natul pangpang Reu. 19 Tukun pacl sac el moul yac luofoko eu, ac oasr pac tulik saya natul.

20 Ke Reu el yac tolngoul luo, oasr wen se natul pangpang Serug. 21 Tukun pacl sac el moul yac luofoko itkosr, ac oasr pac tulik saya natul.

22 Ke Serug el yac tolngoul, oasr wen se natul pangpang Nahor. 23 Tukun pacl sac el moul yac luofoko, ac oasr pac tulik saya natul.

24 Ke Nahor el yac longoul eu, oasr wen se natul pangpang Terah. 25 Tukun pacl sac el moul yac siofok singoul eu, ac oasr pac tulik saya natul.

26 Tukun Terah el yac itngoul, el oswella Abram, Nahor ac Haran.

27 Pa inge fwilin tulik natul Terah, su papa tumal Abram, Nahor, ac Haran. Haran pa papa tumal Lot, 28 ac Haran el misa yen sel in acn Ur in Babylonia, ke papa tumal ah srakna moul. 29 Abram el payukyak sel Sarai, ac Nahor el payukyak sel Milcah, acn natul Haran, su oayapa papa tumal Iscah. 30 Sarai el tia ku in orek tulik.

31 Terah el eisal Abram wen natul, ac Lot, wen natul Haran ma lel Abram, ac Sarai acn talupal, su mutan kial Abram, ac elos welul som liki siti Ur in Babylonia nu in facl Canaan. Elos som nwe sun acn Haran ac oakwuki we. 32 Terah el misa we ke el yac luofoko limekosr matwal.