4
LEUM GOD El Use Misla Nu Fin Faclu Nufon
(Isaiah 2:2–4)
1 In len fahsru uh,
Fineol yen Tempul uh tu we
Pa ac fah fulat liki fineol nukewa;
Ac fah ngeta nu fin inging nukewa.
Mutanfahl puspis ac fah aleni nu we,
2 Ac elos fah fahk,
“Kut in utyak nu fineol lun LEUM GOD,
Nu ke Tempul lun God lun Israel.
El fah luti nu sesr lah mea El lungse kut in oru.
Kut ac fah fahsr ke inkanek ma El sulela.
Tuh mwe luti lun LEUM GOD tuku Jerusalem me;
El kaskas nu sin mwet lal Zion me.”
3 El fah akmisyela amei inmasrlon mutunfacl puspis,
Inmasrlon ku lulap, yen apkuran ac yen loes.
Elos ac fah tuktukya cutlass natulos ac ekulla nu ke mwe pukpuk,
Ac osra in fakfuk natulos nu ke mitmit.
Mutunfacl uh ac fah tia sifilpa mweun,
Ac tia sifilpa akoeyuk mweun. Jol 3:10
4 Mwet nukewa fah muta in misla
Inmasrlon ima in grape lalos ac ye sak fig sunalos,
Ac wangin sie fah aksangengyalos.
LEUM GOD Kulana El wulela ouinge. Zec 3:10
5 Kais sie mutunfacl fah alu nu sin god lal ac akos god lal sifacna, a kut fah alu ac akos LEUM GOD lasr nwe tok ma pahtpat.
Israel Fah Foloko Liki Sruoh
6 LEUM GOD El fahk, “Pacl se ac fah tuku ke nga fah eisani nu sie mwet su nga tuh kalyei, elos su keok in pacl in sruoh. 7 Elos sukapasla ac muta loesla liki acn selos, tuh nga ac fah oru sie mutawauk sasu yorolos su lula, ac elos ac fah ekla sie mutunfacl lulap. Nga ac fah leum faclos Fineol Zion in pacl sac lac mwe tok.”
8 Ac kom, Jerusalem, kom oana sie tower su God El muta we, ngeti liye mwet lal oana sie shepherd el liyaung sheep natul. God El ac fah sifilpa oru tuh in kom pa siti fulat lun tokosrai se su nuna ma lom. 9 Efu kom ku wowoyak arulana yokla? Efu kom ku keok oana sie mutan apkuran in isus? Ya mweyen wangin tokosra lom, ac mwet kasru lom misa? 10 O Jerusalem, kom in worwor ac sao oana sie mutan su ac isus, tuh inge kom fah lillilyak liki siti uh nu yen turangang inimae. Ac fah utukla kom nu Babylon, tusruktu in acn ingo LEUM GOD El fah molikomla liki mwet lokoalok lom. 11 Mutanfahl puspis fahsreni tari in akkolukyekomla. Elos fahk, “Enenu na in aktaekyeyukla Jerusalem! Kut ac liye na ke ac arulana musalla!” 12 Tusruktu, mutanfahl inge tia etu lah mea LEUM GOD El akoo nu selos. Elos tia akilen lah utukeni elos in tuh kalyeiyuk elos, oana ke wheat uh ac itat uh ke nien kulkul wheat.
13 LEUM GOD El fahk, “Mwet Jerusalem, fahla ac kalyei mwet lokoalok lowos. Nga fah oru tuh kowos in arulana ku oana soko cow mukul su koacl orek ke osra, ac falkal orek ke bronze. Kowos ac fah itungya mutunfacl puspis, ac mwe kasrup su elos eis ke funmwet, kowos fah ase nu sik, Leum lun faclu nufon.”