32
Kas Lal Elihu
(32:1—37:24)
1 Ke sripen Job el tu na ku in nunku mu wangin ma koluk lal, oru mwet tolu ah tui ac tila srike in topkol. 2 Tusruktu Elihu, sie mwet su tu apkuran nu yoroltal, el koflana kutongya kasrkusrak lal, mweyen Job el sifacna pangon mu el wo ac el sis koluk uh nu sin God. (Elihu el wen natul Barakel, sie sin mwet in sruf lal Buz, ac el ma in sou lun Ram.) 3 El oayapa kasrkusrak sin mwet kawuk tolu lal Job, mweyen wanginna ma eltal ku in sang topkol Job, oru oana in tuh sutuu sin God. 4 Na ke sripen Elihu pa fusr emeet sin mwet ma tu in acn sac, oru el soano nwe ke na mwet nukewa tari ke sramsram uh. 5 Ke el liye lah mwet tolu ah tia ku in topkol Job, el arulana kasrkusrakak, 6 ac mutawauk in kaskas.
Pa inge kas lal:
[Elihu]
“Nga fusr, ac komtal matu,
Oru nga tuh sangeng in fahk nunak luk uh.
7 Nga sifacna fahk mu fal komtal in tukeni asramsrami,
Ac fahk nunak lalmwetmet lomtal an, lah komtal pa matu.
8 Tusruktu Ngun lun God Kulana
Pa ac tuku nu sin mwet uh ac sang lalmwetmet nu selos.
9 Tia matwen mwet uh pa oru elos in lalmwetmet,
Ku kasrelos in etu ma pwaye.
10 Ke ma inge, nga ke komtal in lohngyu,
Ac lela ngan fahk nu sumtal ma nga nunku uh.
11 “Nga tuh mislana ac porongo ke komtal sramsram,
Oayapa nga tupan ke komtal sukok kas lalmwetmet komtal in orekmakin.
12 Ke nga lohang nu kac ah, nga konauk lah komtal munasla sel;
Komtal tiana aksutueyela ma Job el fahk ah.
13 Efu ku komtal ku in fahk mu komtal konauk lalmwetmet?
Enenuyuk God Elan topkol Job, mweyen komtal tuh koflana topkolla.
14 Job el tuh kaskas nu sumtal, ac tia nu sik,
Tusruktu nga tiana ku in topkol oana ke komtal oru ah.
15 “Job, wanginla ma eltal ku in fahk;
Wanginna ma eltal ku in sang topuk kom.
16 Mea, nga ac srakna tupan ke eltal misla tila sramsram uh?
Eltal tu na ac wanginla ma eltal ku in sifilpa fahk.
17 Mo. Nga ac sot top luk sifacna nu sum,
Ac fahkot ma nga nunku uh.
18 Nga arulana elyala ngan tari sramsram;
Nga kofla kutongya kas luk uh.
19 Nga fin tia eis pacl luk in sramsram,
Nga ac fokelik oana sie pak in neinyuk wain ma sessesla ke wain sasu.
20 Nga kofla muteng; enenu na nga in kaskas.
21 Nga ac fah tia wiwi mwet ke alein se inge;
Nga ac tia yukin sie.
22 Nga tia wi yukin mwet,
Ac nga fin oru, God El ac sa na in kaiyu.