29
Sramsram Safla Lal Job Nu Sin Mwet Kawuk Lal
1 Na Job el sifil mutawauk in kaskas:
[Job]
2 “Saok moul luk uh in ku in sifil folokla
Oana ke pacl se God El tuh karinginyu ah.
3 In pacl sac God El tuh wiyu na pacl nukewa,
Ac ase kalem nu sik ke nga fufahsryesr in lohsr uh.
4 In len ingo pa nga tuh arulana fokoko,
Ac asruoki lun God nu sik arulana karingin inkul sik wo.
5 God Kulana El tuh arulana wiyu,
Ac tulik nutik nukewa elos muta yuruk.
6 Yohk sronin titi lun cow ac nani nutik,
Ac eot in itat olive nu ke oil, yohk oil soror kac.
7 Pacl nukewa ma mwet matu in siti uh ac toeni,
Ac nga eis acn sik inmasrlolos uh,
8 Mwet fusr uh ac sa na sekinyula elos fin liyeyuyak,
Ac mukul matu elos tuyak in akkalemye akfulat lalos nu sik.
9 Mwet kol uh ac tui pac tila sramsram;
10 Finne mwet ma fulat selos uh, ac misla pac.
11 “Mwet nukewa su liyeyu meet, ku lohng sramsram keik,
Elos ac kaksakinyu, ac srumunna woiyen orekma luk.
12 Ke mwet sukasrup elos tuh ngusr, nga kasrelos;
Nga kasru pac tulik mukaimtal ma wangin mwet in kasrelos.
13 Mwet ma muta in ongoiya elos kaksakinyu,
Ac katinmas uh elos arulana engankin kasru nga oru nu selos.
14 Pacl nukewa nga oru na ma suwohs ac pwaye.
15 Nga oana atronmuta nu sin mwet kun,
Ac oana nia nu sin mwet ma tia ku in fahsr.
16 Nga oana sie papa nu sin mwet sukasrup,
Ac nga tuh kasru mwetsac uh in kutena mwe ongoiya nu selos.
17 Nga kunausla ku lun mwet sulallal,
Ac molela mwet ma elos akkeokye uh.
18 “Pacl nukewa nga tuh nunku mu moul luk ac loes na,
Ac nga ac misa na in misla yurin tulik nutik, in lohm sik sifacna.
19 Nga tuh oana soko sak ma oasr kof ke okah uh in pacl nukewa,
Ac lah kac uh aksroksrokyeyuk pacl nukewa ke aunfong uh.
20 Mwet nukewa tiana tui in kaksakinyu,
Ac ku luk aksasuyeyuk pacl e nukewa.
21 Pacl nga sang kas in luti uh, mwet uh ac misla
Ac lohma in lohng ma nga fahk uh;
22 Na ke safla sramsram luk uh, wanginna ma elos ac ku in sifilpa fahk.
Kas luk ac tili nu in elos oana tulin af nu fin fohk pao;
23 Mwet uh ac arulana engan in eis kas luk uh
Oana ke mwet ima uh engan ke ac sifil afi.
24 Nga israsr srisrik nu selos ke pacl wanginla finsrak lalos;
Ac ngetnget kulang luk akkeyalos.
25 Nga pa kololos, ac wotela ma elos in oru;
Nga tuh kololos oana sie tokosra su kol un mwet mweun lal,
Ac nga akwoyalos ke pacl elos asor.