22
Asramsrami Aktolu
(22:1—27:23)
[Eliphaz]
1 Na Eliphaz el fahk,
2 “Ku oasr sie mwet, finne mwet ma lalmwetmet emeet uh,
Su oasr sripa nu sin God? 22:2–3; Job 35:6–8
3 Ku orekma lom fin arulana suwohs, ya ac akwoye God?
Kom fin tia oru kutena ma koluk, ya ac ku in kasrel?
4 Tia ke sripen kom sangeng sin God
Pa oru Elan kai kom, ku nununkekom an.
5 Mo, ma ke sripen arulana yokla ma koluk lom;
Oayapa ke ma koluk nukewa ma kom oru an.
6 Ke kom oru tuh sie mwet lim in akfalyela mani ma el ngisrala sum uh,
Oana kom in sarukla nuknuk ma el nukum uh ac oru tuh elan koflufolla.
7 Kom tuh srunga sang kof nimen mwet su totola,
Ac sranga pac sang mwe mongo nu selos su masrinsral.
8 Kom tuh orekmakin ku lom ac wal lom
In eisla acn uh nufon.
9 Kom tia falkin lah kom tia wi kasru katinmas,
A kom oayapa pisre ma lun tulik mukaimtal, ac oralos koluk.
10 Ke ma inge sruhf puspis raunikomla ac akola in sruokkomi,
Ac inge kom muta in sangeng na lulap.
11 Arulana yokla lohsr ingena, oru kom tia ku in liye,
Ac sie sronot lulap afinkomla.
12 “Ya God El tia muta yen fulatlana inkusrao
Ac ngeti nu fin itu uh, finne itu uh oan yen fulat?
13 A kom siyuk, ‘Mea God El etu?
Pukunyeng uh okanulla, na El ac nununkekut fuka?’
14 Kom nunku mu pukunyeng matoltol uh kosrala mutal Elan tia liye,
Ke El forfor fin acn engyeng uh.
15 “Ya kom wotela sum tari mu kom ac fahsrna ke inkanek
Ma mwet koluk uh fahsr kac pacl nukewa uh?
16 Meet liki na pacl in misa lalos,
Elos pahtkakinyukla tari ke sie sronot.
17 Mwet inge mwet pilesru God,
Ac elos nunku mu wangin ma El ku in oru nu selos.
18 Sruhk God pa tuh akinsewowoyalos ke kasrpalos —
Nga tia ku in kalem ke nunak lun mwet koluk uh.
19 Mwet wo uh engan, ac mwet wangin mwata elos israsr
Ke elos liye lah kalyeiyuk mwet koluk uh.
20 Ma nukewa lun mwet koluk uh kunausyukla,
Ac e uh esukak kutena ma su lula.
21 “Inge, Job, akmisye kom nu sin God,
Ac nimet oral oana sie mwet lokoalok;
Kom fin suk misla, na El ac akinsewowoye kom.
22 Eis mwe luti ma El sot uh;
Ac filiya kas lal insiom.
23 Aok, kom enenu in siskomi, ac foloko nu yurin God,
Oru in safla ma koluk nukewa
Ma orek in lohm sum an.
24 Sisla gold lom an;
Sisla nufon gold wowo lom an nu ke kapin infacl paola ingan.
25 Lela tuh in God Kulana pa gold lom uh,
Ac Elan oana silver lom su yolyak oan yurum an.
26 Na kom fah lulalfongi God pacl nukewa,
Ac kom fah etu lah mwe insewowo lom nukewa tuku sel me.
27 Ke kom pre El ac topuk kom,
Ac kom fah liyaung wulela nukewa ma kom orala nu sel an.
28 Na ac fah wo ouiyom ke ma nukewa kom oru,
Ac kalem ac fah tolak inkanek lom.
29 God El sisya mwet inse fulat,
Ac molela mwet pusisel.
30 God El ac fah molikomla fin wangin ma sufal lom,
Ac fin pwaye orekma lom.”