14
1 “Kut nukewa isusla tuh munas ac tia ku in sifacna.
Moul lasr nukewa fototo ac sessesla ke mwe ongoiya.
2 Kut kapak na sa na in uli oana ros uh;
Ac kut wanginla oana lul uh.
3 O God, ya kom ku in ngetma ac nunku ke kain mwet se nga uh,
Ku eisyuyang nu in nununku?
4 Wangin ma nasnas ku in tuku
Liki sie ma su arulana fohkfok oana mwet uh.
5 Lusen moul lal nuna oakwuki na meet —
Aok, pisen malem ma el ac moul uh.
Kom orala tari oakwuk lom, ac tia ku in ikilyukla.
6 Ngetla lukel ac nimet lusrongol.
Lela elan engankin moul upa se inge, el fin ku.
7 “Oasr finsrak ke soko sak ma pakpuki tari —
Mweyen ac ku in sifil srunak ac moul.
8 Okah uh finne matuoh,
Ac srua uh misa infohk uh,
9 Fin oasr kof pusralla na ac sifilpa kapak oana soko sak fusr.
10 A mwet se fin misa, na fuka?
Ke el misa uh, pa na ingan saflaiyal.
11 “Oana sie lulu su paola,
Ac soko infacl su tila soror,
12 Ouinge mwet uh ac misa, ac tia sifil moulyak.
Nwe ke pacl se kusrao ac fah wanginla, elos fah tia ngutalik;
Ku mukuila liki motul lalos.
13 “Nga ke kom in wikinyula in facl sin mwet misa;
Lela in wikinyukla nga nwe ke na kasrkusrak lom uh wanginla,
Ac kom oakiya sie pacl an in esamyu.
14 Ku mwet se fin misa, ya el ku in sifil moulyak?
Tusruktu, nga ac soano in oasr pacl wo se,
Ke pacl koluk se inge ac wanginla.
15 Na kom fah pang ac nga ac topuk kom,
Ac kom fah insewowo keik, su ma orekla lun poum.
16 Na kom fah karingin fahluk nukewa luk,
A kom fah tia oakla ma koluk luk.
17 Kom ac fah nunak munas kac, ac mulkunla ma inge;
Kom ac fah eela ma sufal nukewa ma nga orala.
18 “Sie pacl eol uh ac mokukla,
Ac fulu uh ac mokleyukla.
19 Kof uh ac fah kangla eot uh,
Ac af upa ac fah pahtkakunla fohkon acn uh;
Ouinge kom fah kunausla finsrak lun mwet uh ke moul lalos.
20 Kom kunausla ku lun sie mwet ac lusulla ma pahtpat;
Ac mutal irelik in misa lal.
21 Wen natul uh ac fah sunakinyuk, a el ac tia ku in etu,
Ke ac akmwekinyeyukla tulik natul, ac tia pac akkalemyeyuk nu sel.
22 El ac pula na ngal lun manol,
Ac asor lun nunak lal mukena.”