8
[Bildad]
1 Na Bildad el fahk,
2 “Safla sramsram in eng tuhtuh lom an?
3 God El tia wi kifasla nununku suwohs lal uh;
El tia ku in tia oru ma pwaye.
4 Sahp oasr ma koluk tulik nutum ah tuh oru lain God.
Pwanang El sang kaiyuk fal nu selos.
5 Inge wona kom in forla ac siyuk sin God Kulana Elan kasrekom;
6 Fin pwaye lah kom suwohs ac nasnas na,
Na God El ac kasrekom.
Ac folokonot mwet in lohm sum ac mwe kasrup lom nukewa tuh in mwe srui nu sum.
7 Mwe kasrup nukewa ma El eisla liki kom
Ac tia apkuran nu ke ma El ac sifilpa folokonot nu sum.
8 “Srike liye luman lalmwetmet in pacl meet ah;
Ac nunku ke ma pwaye su mwet lasr meet ah elos etala.
9 Moul lasr uh fototo, ac wanginna ma kut etu;
Kut ac wanginla oana ke lul uh sa na in wanginla.
10 A lela mwet matu lalmwetmet lasr meet ah in luti kom;
Porongo ma elos fahk uh:
11 “Loa uh tia ku in kapak yen wangin kof we;
Tia ku in koneyukyak sayen acn furarrar uh.
12 Fin wanginla kof, na loa uh pa ac uli emeet,
Ke srakna mangosr ac soenna fal in orekmakinyuk.
13 Mwet ma forla liki God uh elos oana loa inge;
Finsrak lalos uh ac wanginla ke pacl se na ma elos mulkunla God.
14 Elos sulela ahng lun pwepenu uh tuh in nien wikla lalos.
15 Ku elos fin fungyang ke sie ang inge, ya ac ku in tapkulosyak?
Ac elos fin sruok soko koa ke ang inge, ya ac ku in kasrelos tuyak?
16 “Mwet koluk uh elos furarak in ima uh,
Oana pulah su furarak ye faht uh.
17 Okah kaclos uh ac punla eot uh,
Ac sruokani ku eot nukewa.
18 Na fin fifyak elos,
Ac wangin inkelos yen elos tuh oan we meet.
19 Aok, pwana inge luman engan lun mwet koluk uh;
Oasr pac mwet saya ac sifil tuku ac aolulosla.
20 “Tusruktu God El tia ku in ngetla liki mwet su inse pwaye nu sel,
Ac El tia ku in kasru mwet koluk uh.
21 El ac fah lela kom in sifilpa israsr ac sasa,
22 Tusruktu El ac fah aklusrongtenye mwet su srungakom,
Ac lohm sin mwet koluk uh ac fah wanginla.”