14
Kas In Kwafe Lal Hosea Nu Sin Israel
1 Mwet Israel, foloko nu yurin LEUM GOD lowos. Ma koluk lowos oru kowos in tukulkul ac ikori. 2 Foloko nu yurin LEUM GOD, ac oru tuh pre se inge in mwe kisa lowos nu sel: “Sisla ma koluk lasr ac porongo pre lasr, ac kut fah kaksakin kom oana ke kut tuh wulela nu sum kac. 3 Tuh Assyria tia ku in molikutla, ac horse in mweun tia pac ku in loangekut. Kut fah tiana sifilpa fahk nu ke ma sruloala lasr mu elos god lasr. O LEUM GOD, kom fahkak pakoten nu sin mwet mukaimtal!”
LEUM GOD El Wulela Ke Moul Sasu Nu Sin Mwet Israel
4 LEUM GOD El fahk,
“Nga fah folokonma mwet luk nu yuruk.
Nga fah lungse elos ke insiuk nufon;
Nga tia sifilpa mulat selos.
5 Nga fah oana af yen pao
Nu sin mwet Israel.
Elos ac farengelik oana ros;
Elos ac okahla arulana ku,
Oana sak in acn Lebanon.
6 Elos fah moulyak ke srun sasu
Ac kato oana sak olive.
Elos ac fah fo loslos
Oana sak cedar in acn Lebanon.
7 Elos ac sifilpa muta ye karinginyuk luk.
Elos fah taknelik fiten wheat,
Ac fahko kac ac fah pus oana ima in grape.
Elos ac fah pwengpeng oana wain in acn Lebanon.
8 Mwet Israel ac fah tia sifil alu nu ke ma sruloala.
Nga ac fah topuk pre lalos ac karinganulos.
Nga fah sonolosi oana soko sak folfol insroa,
Mwe insewowo lalos nukewa fah tuku yuruk me.”
Kas In Aksafye
9 Lela elos su lalmwetmet in kalem ke ma simla inge, ac in filiya in oan insialos. Inkanek lun LEUM GOD suwohs, ac mwet suwoswos elos moul ke sripen elos fahsr kac, a mwet orekma koluk elos tukulkul ac ikori mweyen elos tia fahsr kac.