25
Fwilin Tulik Saya Natul Abraham
(Sie Chronicle 1:32–33)
1 Abraham el payukyak sin sie pac mutan, inel pa Keturah. 2 Keturah el oswela nu sel Abraham: Zimran, Jokshan, Medan, Midian, Ishbak, ac Shuah. 3 Jokshan pa papa tumal Sheba ac Dedan, ac fwilin tulik natul Dedan pa mwet Asshurim, mwet Letushim ac mwet Leummim. 4 Wen natul Midian pa Ephah, Epher, Hanoch, Abida, ac Eldaah. Elos inge nukewa ma tuku kacl Keturah.
5 Abraham el filiya ma nukewa lal nu sel Isaac, 6 tusruktu ke el srakna moul, el sang pac mwe kite nu sin wen natul ma mutan kulansap kial elos oswela nu sel. Na el supwala wen natul inge nu in sie facl layen nu kutulap, tuh elos in muta loes lukel Isaac wen natul.
Misa Ac Pukpuki Lal Abraham
7 Pa inge lusen moul lal Abraham: yac siofok itngoul limekosr. 8 Abraham el sisla mong safla lal ac misa ke el arulana matuoh. 9 Isaac ac Ishmael, wen luo natul, eltal piknilya in Luf Machpelah in acn mwesas kutulap in Mamre, su tuh ma lal Ephron wen natul Zohar, mwet Hit. 10 Pa inge ipin acn se ma Abraham el tuh molela sin mwet Hit ah. Abraham ac Sarah, mutan kial, eltal kewa pukpuki we. Gen 23:3–16 11 Tukun Abraham el misa, God El akinsewowoyal Isaac wen natul, su muta fototo nu ke acn se pangpang “Lufin Kof Lun El Su Moul Ac Liyeyu.”
Fwilin Tulik Natul Ishmael
(Sie Chronicle 1:28–31)
12 Pa inge wen natul Ishmael, su Hagar, mutan kulansap Egypt lal Sarah, el tuh oswela nu sel Abraham. 13 Takla inelos fal nu ke matwalos: Nebaioth, Kedar, Adbeel, Mibsam, 14 Mishma, Dumah, Massa, 15 Hadad, Tema, Jetur, Naphish, ac Kedemah. 16 Elos pa papa tumun sruf singoul luo, ac inelos itukyang nu ke inen acn elos muta we ac nien aktuktuk lalos. 17 Ishmael el tuh yac siofok tolngoul itkosr ke el misa. 18 Fwilin tulik natul Ishmael muta inmasrlon Havilah ac Shur, layen kutulap in acn Egypt, ke inkanek nu Assyria. Elos muta srengla liki tulik natul Abraham saya.
Isusla Lal Esau Ac Jacob
19 Pa inge sramsram kacl Isaac wen natul Abraham. 20 Isaac el yac angngaul ke el payukyak sel Rebecca, acn natul Bethuel (sie mwet Aram ke acn Mesopotamia), ac el ma lohl Laban. 21 Ke sripen wangin tulik natul Rebecca, Isaac el pre nu sin LEUM GOD kacl. LEUM GOD El topuk pre lal, ac Rebecca el pitutuyak. 22 Fak se pa insial, ac meet liki eltal isusla eltal amei na insien nina kialtal. Rebecca el fahk, “Efu ku sikyak ange nu sik?” Ouinge el som siyuk sin LEUM GOD kac.
23 LEUM GOD El fahk nu sel,
“Mutunfacl luo oasr in kom.
Kom ac oswela mutunfacl akwasui luo.
Sie ac fah ku liki ma se ngia.
El su matu ac fah kulansupu el su fusr.” Rom 9:12
24 Ke sun pacl in isus lal ah, el oswela fak mukul se. 25 Tulik se meet ah srusra manol, ac kolol arulana unacna oana sie nuknuk manan, ke ma inge itukyang inel Esau.* Esau: ine se inge fahk ke acn Seir, ac fahkiya oana kas Hebrew se “unacna”. 26 Tulik se akluo el isusla tuh na el sruokna kapinnial Esau. Ouinge itukyang inel Jacob.† Jacob: fahkyen ine se inge oana kas Hebrew se “kapinnia”. Isaac el yac onngoul ke eltal isusla.
Esau El Kukakunla Wal Lun Wounse Lal
27 Tulik mukul luo ah matula, ac Esau el mwet na etu sruh kosro se, ac el lungsena muta inimae, a Jacob el sukas ac el mutana in lohm uh. 28 Isaac el kuloel Esau, mweyen el lungse kang kosro inima ma Esau el muta sruok uh, a Rebecca el kuloel Jacob.
29 Sie len ah ke Jacob el orek sup nal, Esau el foloko liki sruh kosro lal. El masrinsralla 30 ac el fahk nu sel Jacob, “Nga ngulla na pwaye. Se nak kutu mongo srusra kom oru ingan.” (Pa ingan sripa se oru pangpang inel Edom.‡ Edom: fahkyen ine se inge oana fahkyen “srusra” in kas Hebrew.)
31 Jacob el topkol ac fahk, “Nga ac kite kom kom fin ase nu sik wal lun wounse lom.”
32 Esau el fahk, “Kwal aok. Nga akura misa — mwe mea wal sac nu sik?”
33 Ac Jacob el fahk, “Fulahk nu sik lah kom ac se nu sik wal lom an.”
Esau el fulahk ac kitala wal lal nu sel Jacob. Heb 12:16 34 Na Jacob el sang kutu bread ac kutu sup uh nal. El mongoi tari na el tuyak som. Pa na ingan luman pilesreyen wal se lal Esau ah sel.