Salmo
Maipanggep Sin Libro Ay Nay
Din Salmo et siya da di kankanta ya karkararag di ipogaw Diyos. Insolat di nadomadoma ay ipogaw sin oneg di pigay gasot ay tawen, ngem di kaad-adoan et naisolat da sin timpon da David en Solomon. Pag dan maolnong ta osalen di Israelita sin pandayawan da.
Ad-adoy kalasin di salmo. Waday kankanta ay pangdayaw ya pan-iyaman en Diyos, waday pamagbaga, wada abey kararag di ipogaw ay man-adawag, manriri, manpakombaba, mankedaw si tolong ya mankedaw si panosaan Diyos sin kaibaw da. Di odom et kararag di esa ay ipogaw, di odom et kararag di am-in ay Israelita.
Nalaka ay makirikna tako sin nangisolat sin Salmo, tan inbalikas da din tet-ewa ay wadas nemnem da: din naimposoan ay talek ya namnama da ya palalo ay ragsak da, ya siya abe sin bonget, dandanag, sakit di nemnem ya nadismayaan da.
Inosal Jesus din Salmo sin nan-it-itdoana, ya siya abe ay inosal din nangisolat sin Baro ay Tolag. Peteg ay nabanol din Salmo sin biyag di mamati en Cristo manipod sin damo.
Salmo 1
1
Din Ipogaw Ay Tet-ewa Ay Nagasat
1 Nagasat di ipogaw ay kaman nina di ogali na:
din pamagbagan di lawa ay ipogaw et sigaana
yan adi na tadonen din kabibiyag da.
Adi aben makikadkadwa en daida,
tan si Diyos di laslasoyen da.
2 Mo adi et din kalin Diyos di ad-adalena,
tan siya na di panragragsakana.
Inagew ya linabi et nemnemnemena
et kanayon ay say on-onodana.
3 Isonga amin di sino ay amagena
et mayat di pantongpalana.
Magmagabay ay kaiw di kaiarigana,
sin benget di ginawang et say kad-ana.
Adi mangmango di tobo na
et manlames sin timpo na.
4 Ngem din managbasol et baken kaman nina,
kaman teg-ap ay itayaw di dagem di kaiisoan da.
5 Tan sin agew ay pangokoman Diyos en daida,
iwed polos di ipambal da.
Keddengan Diyos dadi ay madosa,
ikasina sin gimong di nalinteg ay ipogaw na.
6 Tan din nalinteg et ay-ayowanan Diyos si daida,
ngem din managbasol pay et maiturong das dosa.