1 A kum aposel ma det ra det tar tistisino una nurnur ra det kis tiro Judia, det longoro i lena a taro kai ra ausur a taro Juda det sa nurnur una wasiso anun o God. 2 Ra o Pita i wan usapat o Jerusalem, a taro ra det nemi sur a kum tene nurnur rop din tok talilis a pinindet, det bori, uni i sa kutus a warkurai anun a taro Juda. 3 Det watungi tano lena, “U pam a utna ra i tabu torom dat a taro Juda, ra u ruk torom a taro ra ka di tok talilis a pinindet, ma u wangon tomo nam det.”

4 Ra o Pita i wasiso talapor torom det una kum utna rop ra i wanpat lena, 5 “A kis tiro una tamon Jopa, ra a wararing, a tama ara tamtama. A tama ara utna i elar namin tarai na malu ra di pam pas a wat na kukurino ma di ukete pirso i tagisapat una langit torom iau. 6 Ra a tamtama tiro ubalano, a tama a kum wewegua, det ra di ser ugu det ma a kum lomlomino, ma det ra det kaukawar, ma a kum piko kai. 7 Ra a longoro in nalngan ara i watungi tang lena, ‘Pita, un tur, un um doko det ma un nan det.’ 8 Ra a watungi lena, ‘Labino, ke sot sur an nani. Ka wan tar tu utna ut ra i dur umatam, ra i tabu torom met a taro Juda.’ 9 Ra in nalngan ara tagisapat una langit i watung meleti lena, ‘A utna ra o God i sa utalapor tari, gong u watungi lena i dur.’ 10 A utna ri di pami elar nama tulu dino, ra numur di dat toto melet pasi usapat una langit.

11 “Una du bung ut ra, a tulu musano ra di tulu ru detul tagitong o Sisaria torom iau, detul wanpat una rumu ra met kis uni. 12 Ra a Tokodos na Nion i inanos iau sur an nan tomo nam detul, ma gong a nuknuk larlar uni. Ma a wonom na musano kai ri, ra met tar tistisino una nurnur met wan tomo nam detul utong o Sisaria ra met ruk una rumu anun a musano ra i itula sur iau. 13 Ra i inanos met lena, i tama tar a ensel i wanpat una nun a rumu ma i watungi lena, ‘Un itula utong o Jopa sur din ben pas o Saimon, ara risano kai o Pita. 14 In inanos ui un lako kum wasiso ra in ulaun ui tomo nam det rop ra det kis una num a rumu.’ 15 Ra a turpas a wasiso, a Tokodos na Nion i kis un det, elar nami ra i pami un dat numugu. 16 Ra a nuk pas a wasiso anun a Labino, ra i watungi lena, ‘O Jon i baptaiso nama danim, ikut numur din baptaiso mot nama Tokodos na Nion.’ 17 O God i sa pitar tar a Tokodos na Nion lar a etabor tandet, elar nami ra i sa pitar tari tandat, ra dat nurnur una Labino, o Iesu Karisito. Ra osi na ngas na musano iau, sur an turbat o God?”

18 Ra det longoro a wasiso ri, ka det wasiso melet mo, ma det watung ulabo pas o God lena, “O God i sa pam tar a kisapi sur det kai ra ausur a taro Juda, det in nukpukus ma det in laun.”

19 A taro na nurnur ra det wan sarara tagisapat o Jerusalem, uni di banlaulau det numur tana minat in o Stiwen, det wan bakbak utong o Saipras, ma una papor Ponisia, ma a tamon Antiok. Det wasiso torom a taro Juda kut nama Wakak na Wasiso un o Iesu. 20 Ikut ara taro tagun a taro na nurnur ra, a taro Saipras ma a taro Sairini, det wan utong o Antiok, ra det wasiso torom a taro ra ausur a taro Juda kai, nama Wakak na Wasiso una Labino o Iesu. 21 A dekdek ina Labino i kis un det ra det wasiso, ma a susut na taro doko det nurnur ma det tupukus torom a Labino.

22 A taro na lotu sapat o Jerusalem det longoro a wasiso un asau ra i wanpat, ra det tulu ru o Banabas utong o Antiok. 23-24 O Banabas i ara wakak na musano, i bukus nama Tokodos na Nion ma a nurnur. Ra i wanpat, i tama asau ra a marmaris anun o God i pami una nundet a nilaun, ra i gas doko. Ra i udekdek det rop sur det in tur dekdek mulus nama nurnur torom a Labino una nundet a nilaun rop. Ra a susut na taro det tupukus torom a Labino.

25 Numur o Banabas i wan bulung utong o Tasus, sur in sisio sur o Sol. 26 Ra i sa sio pasi, i ben pasi utong o Antiok. Ara kudulano kilalo der kis tomo nama taro na lotu tiro iai, ma der ususer a susut na taro doko. A rising “a taro anun o Karisito”, di watung mugu i una taro na ususer tong o Antiok.

27 Una kilalo ra, a ramano kum poropet det wan tagisapat o Jerusalem utong o Antiok. 28 Ara tagun det, a risano o Agabus, i tur, ra i wasiso nama dekdek ina Tokodos na Nion. I wasiso mugu taru una labino munurak ra in nanpat una rakrakon bual rop ra i kis utuntudu ina warkurai anun a taro Rom. A munurak ri i wanpat una kilalo ra o Klodius i warkurai. 29 Ra a taro na ususer det kubus pasi sur det in etabor torom a taro na nurnur ra det kis una papor Judia. Det rop taktakai det in etabor nam asau ra i sot sur det in etabor nami, elar nam asau ra det utur ukai i. 30 Det woro tomo tar a mani, ra o Banabas ma o Sol der losi torom a kum mugumugu tagun a taro na lotu sapat o Jerusalem.