1 Ara bung o Pita ma o Jon der wan usapat una rumu na etabor, una du bung na niaring, una tulu pakano bung una lirop. 2 A taro det los tar ara musano ra ke ser wan, di usus pasi lenutra. Ma una kum bungbung rop, det ser ukis tari nisan a matansako ina in noworo ina rumu na etabor, di watungi nama Wakak na Matansako, sur in sarsaring utna gusun det ra det ser ruk. 3 I tama pas o Pita ma o Jon ra der ling na ruk, ra i saring der sur lako mani. 4 Der tamtama tokodos toromi, ra o Pita i watungi lena, “Un tama mir!” 5 I tarom torom der, ma i kis langlang sur tu utna tander.

6 Ra o Pita i watungi lena, “Iau katu mani, ikut uniri an tabor ui nama utna ra anung. Una risan o Iesu Karisito, a te Nasaret, un tur ma un nan!” 7 O Pita i pam a sot na lamano, ma i ukatutur pasi. Uniutra aru kikino i dekdek mut. 8 Ra i katutur lakit mut, ma i wanan maragom. Detul ruk una rumu na etabor, ra i wan, ma i sirsirok ra i watung ulabo pas o God. 9 A taro rop det tama i lena i wanan, ma i watung ulabo pas o God, 10 ra det kisin doko una utna ri di pami uni, ra det tasmani lena i kut ra i kiskis, ma i sarsaring utna nisan a Wakak na Matansako. 11 A musano ri i pam ukai pas o Pita ma o Jon, ra a taro rop det kisin doko ma det kalabor torom detul una parada ina rumu na etabor, ra di watungi nama Parada anun o Solomon.

12 O Pita i tama det, ra i watungi tandet lena, “Mot a taro Israel, ilai ra mot kisin una utna ri ra mot tama dekdek mir? Pepetlai, mot nuki lena mir ulangolango pas a musano ri nama dekdekimir ut, o uni mir tokodos umatan o God? Awu! 13 O God ut i pami. A God anun o Abaram ma o Aisak ma o Jekop, a God anun a kum tumtubundat tagun numugu, i ulabo tar a risan o Iesu anun a tultul. Mot pitar tari sur din um doko i, ma mot ipul ru i kut umatan o Pailat, ra i nem na palos ru i. 14 Mot ipul ru i, ra a Tasur na Musano ma a Tene Tokodos, ra mot sasaring sur din palos tar a tene umum doko a taro torom mot. 15 Ra mot um doko ru o Iesu, i ra a kibin a nilaun, ikut o God i ukatutur melet pasi gusun a minat. Ma met, met tama i ma met wasiso talapor uni. 16 Una nurnur una risan o Iesu, di ulangolango pas a musano ri, ra mot tama i ma mot tasmani. A nurnur una risan o Iesu i ulangolango pas a musano ri umatam mot rop.

17 “A kum tistising, a tasmani lena, mot tomo nam anumot a kum mugumugu kai mot pam orosi kut a utna ri un o Iesu, ka mot tasman asau ra mot pami. 18 Ikut una kum utna ri mot pami, o God i pam sot pas a kum utna ra i sa watung mugu tari nama wasiso anun a kum poropet rop, lena anun a Karisito in mat. 19 Mot in nukpukus, ma mot in nan torom o God, sur in unus ru anumot a kum sakino petutna, 20 sur mot in taramo a wakak na nilaun ra a Labino in pitari. Ma in tulu ru a Karisito torom mot, o Iesu i ra o God i sa pilok pasi. 21 In kis sapat netes una langit, tuk una bung ra o God in umatok melet a kum utna rop, ra i sa watung tari numugu utmakai nama wasiso anun a kum tokodos na poropet anunu. 22 Uni o Moses i watungi lena, ‘A Labino anumot a God, in tulu ru tu poropet elar nam iau torom mot, tagun anumot a taro ut. Mot in longoro a kum utna rop ra in watungi tamot. 23 Ma osi det ra ka det longoro a poropet ra, din um doko ru det, ra au mo sur det a taro anun o God.’ Lo 18:15, 18-19

24 “A kum poropet rop, ra det wasiso puaso una wasiso anun o God, turpasi un o Samuel, ma det ra det wanpat numur tano, det wasiso mugu una kum bungbung ri. 25 A wasiso anun a kum poropet, anumot, ma a kunubus kai, ra o God i uliliman tari torom a kum tumtubumot tagun numugu. I watungi torom o Abaram lena, ‘Un o tubum an udan a kum kamkabo taro rop una rakrakon bual.’ Stat 22:18