A Manru na Pas
anun
o Jon
A wasiso talapor mugu
A pas ri o Jon i tumusi. I tumusi torom ara ino, ikut a susut na tene mananos det nuki lena a ino ma a kum nutnutunu a wasiso elelar una lotu ma a kum tene nurnur.
Una pas ri, i inanos det lena, det in nem etetalai det, ra det in tamtamabat det gusun a kum torotoro na tene ususer.
A inawan ina Manru na Pas anun o Jon:
A turturkibin ina buk ri (1-3)
A marmaris (4-6)
A utumarong una kum tene torotoro (7-11)
A tintinip na wasiso (12-13)
1
1 Iau o Jon, ara mugumugu, a tumtumus torom ui, a ino ra o God i sa pilok pas ui, tomo nama kum nutnutum, ra a nem mulus mot. Ausur iau kut, met rop kai ra met tasman a lingmulus met nem mot. 2 Met nem mot kibino una lingmulus ra kuri un dat, ma in kis tukum un dat.
3 A marmaris, a wakak na petutna ma a malmal tan o God a Tamandat ra o Iesu Karisito a Nutunu, in kis torom dat ra dat kis una lingmulus ma dat nem etetalai dat.
Dat in nem etetalai dat
4 A gas doko ra a longoro i lena, a ramano kum nutnutum det mur a lingmulus, elar nama warkurai a Tamandat i sa pitar tari torom dat. 5 Uniri a saring ui, a ino, sur dat in nem etetalai dat. Ausur a tumus tu matok na warkurai torom ui, awu. A warkurai kut ra dat sa longoro tari tagun numugu. 6 Ra dat nem ara taro dat in ese i lenri: Dat in mur a kum warkurai anun o God. Anun a warkurai, ra numugu mot sa longoro tari i lenri, mot in mur a petutna na marmaris.
Mot in tumarong mot gusun a kum tene torotoro
7 A susut na tene torotoro det sa wan sarara nin una rakrakon bual. Det ipul kut lena, o Iesu Karisito ausur i wanpat a musano mulus. A ngas na musano ra, i a tene torotoro, ma a ebar anun o Karisito. 8 Mot in tumarong mot sur gong mot ubek ru asau ra mot sa dekdek pasi. Mot in tur dekdek sur mot in los pas anumot a kudulano ikul. 9 Osi ra i wan gisen pas gusun a kum etowo anun o Karisito ma ke muri, o God ausur kura uni. Ikut osi ra i mur a kum etowo ri, a Tamandat ma o Nutunu kura der uni. 10 Ra taio in nan torom mot nam tu ngas na etowo gisen, gong mot gas pasi ma gong mot ben ruki una numot a kum rumu. 11 Osi ra i gas pasi, i ara pasano una nun a kum sakino pinapam.
A ururop na wasiso
12 A susut na utna ra an tumusi torom mot, ikut ka nemi sur an tumtumus una dono buk namin nepen. A nuki sur an nan ut torom mot, ma an wasiso torom mot, sur anundat a gasgas in bukus.
13 A kum nutnutun a tisimino, ra o God i sa pilok pasi, det pitar anundet a marmaris torom ui.