Buka ema bedewe gagalo uara wamode, gagalo ema God apanawa wampudewantopua umanawa wade. Warere Solomon gagalo ema uara girumamon, tane apana isiwa do gagalo ema girumanton. Gagalo isiwa apana ebowa Agui girumamon (30.1 ewana) ita isiwa warere Lemuel girumamon (31.1 ewana).

Waeuwa debamawa buka ema bedewe winedia ipa, aten insaisawa euwa uduudu sa ipa amona God mampee iede ita insadewasa apanawa God bauta atensapu. Aten insaisawa debama walama uduudu wanwanimba bedewe saunede, dumba ita bolamba bedewe, gabemani nolawa bedewe ita do nola uduudu bedewe. Giruma ema waeuwa bedewe no waeuwanede no apana inainamba ambi segantepona, eueuwamba dodomana dewasaipona, mai asowawantipona, badowa nolantipona ita apana mida dima abolawantoia mampo euda dewasaipona.