61
Iawe God apanawa nuaparelala gagalou wade
Iawe God nolawa dewalala sonabala wadiase,
1 “Warere Iawe God aleupa ne osonawosan,
me ne sonabanene mena* Apana osowe mena memeia sa ipa apana sa nola debama wadena dewasapia eueuwa. Mo dewa sa warere ita pirisi mampo dewasai. osonawo memen
Gagalo euda abolala mampo amonanteapo etapua baiwa,
me ne waaubanea apana nuau kerola inamopaa baiwa,
me ne waaubaneno winena apana tautaula dibura bedewe waimoia
benemamopo dibura epue inantopu,
mo mida diburantone dubawa bedewe waimoia lotoaubamopo inantopu.✡ Matiu 11.5; Luk 7.22
2 Me ne waaubanena apana diamope wapase,
‘Iawe God e inalepia walamawa tauma wisen,
walama ema bedewe me emalawoa uduudu sipoamopie matangelamopi.’✡ Luk 4.18,19
Me ne waaubanena apana ke waie nuaparentoia nuadubumopaa baiwa.✡ Matiu 5.4
3 Me ne waaubanena apana Ierusalem bedewe nuapareidantoie waimoia saumopaa baiwa,
mo nuaparentoie isana toie† Mo isana osouwo teia sa ipa mo nitu da nuaparewantoia eueuwa dewasai. waimoia eumope ita bena uwatauwa eudida uwauwo ampa.
Mo nuaeubu eueuwa mena wadapue uwau lausintopu ita ke waia epu,
wadapos gagalowa mo moapo winakasalempo wampe os waimompa, ita nuapareu dialepi.
Mo dewau eudidalepio badowa enapu ia eudida bonoia badowa enedie inileidia rua,
ia sa eubu Iawe God meba aimona me euwawa ita mukawa apana euwamopio ewapua baiwa.
6 Apana ando e umanala wapue wapuase,
‘E ipa Iawe God pirisiwa’
do wapuase, ‘E ipa Iawe God nolawa dewalala.
E ando tawo osowe uwa daitada apanawa mampo nitu eubu otamona,
ita apana sa asiasi e mauraitane asowawaitana.”
Iawe God wadiase,
8 “Ne dodomana dewawa dewasampaa nuawadawadasadina,
poi ita dewa kadiu ne dabuaidanede.
Ne apanana poka eteia baiwa uneu euda wanamopa,
ne apanana mampo sauana badowa wape ita wadapaitudepio winakasalepi.
9 Uwa daitada apanawa tawo osowe wanwanlala ne apanana ita mo nosinosiu do atenmopue ita wiwirauntopu,
mo ewamopue wapuase,
‘Ulaipa, Iawe God apana ema osouwo sau euda itun!”
Israel wadiase,
10 “Iawe God nuaeuwantedina
ita do ne Godna dewa euda mainawo dewasana baiwa nueuidantedina.
Me ne inanen ita dewaneno dodomananten me meba rua,
ina ita dewa dodomana sa ipa ne garana rua;
me ne benanena ewaewawa ipa apana mida nainai baiwaleidie nainai garawa eubuida taumodia rua,
me ne benanena ewaewawa i nainai baiwaleidie beran inoleidie benaleidia rua.✡ Gagalo 21.2
11 Dogo bedewe nitu daitada inintoie wimoia rua,
irai bedewe lawuru daitada inintopue wimopu,
Epe rua deawaa, Warere Iawe God apana uduudu tawo osowe wanwanla dewamopio me wadaposisapu,
me dewawa dodomana tawo uduudu apanawa mampo sabamosapi.”