90
Apana ando diantopu tane Iawe God ipa wanwankasalala
God nolawa dewalala Moses sasa ema girumalen.
1 Tatamba, e ipa walama uduudu no wanwanimba bolawa.
2 E ipa wanwankasalalaida
muriwa wadi dewamoana
do muriwa tawo uduudu dewamoana.
3 E apana diamoe waanase,
“E leuitane popokau wanaitana!”
Mo popokau mampe seganton,
tane e leumoano popokau wananton.
4 E emaawo ena 1,000 ipa walama dea rua,✡ 2 Pita 3.8
ena sa ipa tadina omowa kampaida rua.
5 E apana inawau tauwadea os wadeiaubeiana
auen ewawo nuaa tauwadea awawalepia rua.
Mo ipa beran tadinaida kelontoia rua.
6 Tadinaida beran kelowa ewaewau eubu,
tane rawiwa mo rorontoie nonosintoi.
7 E nuakadia debama no kadinede
e nuaa no mainimbo kadileidia walamawe e saaidantitana.
8 No kadimba uduudu e eweiana,
no weregasaitana, tane e sabamo eweiana.
9 No wainitano e nuaa kadileide;
apana nonaupa itumpaiompa rua
e no wanwanimba tauwadea os kampasaana.
10 No wantaa enawa ipa 70,
tane apana isiwa mukantopua wampuo enau 80 wadepi;
no wainite sai uara donsaitana,
mai wainipono daumaleipona ita bontitana.
11 Mai mida e nuakadia pokawaaida atenleipona,
naita e nuakadia no atendewantepono,
e saaidantepona.
12 No wanwanimba walamawa kampaida winedia waeuwanewo atentate,
ita insadewasa bedewe wainenta.
13 Iawe God, insaisaa leusae nuaparembaitaa!
Mai kaino nuaa kadilempa no mainimbo!
14 Tadinaida uduudu euwanena
e nuawadawadaa no baimba ipa winakasalala,
ita no walama uduudu nuaeu mampe
sasantonte wainenta.
15 E sai debama ena uara bedewe nenaana,
tane tauma deawaa dewasae
walama dauma bedewe nuaeu nenona!
Poka eteitana wadaaubea,
ita wanwan euda ena uara bedewe wanta.
16 No ipa e nolaa dewalala,
e dewaa pokawaa euwanea,
no obainimba euwamoa e ipa,
mukamukaua ita debamawaida wainiana.
17 Tatamba e ipa no Godimba,
sau euda osombo itua,
no nolamba dewasawo eulepie ipuipua segalepi,
oa, e no nolamba dewasawo eulepie ipuipua segalepi.