12
Natan Dawid gagalosade ita Dawid insaisawa leusade
1 Sa baiwa Iawe God Natan wanaubeno Dawid mampe alene✡ Sam 51 diene wanase, “Apana nata bola debama bedewe waimoie, apana dea ipa maura apana tane da ipa abolala. 2 Tane maura apana mampe ipa pue sipsip ita kau uaraia. 3 Apana abolala sipsip iwoa sanaa wadene wisena debamalene ita apana sa obampa do awodea waimoie. Tane sipsip iwoa sanaa dea os apana abolala mampe wandie ita apana sa abolala nanawa moa kerauda nadie, ita do me reduwa bedewe esa memedio nadie, itu baiwa apana sa abupa osowe ituleidie. Ita me dewasadia ewaewa anoopa kerauda rua. 4 Tauma ware dea leidie wisen maura apana duwe ita maura apanawa mai menasapona meba sipsipwa ba kau wadepie ware wanepio napi, dia. Tane maura apanawa alene apana abolala mampe sipsipwa iwoa wadene nulene warewa wisena wanen.”
5 Tane walama sawo Dawid nuawa kadiidalen apana sa dudunawa etene ita Natan mampe wanase, “Ulaipaida, Iawe God wanwankasalala ita me ebowe ne wadina apana sa dewa ema dewasana me bolepio dialepi. 6 Me dewa kadiwa dewasan mai sowa nuaparewalepona. Sa baiwa me ideita sipsip sanaa sipoa uduudu 4 otamopie apana abolala wanepi.”
7 Tane Natan Dawid mampe wanase, “Apana ipa e! Iawe Israelwa Godiu ema epe wan,
‘Ne e sonabaeno Israelwa warereu segaiten. Sol e boepia mukawa bedewe wainiano ne inaena. 8 Ne Sol mida oniaedia apanawa duwa ita me manamanainapa eneena. Ita do ne e ituedina Israel ita Iuda bolawa oniea. Tane naita nitu ema uduudu e ewamono manawo keraulepia, ne ando osowe debamasape itupa. 9 Tane e dima baiwa ne aiana mai ruaitapona? E dima baiwa dewa ema kadiwaida dewasaana? E Uria Itai apanawa ona isima mampe bosaana ita me manainapa wadee manawosae manainaa wanasaana. E Amon apanawa onau isimawa mampe bosaana. 10 E mai ne aiana ruaitapona, e Uria manainapa wadee ebaa wanasaana, e dewa ema dewasana baiwa e dana bedeuwo apana isiwa epaboiamompa.’
11 Ita Iawe God ema epe wade,
‘Ne kerauda os bagora wadape wimpe e dana mampo itupa. E nananepe emaawo ewono ne e manamanainaa otepe mida tanawoaida wanapo do ituntopuo ita apana uduudu ewapu. 12 E dewa ema werego dewasaana mai apana atentopona tane ne dewa ema sabamo walamo dewasapa ita Israel apanau uduudu emawo ewapu.’ ”
13 Ita Dawid Natan mampe wanase, “Ne Iawe God mampe kadiwaida dewasana.”
Ita Natan Dawid diene wanase, “Oa, e kadiwa dewasaana, tane Iawe God e kadia insendabuasan, e mai boitaa. 14 Tane e Iawe God sawasiaitene dewa kadiwaida dewasaana. Sa baiwa e otoa bolepi.”
15 Ita Natan leulene duwa bedewe aleno aupe Iawe God oto kero waneno pokaida eten. Oto sa Uria manainapa Dawid busano gamolena. 16 Tane walama sawo Dawid God mampe rauparilen oto baiwa, Dawid odene alene ituwa bolawe nana ene idilene rauparilen ita tadina sa dauma me dogo osowe ituleidio walamalen. 17 Apana eiau Dawid duwa bedewe me tampe eneia menamodia me dogo osowe ituleidia sausapuo enepiwisepi, tane me mai menasapona ita do nana mo do napona dabualen.
18 Walama 7 dialeno aupe oto bolen. Dawid nolawa dewalala oto bolena umanawa wapona santon. Ita mo waienase, “Oto wandia walamawe me mampe no gagalontitano mai etaneipe, dia. Tauma oto bolena umanawa ambi wate diata? Meba kadi donsapio!”
19 Dawid nolawa dewalala awodea mamo gagalontoio ewamone atenlen oto bolen. Sa baiwa Dawid waitaralene wanase, “Oto bolen, ba?”
Mo sipoasane waienase, “Oa, oto bolen.”
20 Dawid epe etene dogo osowe ituleidia enenwisene alene duadilen, mena bonabonaua etepe itune ita gara eubu taumon. Ita ene Iawe God duwa bedewe wadaposilepia baiwa alen. Ema aupe meba duwe alene nolawa dewalala diamono nana wadane wimone waneieno nan.
21 Nola dewalala Dawid diane waienase, “E ambi epe dewaitiana? Oto inawaa wandia walamawe nana iditie ita ke waie. Tane oto boleno aupe e enaawiene nana naiana!”
22 Dawid wanase, “Oto inawaa wandia walamawe insenase, ‘Naita Iawe God ne nuaparenalepie oto inasapio wampi, sa baiwa nana idintedine ita ke wadine.’ 23 Tane tauma oto bolen. Dima baiwa ne nana idinteapa? Ne mai oto leusapo wisepia rua, dia. Ne ando me mampe anteapa. Tane me ne mainawo mai wimpia rua, dia.”
24 Dawid manainapa Besiba wasausane ita mampe alene nata itunton. Besiba bulene oto mona gamosan ita Dawid oto ebowa ituna Solomon. Iawe God Solomon nuawadawadasan. 25 Ita Iawe God peroweta Natan wanauben Dawid diepio oto ebowa itupi wapiase Iedidaia.* Ebo Iedidaia Ibru aiawe ipawaida ipa Iawe God me nuawadawadasade.