1 Timoti, apana tontawa mai aiaa badowa mampe diaa, tane aia obasa mampe wasausaa, ewaewawa abo e mamaaida rua. Apana sanaau mampo dewaitaa ewaewawa abo e wanwanaida ruau.

2 I tontawa mampe dewaitaa ewaewawa abo e inaaida rua. Ita ioto sanaau mampo dewasaa ewaewawa abo e weaweanaaida ruau, ita mai insakadisamoa.

3 Obuobu mo mai mida oniamoipona wiwira mampe ewadewasamona. 4 Tane naita obu obampa ba atatawa do waimompa, me atatawa ba obampa ideita sumanaibu eueuwa osowe itumpe nolau dewasampe muba dubu bedewe waimoia oniadewasamompa. Inta ema bedewe mo gombau ita atatau euwa mampe sipoamoi. Dewa ema ipa God insaisawa rua. 5 Obu nuaparelala mai mida onieipona me insaisawa uduudu God bedewe itune tadina ita walama me mampe rauparileidie iririleide. 6 Tane obu mida ete ewanuauwaleidia ewaewawa inawaa wande, tane me apa bobopa.

7 Timoti, sau gagalowa ema obuobu ita mida duwo waimoia do diamowo etapu, ita mai mida mo bedeuwo kadi wawuwa donsapi. 8 Tane apana mida me duwe waimoia apanawa ita do me baidasosowa isiwa mai oniadewasamoipona, me sumanaiwa ene lagawa wan. Ema bedewe me sumanaisiawaia apanawa kadiu ainboe kadiwaida dewasade.

9 Mai obu da ekelesia mampo sau wadompaa baiwa ebou winedia bedewe itua. Tane obuobu enau 60 ainbolena, tane badawa do dodomana waimoiena, mo os ebou itua. 10 Obu dewawa euda mampe apana atensaiena baiwa ebowa itua. Sa ipa obu mida me obampa oniadewasamone odena, apana banlamodio duwe odeia, me meba ituaisilene sumanai sosowa wau mitamona, apana nuaparelala saumona ita nuawa uduudu mampe dewa eubu dodomanau dewamona, me os sau wadompaa baiwa ebowa girumaitaa.

11 Tane obuobu sanaa ebou mai itua, dia. Ipawa mo muba etepu insaisawa mampo wisedio nainai menamodio baiwa Keriso nolawa insaisawa ei. 12 Epe dewantoie mo dima Keriso mampe sauawantoiena ampuiasai ita ema baiwa mo ando kotuntopu. 13 Do mo di wankoantompe du deadea bedewainta waimompe leumpe omo diasampaa dewawa atentoi. Tane mai sa os, do mo kutun wawalala segantopu, apana mampo mo insaisau daitada gagalowa wampa, ba gagalo rebareba di warebasantompe leumpa. 14 Ema epe segalepia sawa ne menanedia obu sanaau nainaintopue seda gamomopu ita muba dubu oniepu. Mo epe dewantopua no sumanailala emalawoamba mai intawa da donsapie no wawunepi. 15 Ne gagalona ema wadina, ipawa obu isiwa aitamana inta euda dodomana ene Seitan wawentoiena.

16 I sumanaila duwa bedewe obuobu waimoia, sa ipa me witape oniamompa ita ekelesia mai sai sa wadapu. Tane ekelesia mo ipa obuobu nuaparelala os ewamompe saumompa.

17 Mo mida Gagalo euda amonantoia, God aiawa waeuwantoia apanawa ita ekelesia onionialala isiwa do mo mida nolau euda dewasaia ideita uneu natamompe wadompa. 18  ✡ Matiu 10.10; Luk 10.7No ema atenten, ipawa buka bedewe girumalena ema epe wadi wadiase,

21 Keriso Iesu, God ita me enseliwa kakaibu danauwo ne badowa dieedina dima ne girumantena ewee ruawaitaa. Ekelesia oniamoia bedeuwo mai mida e soaida insee baiwa kadiwa wawuwa kerausae, tane soa da diapana me kadiwa wawuwa debamasaa, dia. Tane uduudu dewamoa ipa ewaewa deawaa.

22  Mai diniwaite tauwadea apana da osowe witaa itua ekelesia nolawa wadepia baiwa. Naita epe dewaitawo apana sa nolakadilepia e do me dewawa kadiwa sa bedeweiten. Tane e eba kakaiwaida euda os wanempa.

23 Timoti, e kero kainokaino wadempo bua kadilepia sawa mai esaida os nana, tane walama isiwa wain kerauda do nana.

24 Apana isiwa kadiu ipa sabamo ita tauwadea os banlamodio kotuntoi. Tane apana isiwa kadiu ipa werego winamoi, ando sabamontopu. 25 Deawaa dewa eubu isiwa sabamo ewamoa. Ita dewa eubu isiwa mai sabamo winamoipona, tane e mai weregamoa rua, dia. Sa baiwa mai diniwaite apana ekelesia nolawa wadepia baiwa me osowe witaa itua, dia.