2
Ana raupariwa
1 Ita Ana rauparileidie wanase,
“Ne Iawe God mampe nuaeuntedina,
me ne muka neen.
Ne nuaparentedino me sauneno tauma ne nuaeuntedina.
Sa baiwa ne tauma emalawoana apanau wasiu wapa rua.
2 O Iawe God, mai mida da kakaiwa e ruaa wainipona, diaida,
ita mai god da wainipona, dia.
Tane mai onionia apanawa
da no Godimba e ruaa wainipona, dia.
3 Ne dieedina eba ituposia gagalowa wawa ea,
e eba asowawaa gagalou wawa eidasaa.
Ipawa Iawe God dewa ududuu me atemba os.
Ita ando me mampe e dewaa uduudu dewamoiana baiwa kotuepi.
4 Iawe God, ona apanau eu e ampuiaiten,
tane e apana oauara muka wanamoiana.
5 Tane apana nana maurantoie naio pokamodio waimoia
mo tauma nana baiwa nolantopu,
tane mo mida omana tomodia
tauma nana mauraleidio naie waimoi,
ita i aipoiwa tauma obampa uduudu 7 gamomon.
Tane i obampa uara gamomona
tauma meba osi wande.
6 Iawe God, e dewasaiano apana boleide,
ita e apana inaida wanamoiana,
e apana bo nagawa bedewe teamoana,
ita e apana dewamoiano bo bedewe eneiwimoi.
7 Iawe God, e apana dewamoiano puraiwa abolawantoi,
ita apana isiwa dewamoiano maurantoi,
ita isiwa ituaisimoiano ebousiawaia segantoi,
ita apana isiwa dewamoiano ebou debamaleide.
8 Ita e apana nuaparelala popokau aimodio bedewe waimoia,
ita do apana nana abolaantoie se naie waimoia
teinaposimoe manawomowo,
ita apana eboeboua do teamowo bola eubu oso wampu.
Ita tawo ema uduudu ipa Iawe God dewasaana e manawoa,
ita e nitu uduudu intaweintawe teamoano winei.
9 Ita mo mida insaisau e bedeawo ituia oniadewasamoiana,
tane kadi apanawa bontopue sala iwimpa bedewe antopue dainantopu.
Ita apana muba mukau mampe
mai dima da dewasapuo segalepia rua, dia.
10 Ita e emalawoa apana ando kadimoatuapi,
e nuakadia iepia moinawa uma rua.
Ita e ando tawo uduudu kotusaa.
Ita ando e warerea muka wanaa,
tane do sonabeana apanawa
dewasawo mukawaida segalepi.”✡ Luk 1.46-55
11 Ema aupe Elikana apanawa do oto ene ita leutone bola debama Rama bedewe anton. Samuel bola debama Silo bedewe wandie Iawe God nolawa dewasadie ita me ualeidia apanawa ipa Eli, me ipa pirisi.
Samuel debamaleidia walamawe me Eli sausane Iawe God duwa rialala bedewe nolaleidie. Iawe God ita apana emauwo Samuel ipa oto eudida. Tane Eli obampa nata mo ipa pirisi tane dewau kadiwaida. Sa baiwa Iawe God peroweta dea wanauben Eli mampe alen benemasapia baiwa, ipawa me mai obampa nata kadi dewasaia walamawe gagalomope anaanamopona, dia. Iawe God mo natamopie walama dea bedewe bomopi. Ema aupe Eli nosinosiwa mai da gulauntompe bontompa, dia, tane apana sanaa bontompa.