1 Iza'o rama'a zupama azeri fatgoma hanaza kema ontahino eritrenimo'a, ame huno havizantafa hanige'za, azeri fatgo hugara osugahaze. 2 Fatgo vahe'mo'zama kvama manizage'za, mika vahe'mo'za muse nehaze. Hianagi kefo vahe'mo'zama kegvama hazage'za, zamarimpa kna nehu'za, kragi neraze. 3 Ama' antahizama avesintea ne'mofo nefa'a muse nehie. Hianagi savri a'enema tagroteno nemanimo'a, fenoma'a atre vganere. 4 Fatgo avu'ava ene kini ne'mofo kumamo'a, oti hanavetigahie. Hianagi masavema ami kazigatima ami'naza zagoma eri nemo'a, kuma'amofona eri haviza hugahie. 5 Tava'o zamirema maninesia vahe'ma rezmatga hu'za masave kema huzmantaza zamo'a, zamagra'a kama nevazafi kuko anteankna nehaze. 6 Kefo vahe'mofona krifumo azeriankna huno kumimo'a azenerianagi, fatgo vahe'mo'za zgame hu'za muse nehaze. 7 Fatgo vahe'mo'za zamunte omne vahe'mofo nomni'zankura antahi nezamiza kegva hunezmantaze. Hianagi kefo vahe'mo'za, anara nosaze. 8 Vahe'ma huhavizama huzamante vahe'mo'za ra kumapi tevea taginteankna nehaze. Hianagi ama' antahizane vahe'mo'za, haframa hu'zana eri amane nehaze. 9 Ama' antahizane vahe'mo'ma neginagi vahe'ma keagarema avrentesiana, ana neginagi ne'mo'a, arimpa ahentege ana ke'arera kiza zokago ke nehanigeno znarimpa fruzana omanegosie. 10 Vahe'ma zamahe fri vahe'mo'za, hazenkezmi omane vahekura zamavesra hunezmantaze. Hianagi fatgo vahe'mo'za, hazenkezmi omane vahe'ma zamazeri so'ema hanaza zanku nentahize. 11 Neginagi vahe'mo'za zamarimpa he'zana azerirava nosazanagi, ama' antahizane vahe'mo'za, zamarimpa ahe'zana azerirava nehaze. 12 Kva ne'mo'ma havigemofoma amagema antesiana, mika eri'za vahe'amo'za haviza hugahaze. 13 Amunte omane vahe'ene, knama nezamiza vahe'enena, Ra Anumzamo'a ana taregamokiznima magozahu'zama, zanami'neana zanavuma ke'za zanamine. 14 Zmunte omne vahe'ma fatgo huno refakoma huzmantesia kini ne'mo'a, zaza kna kinia manino vugahie. 15 Mofavrema kanoma amino azeri fatgoma huzamo'a, ana mofavrea ama' antahiza amigahie. Hianagi kanoma amino azeri fatgo osu mofavremo'a, nererana agaze eri nemie. 16 Kefo zamavu'zmava'ene vahe'mo'za kvama manizageno'a, kefo avu'ava zamo'a ra huno marenerie. Hianagi fatgo vahe'mo'za manine'za nezamagesage'za evuramiza haviza hugahaze. 17 Mofavreka'a avumro antenka, azeri fatgoma hanankeno knare avu'avama hanigenka, karimpa fru nehina muse hugahane. 18 Ra Anumzamo'ma henkama fore'ma haniazanku'ma, eri ama huno kasnampa kema ozamasmisige'za, vahe'mo'za savri hu'za magoke kantera omanigosaze. Hianagi iza'o kasegema amage'ma antesimo'a, muse hugahie. 19 Kazokzo eri'za vahe'mofona kegera hunka azeri antefatgo osugahane. Na'ankure ana kea antahi ama hugahianagi, ana kemofona amagera anteno anazana osugahie. 20 Zamagesa ontahi ame'ama kema nehaza vahera nezamagano? E'i ana vahera neginagi zamavu'zamava'ma nehaza vahe'mo'za zmaza huzama erisaza kamo'a zmagetere'ne. 21 Osi'ma maninesigenka makazama hugnareke'ma hunte'nesana eriza ne'mo'a, henka'a kazeri haviza hugahie. 22 Arimpama ahe vahemo ha'ma hu'zana eri agafa nehie. Hagi ame huno rimpa ahe vahe'mo'a, rama'a kumi nehie. 23 Zamavufga eri antesga hu vahe'mo'za evuramigahaze. Hianagi zamavufgama anteramiza mani vahe'mo'za, ra zamagi erigahaze. 24 Kumzafa vahe'enema tragoteno manisimo'a, agra'a azeri haviza nehie. Keaga refakohu tratetima antahige'sankeno huamama hanige'za kana amigahaze. Hagi huamama osniana, Anumzamo'a azeri haviza hugahie. 25 Vahe'mofoma koroma huntesanana, kagra'a krifu anaginentane. Hianagi iza'o Ra Anumzamofonte'ma amentintima hanimofona, agu'vazinkeno knare huno manigahie. 26 Rama'a vahe'mo'za kva vahe zamimozama zamavesima zamantesaza zanku zmavu'zmavara nehazanagi, Ra Anumzamo refako huno nege. 27 Fatgo vahe'mo'za kefo vahekura zmavesra huza zmago atenezmantaze. Hianagi kefo vahe'mo'za, fatgo zmavuzmava'ene vahekura, zmavesra huza zamago'atenezmantaze.