1 Vahe'mo'ma knare kagi'ma kami'zamo'a, rama'a fenoma ante'zana agatere'ne. Hagi vahe'mo'ma kagrima kavesigante zamo'a, koline silvanena agatere'ne. 2 Feno vahe'ene amunte omane vahe'enena, Ra Anumzamo ana tarega vahera tro huzanantege'ne mani'na'e. 3 Ankere antahizane vahe'mo'a, hazenke zama ne'esigeno negeno maniganesigeno agateregahianagi, knare antahizama omane vahe'mo'a, hazenkema fore'ma nehanigeno'a, negeno nevuno ana hazenkezana erigahie. 4 Agra'a avufga anteramino nemanino, Ra Anumzamofonku'ma koro hunteno, agorga'ama mani'zamo'a, rama'a fenoza nentesankeno kagi'a husga nehanagenka, zaza kna manigahane. 5 Akrahe krahe avu'ava ene vahe'ma nevaza kampina, ave'ave zane vahe'ma azeri kukone me'ne. Hianagi iza'o agra'ama kegvama himo'a afete nemanie. 6 Mofavreka'a knare kantema vuza rempi humigeno knare kante nevuno, rama hanuno'a, ana avu'avara atreno rukrehe osino. 7 Feno vahe'mo'za zmunte omne vahera, kegva hunezamantaze. Hagi zgoma nofi'ma nehaza vahe'moza, zago'ama nofima haza ne'mofo kazokazo eri'za vahe nemanize. 8 Kefozama krinenimo'a, henka nezama'a hazenke'za kafigahie. Hagi vahe'ma zamazeri havizama nehia himamu'amo'a, vgaregahie. 9 Iza'o zamunte'ma omane nagama muse zampintima ne'zama amisia vahera, Ra Anumzamo'a asomu huzamantegahie. 10 Kehu haviza hu vahera zamahe anati atrenkeno, vahe'ma huhavizama hu'zane, ha'ma hu'zane, fragema hu'zana vgareno. 11 Agu'amo'ma agru nehanigeno, fru kema huzanku avenesisimo'a, kini ne'mofo rone'a manigahie. 12 Ra Anumzamo'a antahizama erizante avu'a anteno kegva nehianagi, hazenke vahe'mofo kea erinetre. 13 Feru vahe'mo'a amanage nehie, megi'a laioni mani'neankino, vanuana nahe frigahie huno nehie. 14 Savri a'mofo agipintima nea kemo'a, muri kankna hu'ne, izano Ra Anumzamo'ma arimpa hentesimo'a, ana muri kampi tamigahie. 15 Mofavremofo agu'afina negi'nagi avu'avazamo avitegahianagi, kanoma amino azeri fatgoma hu'zamo ana avu'ava zampintira azeri arukrahe hugahie. 16 Fenozami mago'ane eri rama'a hunaku'ma zamunte omane vahe kna zamiza zamazeri haviza nehaza vahe'ene, feno vahe'ma musezama nezamiza vahe'mokizmia, zamuntera omanegahie. 17 Knare antahizane vahe'mofo kere kagesa antenka antahise nehunka, nagrama rempima hugamisuaza huo. 18 Na'ankure ana kemo'a knare hu'neankinka kagu'afi erintenankeno ana kemo'a, kagitera me'nena kea hutere hugahane. 19 Nagra menina rempi hunegamugu, nentahinka Ra Anumzamofonte kagranena kamentinti huo. 20 Nagra 30ti'a knare kegaga krentegantenofina, kavumro kene, antahiza eri zamofo naneke kregaminoankinka, 21 ama ana kereti tamage kea rempi hunka antahinenka, iza'o hugantenigenka e'nesamofona fatgo'are kenona ome asamigahane. 22 Zamunte omane vahe'mokizmi zana ohanareho, na'ankure zamagra zamunte omane vahe mani'naze. Hagi zamunte omanesige'zama upama hu'nesaza vahera, keagarera zamavrenteta zamazeri havizana osiho. 23 Na'ankure Ra Anumzamo'a, zamunte omane vahera zamahokeno zamazeri havizama hanaza vahe'mokizmia, zamazeri haviza hugahie. 24 Arimpa hevava vahera rone huonto, ame huno rimpahe vahe enena tagro oto, 25 ru ana vahe zamavuzmava enerisankeno, kukomo kazeriankna huno kagu'a azeri haviza hugahane. 26 Mago vahera huvempa hunka mago'za hugantegahue osuo. Hagi ru vahe'mo'ma nofima hu'nesigenka, ana nofima hu'nea zana nagra vakanentegahue hunka osuo. 27 Anama nofima hu'nesaza zama apa osesanke'za miko zanka'ane, tafe'ma masinkama nemasesana zanena eri vgaregahaze. 28 Tamagehe'mo'za ko'ma re'nenaza kanagi kana, akasi kantutretma rumofo mopa eri havia osiho. 29 Eri'zama eri antahizama eri'nea ne'mofo erizana negano? Agra kini vahe'mokizmi eri'za vahe nemanino, agi omane vahe'mofo eri'za vahera omanigahie.