1 Waini tima nenea vahe'mofona azeri neginagi higeno, vahe'ma huhaviza hu kea nehigeno, aka timo'a vahe'mofona azeri negi nenkeno ke huhaviza nehuno hara hugahie. Waini ti neno neginagi hu vahe'mofona, agripina ama' antahizana omanegahie. 2 Kinimofo arimpa akahe zamo'a, laionimo rankrafa hiankna hu'ne. Kini vahe'mofo azeri arimpa ahe'simofona, ahe frigahie. 3 Ha' frama hu'zanku'ma mani kore huno agatere'zamo'a, ra agi erigahie. Hianagi neginagi vahe'mo'za ame hu'za hafra nehaze. 4 Feru vahe'mo'ma hozama ante knare'ma mopama rekorino hozama ontesuno'a, hozama hamare knarera ne'zana ohamaregahie. 5 Vahe'mofo antahi'zamo'a tirukna huno me'neanagi, ama' antahizane vahe'mo'a ana tirupintira ana antahizana afi anaga netre. 6 Rama'a vahe'mo'za, tavesi negantone hugahazanagi, mago mago vahe'mo'za tamage hu'za kavesigante'gahaze. 7 Fatgo avu'ava'ene ne'mo'a, mani fatgo huno nemanie. Agri mofavre zgamo'za, asomu erigahaze. 8 Kini vahe'mo'ma keagama refako hunaku'ma trate'ma mani'neno, keaga refko huno havi avu'avazana ke fore nehie. 9 Nagu'amo'a fatgo higena, nagra agru hu'noankino nagripina kumira omane'ne huno iza hugahie? 10 Havige hu'za makazama refko huza kna'ama ke'zane, havige hu'za avamente refkoma osu'zanena Ra Anumzamo'a avesra huno agotenezmante. 11 Mofavremofona avu'avate negenka, agri avu'avamo'a agru hu'neanki, fatgo mofavre mani'neanki hugahane. 12 Tagesama me'neana keaga antahizane, tavuragama me'neana tavuma ke'za me'neankino tarega'zana Ra Anumzamo museza tami'ne. 13 Kagrama kavu'ma masetenka manizankuma kavesi kavesima haniana, kamuntera omanegosie. Kavu'ma omasesanana ne'zama nesana zamo'a rama'a megahie. 14 Knare osu'ne! Knare osune! Huno mago'a zama mizama seku'ma himo'a nehie. Hianagi mizaseno kantegama nevuno'a, ana zankura knare'za erue huno rama'a muse ke hume nevie. 15 Antahizama ami kemo'a, koline zago'amo'ma marerisa havea ageterene. 16 Onke'nenana vahe'mo'ma nofima nehinkeno magomo apasegahue hanigenka, anamofo anakreku'a huvame hunka eri'negeno, ana nofima hu'neazana eme apaseno. Savri a'mo'ma nofima hanigenoma mago'mo apasegahue'ma hanigenka, aza hu'na apasentegahue huno kaminia zana erio. 17 Kumzafa kave'mo'a haganentake hugahianagi, refuzufupe havemo kagipi aviteno kagi traga hiankna henka'a hugahie. 18 Antahi'zana vahepinti erintenka erizama eri antahizana retro huo. Hagi knare antahi'zama mago'mofompinti'ma e'orinesunka hatera ovuo. 19 Vahe zamagenkema hu vahe'moza vahe'mokizmi oku'zana hu ama nehaze. E'ina hunegu vahe zamagenkema hu vahe enena tragotenka omanio. 20 Nerera nefama huhaviza huntesia vahe'mofona tvi'amo asu hanigeno kumazu hanimpi maniankna huno frigahie. 21 Arera a'fama ofri maninesigeno'ma erisinti haregahanema hu'nesia zama ame'ama huno erisia mofavremo'a, atuparega asimu'a omanegosie. 22 Kefo avu'avama hugante'sagenka anahukna huna nona huzamantegahue osuo. Hagi avega antenegeno Ra Anumzamo kaza huno ana knazana erino. 23 Mago'azama mizaseku'ma hanigeno kna'ama refako huno kezama (skel) erinteno refako hu so'e osu avu'avazana, Ra Anumzamo'a avesra huno agonete. 24 Vahe'mo'ma mika zama hiazana, Ra Anumzamoke azeri ante fatgo nehie. Inankna huno mago'a vahemo'a agra'ma nehia zana keno antahino hugahie? 25 Kagesa antahi ankeretenka Anumzamofontera huvempa huo. Ame'ama hunka huvempama hutesunka henka'a anama hu'nesana kegu kagesa antahintahi nehunka kagraka'a kazeri haviza hugahane. 26 Ama' antahizane kini ne'mo'a kefo zamavu'zamava nehza vahera witi hona'a hareno eriherahe hianka huno rezaganeno ke ama huteno, henka knanentake havenu witi'a refuzafupeankna huno knazana zamigahie. 27 Ra Anumzamofo lampe tvi'mo'a, vahe'mofo kantu agu'afi ufreno mika kefo agu'agesama me'neana hakeno eri ama nehie. 28 Kini ne'mo'ma vahe'mokizmima avesi nezamanteno knare avu'ava huzamantesiana, agra knare huno mani'neno, zaza kna kva eri'zantera manino vugahie. 29 Nehazave ramimofona hanave zamimo ra zamagia nezamie. Hianagi ranra vahera efe'zmazoka nege'za vahe'mo'za husga hunezmantaze. 30 Hazenkema hania vahe'ma knokeve'ma ami'zamo, kefo avu'avazana ahenati netreno, agu'a azeri agru hugahie.