1 Hanki ese knazupa Sonta nanterana rumsa osu'nege'za, mananentake'zama tro hu'nazaza eri'za Jisasima havegampi ome ante'narega vu'naze. 2 Hagi zamagrama vu'za ome kazana, ana havegantema runkanirenea havea rezahe hutrenage'za kenaze. 3 Hianagi zamagrama havegampima ufre'za kazana, Ramofo Jisasi avufga omnenege'za ome ke'naze. 4 Avufa'a nonke'za tusi zamagesa nentahizageno, masanentake huno efeke kukena hu'na'a netremoke ame hune anante otinake'za, 5 ana a'nemo'zama zmagogogu nehu'za, kepri hu'za mani'nage'no, ana netremoke anage hu'ne zmasami'naze. Na'a higeta ksefa huno mani'nea vahekura, fri vahe kumapina nehakraze? 6 Amafina Agra omanine, frinefintira ko otine. Hanki tamagrane Galili mani'neno tamasmi'nea kegu tamagesa antahiho. 7  Vahe'mofo Mofavrea kumike vahe'mofo zmazampi avrentena, rugeka zafare ahesnageno friteno, tagufa kna manino otigahie, huno hu'nea kegu tamagesa antahiho, 8 hu'ne nehake'za, ana a'nemo'za Jisasima hu'nea kegu zmagesa nentahiza, 9 ana havegana atre'za rukrehe hu'za vu'za, 11ni'a amagema nentaza naga'ane, ruga'amokizminena maka naneke ome zamasmi vgare'naze. 10 Hanki ana a'nemokizmi zamagi'a, Makdala kumateti' a' Mariaki, magora Joanaki, Jemisi nerera agi'a Maria ene, mago'a a'nemo'zane, ana nanekea aposolo nagara ome zmasami'naze. 11 Hianagi anankema nentahiza amne kehaze nehu'za, anakegura zmentinti osu'naze. 12 Hianagi Pita'a otino agareno vuno havegante ome kepri huno agu'afi keana, efeke tavravema anakintenaza tavravege me'negeno negeno, rukrahe huno anazanku tusiza huno agesa antahime vu'ne.

13 Ana zupage tare amagema nenta'a disaipol netremokea Emeus nehaza kumate vuna'e. Ana kumateti Jerusale vnazana 11 kilomitanaza me'ne. 14 Znagra maka'za fore'ma hu'nea zanku naneke hume nevakeno, 15 Jisasi'a Agra'a ehnatige'za magoka ana netrene vu'naze. 16 Hianagi zanavurgamofona rehiza higene Jisasi'e huke ke anke orena'e. 17 Jisasi'a anage huno znasamine, na'anku ama nenekea tanagra hugantugma hutna nea'e? huno znantahigegene anante znasunku nehuke uotina'e. 18 Hagi magomofo agi'a Kriopasi'e nehaza ne'mo ana kemofo nona'a huno, kagrake'za Jerusale nantu antenka ne-enka amagnafima fore huneazana ontahinano? 19 Jisasi'a anage huno znasami'ne, nanknaza fore hu'negeta neha'e? Higeno Nazareti Jisasinte'ma fore hu'neazanku nehue. Agra kasnampa ne'kino, Anumzamofo avure ene, maka vahemofo avurera, erizama'amo'ene keamo'enana hanavenentake hu'nea ne'ma, 20 ugagota pris vahe'mozane, kva vahetimo'zane ahesageno frisniegu, avarezamizage'za ahe'za keka zafare hantinaza ne'ku nehu'e. 21 Hianagi tagrama tagesa antahunana, Israeli vahe'mota knazantifinti tahoke ahesia nere huta nentahune. Tmage ama anazana fore'ma hu'neana 3'a kna evu'ne. 22 Hianagi tagripinti ana havegante nanterame ome ke'naza, a'nemo'za antri huna ke eme tasamiza, 23 avufa'a omne'nege'za ome negazageno, avana kazankna huke, tare ankero netremoke, kasefa huno Jisasi'a mani'ne huke huna'a naneke eme tasmi'naze. 24 Tagripinti mago'amo'za havegantega anaza ome kenaku vu'naze. Mika zanku'ma ana anemo'za hu'nazaza ome kazanagi, Jisasina onke'naze. 25 Jisasi'a amanage huno znasami'ne, Kasnampa vahe'mo'za hu'naza maka nanekegura negi nenetma tamagu'afina tamentintia nosaze! 26  Kraisi'a ataza eriteno, msa'afi ufresiana, knarera osugahio? I'o. 27 Huteno anante agafa huno, Mosesinteti vuno maka kasnampa vahe'mozama, Agrikuma huza krentenaza kea znasamime vu'ne. 28 Hagi znagrama vunaku'ma hu'na'a kumate unehnatizageno, Jisasi'a ana kumara agatereno vaniaza hu'ne. 29 Hianagi hanavetike agaterenka ovugahane huke znagra nehuke, hanihuza nehianki masetenka vnane hu'ne kazigazi hakeno, ana nompi znagrane umreri'ne. 30 Jisasima nezama nenaku aza tununte tratema umanineno breti erino, Anumzamofo susu hunteteno, tamanasino agafa huno neznamigeno, 31 zanavurgamo hari higeke Jisasi'e huke ke ankenerakeno, Jisasi'a ru fnane hu'ne. 32 Znagra znagra anage hu'na'e, kantegama neokenoma keagama nerasamino, Anumzamofo avontafepinti kema eriama nehigeno'a, tagu'amo'a otianagi, keta antahita osu'no'e. 33 Znagra anage nehuke, ame huke rukrehe huke Jerusale kumate vuna'e. Jisasima amagema nentaza 11ni'a disaipol nagamozane, mago'a naga'moza'nena eri atru hu'nage'za ome nezmagake'za, 34 Zamagra anage hu'naze, tamage Ramo'a otino, Saimoninte ufore hu'ne! Huza nehazageno, 35 ana amagema nenta'a disaipol netremoke kantega fore hu'neazane, breti erino tamanasino znamigeke, Jisasina ke ankerena'a agenke huama hu'na'e.

36 Anazanku'ma naneke nehazageno'a, Jisasi'a amu'no zimifi efore huno otineno anage hu'ne, tamarimpa frune maniho. 37 Hianagi zamagra havi avamu negone hu'za zamagesa nentahi'za, antri hu'za koro hu'naze. 38 Ana nehzageno Jisasi'a anage huno zmasamine. Nahigeta korera nehuta, tare tamagutmagesa nentahize? 39  Ama Nagrani'a mni'noanki nagane, nazanena navako hutma keho. Na'ankure Nagrima hu'neaza huno, hankromofona avufgane zaferinanena omnene. 40 Anagema huteno'a, agane, azane anamokizmi zameri hu'ne. 41 Na'ankure zamagra tusi muse nehu'za, antri nehu'za zamentinti nosazageno, Jisasi'a anage hu'ne, tamagra mago'a nezana antenazafi? 42 Zamagra kre hagege huntenea nozame eri amizageno, 43 anamokizmi zamure erino nenege'za ke'naze.

44 Jisasi'a anage huno zamasmi'ne, Nagra tamagrane mani'nena, anage huno'e, maka kema Nagriku hu'za Mosese kasegefine, kasnampa vahe'mo'za krenaza kefine, zgame avontafepima krentenea zamo'a nena'a fore hugahie. 45 Anante Jisasi'a zamaza huno antahintahizmia zmazeri ama hige'za, maka Anumzamofo avontafepima krente'nea kea antahini hu'naze. 46 Agra anage huno zmasami'ne, avontafepina amanage huno krentene, Kraisina ahesageno ata erino friteno, tagufa knare otigahie. 47  Vahe'mo'za Agri agifi, zamagu'a rukrahe hanageno, Anumzamo'a kefozazimi eritrezamantesia kea, Jerusale kumate erigafa hute'za, mika kokankoka vahete vugahaze. 48  Tamagra Nagritema fore higetma kenaza zana huama hugahaze. 49  Hanki antahiho, Nfa'nimo huvempa huno tamigahue hu'nemofona, huntesugeno tamagrite egahie. Hu'neanagi tamagra (Jerusale) rankumapi manineta monafinti hanavea eriteta vuta eta hiho.

50 Jisasi'a anage huteno zamavreno Betani vuno azana erisaga hunagamuteno, asomu ke huzmantene. 51 Anama hunezmantegeno, Anumzamo'a avregeno zmatreno monafi mareri'ne. 52 Zamagra mono huntete'za, tusi musenkase hume Jerusale kumate ete vu'naze. 53 Ana hute'za ra mono nompi mreri'za Anumzamofo agi erisaga huvava hu'naze.