Mo꞉fo꞉s agel we
Yon
e sa꞉sa꞉lo꞉.
To We Tamina Agelema
Kalu bugo꞉lo꞉ sa꞉sa꞉lo꞉ we, Yon. E Ya꞉suwa꞉lo꞉ tili wido꞉ kalu kugula꞉fo꞉wo꞉ nowo꞉ e. E ko꞉go꞉do꞉ ulula꞉liabiki, mo꞉fo꞉s we tilidabu kaluka꞉isalemo꞉wo꞉ agelema꞉ki, sa꞉sa꞉lo꞉.
Mo꞉fo꞉s sa꞉sa꞉lo꞉ wenamio꞉, asulo꞉wo꞉ a꞉la꞉ da꞉labiki, asulo꞉ dima꞉ki, mo꞉fo꞉s we a꞉na sa꞉sa꞉lo꞉. To nowo꞉ we, nio꞉ Gode o꞉lia꞉ Ene Inso꞉ Ya꞉su Keliso o꞉lia꞉yo꞉lo꞉ ha꞉fo꞉ disa꞉la꞉sa꞉ga꞉ asulo꞉wo꞉ imilise doma꞉ki, a꞉la꞉ta꞉ga꞉ tili dabu kaluka꞉isalemo꞉wo꞉lo꞉ ha꞉fo꞉ disa꞉ma꞉ki, to we Yona꞉yo꞉ a꞉na sa꞉sa꞉lo꞉. To andebo꞉ we, kaluka꞉isaleyo꞉ kaluwa꞉lo꞉ madali godeya꞉ man walasa꞉lakiyo꞉ wida꞉lab a꞉namio꞉ mo꞉tilidabuma꞉ki, a꞉la꞉ta꞉ga꞉ to we a꞉na alobana wido꞉. Kalu a꞉ma꞉ sa꞉lakiyo꞉, “Godeya꞉ Inso꞉ Ya꞉su a꞉no꞉, kalu ni o꞉ngo꞉wo꞉ mo꞉fa꞉la꞉dowan” a꞉la꞉sio꞉. To we hala sa꞉labiki, Yon eyo꞉ da꞉da꞉sa꞉ga꞉, kaluka꞉isaleyo꞉ to wenamio꞉ mo꞉kuduhamana꞉ki, mo꞉fo꞉s we a꞉na sa꞉sa꞉lo꞉.
1
To Mela꞉no꞉ a꞉no꞉ kalaba fa꞉la꞉dowo꞉
1 To Mela꞉no꞉lo꞉ a꞉lab taminde amilo꞉ elen a꞉no꞉ niliyo꞉ dabu. A꞉la꞉ta꞉ga꞉ ninin siya꞉ ba꞉da꞉sa꞉ga꞉, nili dagiya꞉yo꞉ golo꞉. To amio꞉ mela꞉no꞉wo꞉ a꞉lab ko꞉lo꞉, to weno꞉ko꞉ niliyo꞉ gimo꞉wo꞉ walama꞉nigo꞉l. 2 Mela꞉no꞉ a꞉no꞉ kalule fa꞉la꞉dota꞉ga꞉ a꞉lab a꞉no꞉ ninin ba꞉da꞉sa꞉ga꞉, mela꞉no꞉ mela꞉no꞉ we gimo꞉wo꞉ a꞉na walaso꞉lo꞉l. Tamin amio꞉ E Iya o꞉lia꞉ elen ko꞉lo꞉ o꞉go꞉ nilo꞉ amio꞉ kalaba fa꞉la꞉dowo꞉. 3 Gio꞉ ni o꞉lia꞉ ege doma꞉ki, nililo꞉ ba꞉ba꞉ o꞉lia꞉ nililo꞉ dabu a꞉no꞉lia꞉yo꞉ gimo꞉wo꞉lo꞉ walaso꞉lo꞉l. A꞉la꞉ta꞉ga꞉ nio꞉ Gode o꞉lia꞉ Inso꞉, Ya꞉su Keliso o꞉lia꞉yo꞉ ege dowa꞉sen. 4 A꞉la꞉fo꞉ko꞉lo꞉ nili sagalo꞉ a꞉no꞉ ililifoma꞉ki, mo꞉fo꞉s we a꞉na sa꞉sa꞉lo꞉.
Nio꞉ Gode ho꞉lena doma꞉niki.
5 To we Ya꞉suwa꞉yo꞉ malolabikiyo꞉, nio꞉ dabu ko꞉lo꞉ gimo꞉wo꞉ a꞉na sa꞉ma꞉nigo꞉l. Gode e ho꞉len nafa malilo꞉ ko꞉lo꞉ mogago꞉ imilig nowo꞉ e amio꞉ mada aundo꞉ma. 6 Kaluka꞉isale abeyo꞉ to sa꞉lakiyo꞉, “Ne Gode o꞉lia꞉ ha꞉fo꞉ disa꞉” a꞉la꞉sa꞉laki ko꞉sega, e mogago꞉ dimida꞉liki, sololi o꞉ngo꞉wa sia꞉lalega, to elo꞉ sio꞉ a꞉ma꞉yo꞉, e madalilo꞉ sa꞉lan kaluwo꞉ dowab. A꞉la꞉fo꞉ko꞉lo꞉ Godeya꞉ to man hendeleyo꞉ kalu e mo꞉kuduha꞉na꞉lab. 7 Ko꞉sega Gode E, man nafale dimida꞉liki, malilo꞉ ho꞉lena a꞉lab ko꞉lo꞉ nio꞉ e dowo꞉ o꞉leo꞉ngo꞉ dowalega, negelebo꞉ ege doma꞉ib. A꞉la꞉ta꞉ga꞉ Godeya꞉ Inso꞉, Ya꞉suwa꞉ ho꞉bo꞉ a꞉ma꞉yo꞉ nili mogago꞉ dimido꞉ a꞉no꞉ halaliki, nio꞉ malilo꞉ doma꞉ib. 8 A꞉la꞉fo꞉ko꞉lo꞉ kaluka꞉isale abeyo꞉, “Ne mogago꞉wo꞉ aundo꞉ma” a꞉la꞉sa꞉lalega, enena꞉ma꞉la꞉yo꞉ e mogago꞉lo꞉ mo꞉dimidan a꞉la꞉do꞉lo꞉le sa꞉lakigab ko꞉lo꞉ Godeya꞉ To hendeleyo꞉ e amio꞉ mo꞉da꞉lab. 9 Nililo꞉ mogago꞉ dimido꞉ a꞉no꞉ foga꞉le sa꞉lalega, Godeya꞉yo꞉ enedo꞉ to saefa꞉ o꞉leaumbo꞉ dimidama꞉ib. A꞉la꞉ta꞉ga꞉ man nafa digalo꞉ dimidaki, nili mogago꞉ dimido꞉ a꞉no꞉ Eyo꞉ hala꞉sa꞉ga꞉, ga꞉lilaliki, nio꞉ malilo꞉ doma꞉ib. 10 Kaluka꞉isale abeyo꞉, “Ne mogago꞉wo꞉ mo꞉dimidan” a꞉la꞉sa꞉lalega, to a꞉la꞉do꞉ sa꞉lab a꞉ma꞉yo꞉ Godeyo꞉ madali tolo꞉ sa꞉lan kalu a꞉la꞉li sa꞉laki gab. A꞉la꞉fo꞉ko꞉lo꞉ Godeya꞉ to man a꞉no꞉ kalu a꞉ma꞉ asulo꞉ usamio꞉ mo꞉da꞉lab.