5
Nan Nayu'utay Papil Ja Nan Uyhun Gway Kernero
1 Kun inila' nan nayu'ut gway papil gway inoognan chay tummutu'chu san tukaw nan mangituyay san chigwananay imana. Ad nan sachiyay papil lamang nalistaan nan lawhaw ja whali'tadna ja nangimpittu napa'otan tot achi kun mahu'hu'atan. 2 Kun inila' nan napigsa anghelay towhag nan kinganaay manggwana, “Ngachan nan sillobhongay mangaan san pa'ot nan nayu'utay papil ad inujadna?” 3 Gwon maid kun osa ad langit, san lawhaw nan luta ja san Hades gway ikaw chanan natoy as sillobhong gway mangujad san nayu'utay papil ja mamasa san nilista san sachi. 4 Kun naniwhila' ekas lagwing ekay angos'u san maid kun osa as sillobhong mam'at ja mamasa san nayu'utay papil. 5 Gwot anan nan osaay cha'or gway mangipangpangu an sa'on, “Achi'a maniwhil. Ilam, nangawha' nan amod nan ayobhongana mangituyay gway ma'gwaniyon Layon gway nerpu san kana' Juda gway ma'gwani hoson Kana' Dabid. Sija nan naatchan as ayobhonganay mangaan san pituway pa'ot nan nayu'utay papil ad inujadna.”
6 Sachi kun inila' nan Uyhunay Kernero gway mama''ila nan pilat nan jamanna san nichatunana gway summisi'ad san nanghoyaatan nan tukaw nan mangituyay ja chachay opatay mawhiwhijag ja chachay chacha''or gway mangipangpangu. Pitu nan sakkud nan Uyhunay Kernero ja pitu ahos nan atana gway chachi nan mijagwatan nan Ispilitun Apudyus gway pitu nan mipaillan nan ahobyongana gway niwhaun san ayutayuta. 7 Kun ummoy nan sachi Uyhunay Kernero inaya nan nayu'utay papil san machigwananay iman nan tummutu'chu san tukaw. 8 Ad sa'ad san nangallana san nayu'utay papil, nampalintumong chachay opatay mawhiwhijag ja chugwampuyu ja opatay chacha''or gway mangipangpangu san sangun nan Uyhunay Kernero. Gwaschi osa an chicha agwad nan arpacha ja chujug gway huyagwan gway napnu san insenso. Sijana chanan lugwayun chanan takun Apudyus. 9 Kun nan'antacha san assahuway anta gway manggwana,
“Si'a nan sillobhongay mangaya san nayu'utay papil
ja mangaan sasan pa'otna.
Tan intoy cha'a ad kapu san chayam
gway ummigwang san natojam isun chi nila'uwam chanan taku
gway merpu san na'aya'ayasi tribu, ili ja apapat tot mangngachancha takun Apudyus.
10 Kun inggwam chichas taku gway ituyajam
ja nangngachanom chicha papachi tot mansilwhicha an Apudyus ta'u,
ad na'atuyaycha an si'a san luhung.”
11 Nantollonga' kun chingngor' nan kingan nan angsanay anghel gway achi ku mawhilang tan alihulihucha. Nampali'gwos chanan a'anghel say tukaw ja sasay opatay mawhiwhijag ja sasay chacha''or gway mangipangpangu. 12 Ad i'an'antachas towhag gway manggwana,
“Lobhongna as michajaw nan Uyhunay Kernero gway inchatuncha.
Machaychajaw as sija kapu san ayobhongana, kapu san inalaingna, kapu san inapigsana ja inawha'nangna.
Whigwhikon ta'u nan inapigsana,
chajagwon ta'u nan inangatuna ja manjaman ta'u an sija.”
13 Kun chingngor' nan man'antaan nan gwaschi mawhiwhijag gway agwad ad langit, san lawhaw nan luta, san Hades ja san whaywhay. Losanay mawhiwhijag man'an'antacha gway manggwana,
“Chajagwon ta'u nan tummutu'chu san tukaw.
Chajagwon ta'u nan Uyhunay Kernero.
Whigwhikon ta'u nan inapigsacha, chajagwon ta'u nan inangatucha
ja manjaman ta'u an chicha as ingkaingkana.”
14 Kun summungwhat chachay opatay mawhiwhijag gway manggwana, “Amen!” Ad sa'ad chachay chacha''or gway mangipangpangu nampalintumongchaay nanchajaw.