10
1 Susunud, nan whayugwo' ekajay ma'gwa ja lugwayu' an Apudyus sasan ailija'ay Hudyu, matakucha otjan san whersucha. 2 Tan mapano'no'a'ay ikakadto'chaay mansilwhi an Apudyus gwon achicha kun naagwatanay ustu nan ininonay mansilwhi an Apudyus. 3 Tan achicha kun naagwatanay ustu nan ininon Apudyus gway mangiwhilang sasan taku as ustu san mangilana. Pinachascha anapon nan ugwachaay miwhilangan as ustu san mangilan Apudyus gway achicha kun nampaituyay san ininon Apudyus gway mangiwhilang an chicha as ustu san mangilana. 4 Tan sa'ad as Kristu sija nan nampapokan nan Lintog gway achita patho' panu'chon nan lintog as mawwasgwas san whersu. Ad losanay mamati an Hesus miwhilang as ustu san mangilan Apudyus.
Maid Kun Achin Apudyus Takuwon
5 Amasna nan illistan Moses san mipangkop san miwhilangan nan taku as ustu san mangilan Apudyus kapu san manuyutana san Lintog. Anana, “Nan takuway manungper san losanay whilin nan Lintog mawhijag as ingkaingkana.”* 10:5 Mawhasa san Levitico 18:5. 6 Gwon amasna nan niwhaka sasan takuway niwhilang as ustu san mangilan Apudyus kapu san pammati gway ummannatupcha san nilista Ukud Apudyus gway anana, “Achim anan san somsomo'nu, ‘Ngachan nan umoy ad langit?’ ” (Nan pijaona anan, nan umoy mangajag an Kristu gway manaku an chita'u.) 7 “Gwinnu achim ananon, ‘Ngachan nan umoy ad chayo' san luhung nan natoy?’ ”† 10:7 Mawhasa san Deuteronomio 30:12-13. (Nan pijaona anan, nan umoy manaku an Kristu.) 8 Nan inatuttugwaana, anana san Ukud Apudyus,
“Sa'ad nan ukud Apudyus achani an si'a,
agwad san somsomo'nu ja mawhalinnuway iwhaka.”
Sachi nan ukud gway mipangkop san pammati gway ipaakammumi 9 gway ananaon nu iwhawhagkam san tupo'nu gway as Hesus nan Apu ja tuttugwaom san somsomo'nuway tinakun Apudyus as sija san natojana, mataku'a. 10 Tan kapu san kadto'ay pammatin nan osa taku, niwhilang as sija as ustu san mangilan Apudyus ja san mangiwhawhagkaana gway as Hesus nan Apu, mataku as sija. 11 Tan nilista san Ukud Apudyus gway anana, “Losanay mamati an sija achi kun miwhawhain.”‡ 10:11 Mawhasa san Isaias 28:16. 12 Tan maid kun nan'ayasiyan nan Hudyu ja wha'on kus Hudyu gway manisugwon Apudyus chicha tan osossa''an nan Apun nan losan ja nachaya mangatod san losanay man'ochaw an sija. 13 Tan nilista san Ukud Apudyus gway anana, “Nu ngachan nan mampawhachang an Apudyus takuwona.”§ 10:13 Mawhasa san Joel 2:32.
14 Gwon ininonchaay mampawhachang an sija gway achicha kun namati an Kristu? Ad ininonchaay mamati an sija gway achicha kun chingngor nan mipangkop an sija? Ja ininonchaay mangngor san mipangkop an sija nu maid mangipaakammu? 15 Ad ininonchaay umoy mangipaakammu nu wha'oncha kus niwhaun? Gwon nan inatuttugwaana agwad chanan niwhaun tan nilista san Ukud Apudyus gway anana, “Ka whayu ekay umaliyan chanan umali mangiwhaka san Whayuway Chamag.”* 10:15 Mawhasa san Isaias 52:7. 16 Gwon wha'on kus losanay ijIsrael tinuttuwacha nan Whayuway Chamag. Tan anan Isaias, “Apu, ka a'it ekay namati san ingwhakami?”† 10:16 Mawhasa san Isaias 53:1. 17 Sija nan, nan mamatiyan merpu san manchongyan san mipaakammu chamag gway mipangkop an Kristu. 18 Gwon agwad nin nan manimusay ananaon, ad achin chanan ijIsrael chingngor nan mipangkop an Kristu? Wha'on, chingngorcha tan anan nan Ukud Apudyus,
“Nan impaakammucha gway mipangkop an Apudyus nigwerna' san losanay ili san luta
ja chummakus san aachajugwanay ili san luta.”‡ 10:18 Mawhasa san Salmo 19:4.
19 Agwad nin nan asin manimus gway manggwanaon, “Ad achin chanan ijIsrael naagwatan?” Wha'on, naagwantancha tan uyay chanan wha'on kus ijIsrael naagwatancha. Nan umuunna san losan, anan Moses san nangiwhagana san anan Apudyuson,
“Mangimuno' cha'aju sasan takuway wha'on kus taku',
palingugwo' cha'aju sasan katkatungay taku san uchumay ili.Ӥ 10:19 Mawhasa san Deuteronomio 32:21.
20 Ad sa'ad as Isaias amod nan tuyodna san nangiwhagana san ingwhakan Apudyus mipangkop sasan wha'on kus ijIsrael. Anana,
“Inchasana' sasan achi kun manganap an sa'on,
nampailaa' sasan achi kun mangimus an sa'on.”* 10:20 Mawhasa san Isaias 65:1.
21 Gwon san mipangkop sasan ijIsrael anana, “Nawhajag gway uullajo' gway managkulin an sa'on chanan takuway nasu'il ja achi kun chumngor.”† 10:21 Mawhasa san Isaias 65:2.
*10:5 10:5 Mawhasa san Levitico 18:5.
†10:7 10:7 Mawhasa san Deuteronomio 30:12-13.
‡10:11 10:11 Mawhasa san Isaias 28:16.
§10:13 10:13 Mawhasa san Joel 2:32.
*10:15 10:15 Mawhasa san Isaias 52:7.
†10:16 10:16 Mawhasa san Isaias 53:1.
‡10:18 10:18 Mawhasa san Salmo 19:4.
§10:19 10:19 Mawhasa san Deuteronomio 32:21.
*10:20 10:20 Mawhasa san Isaias 65:1.
†10:21 10:21 Mawhasa san Isaias 65:2.