4
Nan Nanulisukan Satanas An Hesus
(Mateo 4:1-11; Mer'us 1:12-13)
1 Anna kunay ummoy iningkaw an Hesus nan Ispilitun Apudyus lummajaw as sija san gwanggwangay Jordan kun impujut nan Ispilitun Apudyus as sija san luta gway maid kun ingkaw as taku. 2 Ad san opat puyuway erkaw sinulisukan Satanas as sija. San sachiyay chimpu achi kun nangnangan as Hesus sija nan nawhitil as sija san nappung nan sachi. 3 Kun anan Satanas an sija, “Nu si'a nan Ana' Apudyus iwhakam sannachaja whatu ta mangngachancha tinapay.”
4 Kun summungwhat as Hesus gway manggwana, “Nilista san Ukud Apudyus gway anana, ‘Wha'on kus ahus nan tinapay as i'atakun nan taku.’ ”* 4:4 Mawhasa san Deuteronomio 8:3.
5 Sachi achot iyoy Satanas as Hesus san nangatuway whilig maagna ekay impaila an sija nan losanay mantuyajan san luhung. 6 Kun anan Satanas an Hesus, “Atcho' an si'a nan losanay ayobhongan gway mangituyay sannachaja ja nan losanay ina'erjadcha tan naatod chana losan an sa'on ad mawhalin'uway atchon san whayugwo'ay mangatchan. 7 Ad nu mampalintumong'aay manchajaw an sa'on man'ugwam losan chana.”
8 Kun summungwhat as Hesus gway manggwana, “Nilista san Ukud Apudyus gway anana,
‘As Apu gway Apudyusnu nan manchajagwam
ad ahus as sija as mansilwhiyam!’† 4:8 Mawhasa san Deuteronomio 6:13. ”
9 Awni kun iyoy Satanas as Hesus ad Jerusalem kun impasi'adnas sija san tu'tu' nan Templo kun anana an sija, “Nu si'a nan Ana' Apudyus lumajug'a sanna. 10 Tan nilista san Ukud Apudyus gway anana,
‘Sa'ad chanan a'anghel Apudyus whilinona chicha san mipangkop an si'a tot whantajan cha'a.’
11 Anana hos, ‘Tapajaon cha'a san imacha
tot achi chanan i'im miserser san whatu.’‡ 4:11 Mawhasa san Salmo 91:11-12. ”
12 Kun summungwhat as Hesus gway manggwana,
“Anan nan Ukud Apudyus,
‘Achim sulisukon nan Apu gway Apudyusnu.’§ 4:12 Mawhasa san Deuteronomio 6:16. ”
13 Sachi kunay inamin Satanas pachason nan losanay mawhalinna isulisug an Hesus tinaynana as sija ingkanas agwad chimpuna asin.
Nan Nansuyuwan Hesus Ad Galili
(Mateo 4:12-17; Mer'us 1:14-15)
14 Kun nanulin as Hesus ad Galili gway anna an sija nan ayobhongan nan Ispilitun Apudyus. Kun nanchinamag nan mipangkop an sija san ailiili san sachiyay ili. 15 Kun nansuyusuyus sija sasan sinagoga gwot chinaychajaw nan losanay taku.
Achin Ku Chanan iNazaret Chongyon As Hesus
(Mateo 13:53-58; Mer'us 6:1-6)
16 Kun ummoy as Hesus ad Nazaret san iliyay chumma'yana. Gwot nilumno' san sinagoga san Erkaw gway Umillongan tan sija nan ukalina. Kun summi'ad gway mamasa san Ukud Apudyus 17 gwot inatodcha an sija nan nayu'utay papil gway illistan profeta Isaias. Kun whinitwhitna nan nayu'utay papil gwot inchasana nan nisuyatan nan ananaon:
18 “Anna an sa'on nan Ispilitun Apudyus
tan chinutu'anas sa'on as mangiwhaka san Whayuway Chamag sasan whawha'sigwot.
Ingwhauna' as mangipaakammu
sasan whayud gway magwajagwajaancha
ancha ma'aila chanan na'uyap
ja tot magwajaan chanan milaylajusan.
19 Ja ta ipaakammu' ahos gway
humu'nag nan chimpuway mangipailan Apudyus san manakuwana sasan takuna.”* 4:19 Mawhasa san Isaias 61:1-2.
20 Kun nilu'ut Hesus nan papilay nilistaan nan Ukud Apudyus kun inatodna insubli san mansilsilwhi san sinagoga kun tummu'chuway nansuyu. Kun losanay taku san sinagoga intotollongcha as sija. 21 Kun anana an chicha, “San sana erkaw tummuttuwa nan annaja niwhasaay Ukud Apudyus gway chingngorju.”
22 Kun losanay nangngor an sija nasomcha an sija ja nataagcha san inawhayun nan inukudna kun anancha, “Tan ana' kayna Josep ja.”
23 Kun anana an chicha, “Maid kun chugwachugwanaay iwhakaju an sa'on nan amasnaay apapat, ‘Chu'tur, akasam nan longagnu! Losanay chingngormiyay na'gwa ad Capernaum oom ahos ad asna gway ilim.’ ” 24 Innanana hos, “Tuttuwa iwhaka' an cha'aju, maid kun profeta as michajaw san ilina. 25 Gwon nan inatuttugwaana iwhaka' an cha'aju gway angsan chanan nawhayu ad Israel san chimpun Elias san achina kun ummuduchanan san tuyu ja koggwaay tagwon san iningkagwan nan amochay uyat san losanay luta. 26 Gwon maid ku an chicha nan niwhaunan Elias, ahus san osa nawhayu ad Sarepta san ilid Sidon. 27 Ja angsan nan naleprosi ad Israel san chimpun Eliseo gway profeta, maid kun hummayu as osa an chicha ahus ekas Naaman gway iSiria as hummayu.”
28 Chingngorn ad chanan taku san sinagoga nannaja nalingucha as amod. 29 Kun summi'adchaot pinerjawcha as Hesus san lasin nan ili san ikid nan whilig gway nipata'choyan nan ili tot otchakonchas sija. 30 Gwon nangoy kusan hoyaat nan amochay taku aysan as sija.
Nan Laya'iyay Nilno' Nan Chimunju
(Mer'us 1:21-28)
31 Kun nanosog as Hesus ad Capernaum gway osa ilid Galili. Kun nansuyu sasan taku san Erkaw Gway Umillongan. 32 Kun nataagcha losan tan anna nan ayobhongan nan insussuyuna.
33 Ad sa'ad san sinagoga iningkaw nan osa laya'iyay nilno' nan chimunju kun inip'awna gway manggwana, 34 “Oy! Kamma whijawhijangan cha'ami Hesus gway iNazaret? Umalim tangkaan cha'ami? Akammu' si'a! Si'a chay maid kun whersuna gway ingwhaun Apudyus.”
35 Gwon impakino' Hesus nan chimunju gway manggwana, “Kumino''a, lumajaw'a san sanatay taku!” Gwot impatug kunan chimunju nan sachi taku san sangucha losan, tinaynana nanchi laya'i gway achina kus sija jinaman.
36 Kun nataag losan nan taku kun asi'a'anancha san gwaschi osa an chicha, “Sima ayasin nan apapat nina? Anna nan ayobhongana ja pigsana mamerjaw sasan chimunju ad lummajawcha!” 37 Kun nanchinamag nan mipangkop an Hesus san gwaschi ili gway mampali'gwos.
Nan Nangipawhayugwan Hesus San Angsanay Taku
(Mateo 8:14-17; Mer'us 1:29-34)
38 Lummajaw kus Hesus san sinagoga ummoy san hoyoy Simon. Ad sa'ad nan atukangan Simon gway huwhai amod nan atungna kun ingwhakacha an Hesus ta pawhayugwona as sija. 39 Gwot ummachayug kus Hesus summi'ad san cherragna kun ingwhakanaay ma'aan nan atungna kun na'aan nan atungnaot nawhanangon kun pina'anana chicha.
40 Mummaschom pun losanay anna huyunna nasa'it san whayangna ayasin nan sa'it, iyoycha an Hesus. Kun inognana nan gwaschi osa an chicha gwot hummayucha. 41 Pinerjawna hos chanan chimunju san angsanay taku. Kun nampa'uy chanan chimunjuway manggwana, “Si'a nan Ana' Apudyus!” Gwon impakino'na chicha ja achina kun iyujaay kumingacha tan akammucha gway sija nan Kristu.
Intuyuy Hesus Gway Mangipaakammu San Whayuway Chamag
(Mer'us 1:35-39)
42 Gwisnit kunot lummajaw as Hesus san sachi ili ummoy as sija san maid tagtaku. Kun inanaanap nan takus sija kun ummoycha an sija gwot tinagwichancha ta achi lumajaw. 43 Gwon anana, “Maserpu ipaakammu' nan Whayuway Chamag gway mipangkop san mantuyajan Apudyus san uchum ahosay ili kapu tan sijana nan nangiwhaunan Apudyus an sa'on.”
44 Kun intuyuynaay nangipaakammu san Whayuway Chamag sasan sinagoga san ailiilid Judea.