3
Nan Nansuyuwan Juan Gway Manghohonjag
(Mateo 3:1-12; Mer'us 1:1-8; Juan 1:19-28)
1 Sa'ad san mi'asergwa as limaay tagwon san nantuyajan Emperador Tiberio,
as Poncio Pilato nan kuwhinnachur ad Judea
kun as Herod nan mangituyay ad Galili
ja as sunudnaay Felipe nan mangituyay ad Ituria ja Traconite.
Kun as Lisanias nan mangituyay ad Abilene.
2 Cha Anas an Caifas nan angatuwanay pachi san sachi chimpu. Kun impaakammun Apudyus nan ukudna an Juan gway ana' Zacarias san luta gway maid kun ingkaw as taku. 3 Gwot ummoy as Juan san losanay ili gway nampali'gwos san gwanggwangay Jordan kun impaakammuna sasan taku gway manchu'kancha chanan whersucha ad nampahonjagcha tot ligwatan Apudyus nan losanay whersucha. 4 Sa'ad nan inggwan Juan sija nan nilista san nibyun profeta Isaias gway anana,
“Agwad nan osa mampa'upa'uy san luta gway maid kun ingkaw as taku gway ananaon,
‘Isakanaju nan ajon nan Apu!
Pawhayugwonju nan manadchayanana!
5 Maserpu maawhab losan nan challug,
mapanad losan nan whilig,
malinchong nan nanti''urti''urray chayan
ja maamamma''an nan napillapillau'anay ersa.
6 Ad nailan nan losanay taku nan manakuwan Apudyus.’ ”* 3:6 Mawhasa san Isaias 40:3-5.
7 Anana san amochay takuway ummoy an sija nampahonjag, “Nasi'ap aju gway isun chanan uyog, ngachan nan nangiwhaka an cha'ajuway malisiyanju nan umaliyay manusaan Apudyus nu achiju manchu'kan nan whersuju? 8 Maserpu ipailaju san kidkichujuway tuttuwa nanchu'kanju chanan whersuju. Ad achiju somsom'on gway achi cha'aju chusaon kapu san ananjuwon kana' cha'aju an Abraham. Tan iwhaka' an cha'aju gway uyay nannachaja whatu ma'gwaay oon Apudyus as kana' Abraham. 9 Na'asakana as Apudyus gway manusa san taku nu achicha manchu'kan nan lagwingay o'ooncha, isun nan taku gway na'asakanaay mangikupung san gwasayna san lamut nan aju. Ad losanay aju gway achi kun humkas as whayu makupung ad niwhallu san apuy.”
10 Kun anan nan amochay taku, “Ngachan maangkay oonmi?”
11 Kun anan Juan gway summungwhat an chicha, “Nu ngachan nan chugwa nan silupna atchona nan osa san maid silupna. Ad nu ngachan nan anna anona maserpu hosay mangatod.”
12 Kun ummoy nan uchumay manchachakup san hugwis tot mampahonjagcha an Juan kun anancha an sija, “Mistuyu, ngachan nan oonmi?”
13 Kun anana an chicha, “Achiju labson nan singilonju nu san ustuway masingil.”
14 Kun nanimus ahos nan uchumay susurchachu an sija gway manggwana, “As cha'ami kay, ngachan nan oonmi?”
Kun anana an chicha, “Achiju piliton ayan nan pila' nan taku gwinnu achiju pawhasuyon nan taku nu maid atuttugwaana. Mapno' aju san labhuju.”
15 Kun pummigsa nan namnaman chanan taku kun losancha nanommosommo' tan anancha kunnu as Juan nan Kristu. 16 Anan Juan gway summungwhat an chicha losan, “Honjaka' cha'aju san chanum gwon agwad nan osa umaliyay nangatngatu an sa'on. Achiya' kun miwhilang as mansilwhi an sija uyay mangaan san sinilasna. Honjakana cha'aju san apuy gway Ispilitun Apudyus.† 3:16 Nan osa pijaona ukuchon “chusaon Apudyus chanan achicha manchu'kan nan whersucha” ad nan osa pijaona ukuchon, “pachason Apudyus chanan takuna kapu san likat gway mansikab gway isun chi mapuuyan tot machayusancha.” 17 Ad nu umali ichersinna nan whayuway taku san lagwing gway isun nan takuway anna nan ayay'aynaay mallaid san chakami san kerkergwit. Igkana san ayangna nan kerkergwit gwon sa'ad nan chakami puuyana san apuy gway achi kun mapatajan.” 18 Amasna ja angsan nan in'aman Juan gway nampapigsa san somsomo'cha san nangipaakammugwana san Whayuway Chamag sasan taku.
19-20 Ad sa'ad as kuwhinnachur Herod gway patinajun gway amujuwan Juan san mipangkop an Herodias gway asagwan nan sunudna ja mipangkop sasan lagwingay o'oona, chinogwana nan lagwingay o'oona san nangiwhayuchana an Juan.
Nan Nahonjakan Hesus
(Mateo 3:13-17; Mer'us 1:9-11)
21 Sa'ad san chaan mawhayud as Juan san namonjakana sasan taku nahonjakan ahos as Hesus. Anna kunay mallugwayugwayu as Hesus niibwhat nan langit. 22 Kun ummoy inumpa nan Ispilitun Apudyus gway isun chi kaob nan kalapati an sija. Ad iningkaw nan kingaay nerpud langit gway manggwana, “Si'a nan ana''uway ipatpatog'u, mamasoma' an si'a.”
Nan Nerpugwan Hesus
(Mateo 1:1-17)
23 Sa'ad as Hesus ummoy as tuyumpuyu nan tagwonna san nangilukijanaay mansuyu.
Ad nan somsomo' chanan taku ana' Josep as sija gway ana' Eli,
24 ad sa'ad as Eli ana' Matat,
sa'ad as Matat ana' Levi,
sa'ad as Levi ana' Melki,
sa'ad as Melki ana' Jannai,
sa'ad as Jannai ana' Josep,
25 sa'ad as Josep ana' Matias gway ana' Amos,
sa'ad as Amos ana' Nahum,
sa'ad as Nahum ana' Esli gway ana' Nagi,
26 sa'ad as Nagi ana' Maat gway ana' Matatias,
sa'ad as Matatias ana' Semei,
as Semei ana' Josep gway ana' Juda.
27 Sa'ad as Juda ana' Joanan,
sa'ad as Joanan ana' Resa gway ana' Zerubabel,
sa'ad as Zerubabel ana' Sealtiel,
sa'ad as Sealtiel ana' Neri.
28 Sa'ad as Neri ana' Melki,
sa'ad as Melki ana' Adi,
sa'ad as Adi ana' Cosam,
sa'ad as Cosam ana' Elmadam,
sa'ad as Elmadam ana' Er,
29 sa'ad as Er ana' Josue,
sa'ad as Josue ana' Eliezer,
sa'ad as Eliezer ana' Jorim,
sa'ad as Jorim ana' Matat,
sa'ad as Matat ana' Levi,
30 sa'ad as Levi ana' Simeon,
sa'ad as Simeon ana' Juda,
sa'ad as Juda ana' Josep,
sa'ad as Josep ana' Jonan,
sa'ad as Jonan ana' Eliakim,
31 sa'ad as Eliakim ana' Melea,
sa'ad as Melea ana' Mena,
sa'ad as Mena ana' Matata,
sa'ad as Matata ana' Natan,
sa'ad as Natan ana' Dabid,
32 sa'ad as Dabid ana' Jesse,
sa'ad as Jesse ana' Obed,
sa'ad as Obed ana' Boaz,
sa'ad as Boaz ana' Salmon,
sa'ad as Salmon ana' Naason,
33 sa'ad as Naason ana' Aminadab,
sa'ad as Aminadab ana' Arni,
sa'ad as Arni ana' Ami,
sa'ad as Ami ana' Esron,
sa'ad as Esron ana' Fares,
sa'ad as Fares ana' Juda,
34 sa'ad as Juda ana' Jacob,
sa'ad as Jacob ana' Isaac,
sa'ad as Isaac ana' Abraham,
sa'ad as Abraham ana' Tare,
sa'ad as Tare ana' Nacor,
35 sa'ad as Nacor ana' Serug,
sa'ad as Serug ana' Reu,
sa'ad as Reu ana' Peleg,
sa'ad as Peleg ana' Heber,
sa'ad as Heber ana' Selah,
36 sa'ad as Selah ana' Cainan,
sa'ad as Cainan ana' Arfaxad,
sa'ad as Arfaxad ana' Sem,
sa'ad as Sem ana' Noe,
sa'ad as Noe ana' Lamec,
37 sa'ad as Lamec ana' Metusela,
sa'ad as Metusela ana' Enoc,
sa'ad as Enoc ana' Jared,
sa'ad as Jared ana' Mahalaleel,
sa'ad as Mahalaleel ana' Cainan,
38 sa'ad as Cainan ana' Enos,
sa'ad as Enos ana' Set,
sa'ad as Set ana' Adam
sa'ad as Adam ana' Apudyus.