5
Waen daibina salena
1 ✡ Met 21:33; Mak 12:1Koi beyavaiya bi sale yà saleyena
ba valetigu egu nuwavaina lilina yà vai.
Ena waen daibina lilina yà saleye.
Valeti kauwigu ena waen daibina i voiye
oya modonemo doḡa visuvisunemo.
2 Tana ḡakima i kai kamakamaḡedi bi i laifuwa
kaka waen pesidi visuvisudi i wadidi.
Bi tana ani waikoyaḡa vadavadana dabi pounemo i ḡala,
bi kota waen votana guleipi ani vapisana domna i ḡala.
Bi i wailaba te maso waen votana guleipi visuvisudiḡa
bi geḡa te ailulu.
3 Niganana valetigu i giuna gado,
“Temi lava Yelusalemmo bi Diudamo miyemiyemi yai talayemi,
bai i gebogebo, tagu e ai kaukauwa ee waen daibina
4 Daibina e voiye kauwe te maso waen a vota kauwa
bi geḡa te mote a vota kauwa bi kota bai ḡesauna mote yà voiye?
Tagu e ḡoeḡoena maso guleipi visuvisudi bi bai aubaina te ailulu?
5 Niganana yà giuwemi te daibimo bai yà voiye,
waguluna yà oi kamakamaḡedi
bi daibi ganana yà dousuwasuwa,
bi yà kita kamaḡe te ḡamoḡamo suwana sa solasaḡa
te bai matabuna sa kani kovi bi sa ka gebogebo.
6 Yà kita kamaḡe te ya lakwau.
Bi waen mote yàma gula yawasi munaḡedi ee doḡa yàma suweti,
yà kita kamaḡe te gedala bi ḡawaḡawa sa duga yaḡosi.
Nabu mote yàmai anine te ima yovo bi imai utuvi.”
7 Islael lavedi ba Bada ḡaiḡailisi guletina ena waen daibina.
Bi Diuda lavedi mba maibena waen pesina laukaina,
i wadiwadidina ya wainuwavisuyedi.
I ḡoeḡoena maso lava didimanamo a laididimanidi,
bi geḡa te ai kapekipeki.
Kota i ḡoeḡoena maso lava edi yawasana a didimana,
bi geḡa te wainuwatoi ḡabana ya vaivaiye.