34
Laḡan ḡemota Deivida, Abimelek matanemo i kauwana maibena lava bu'ubu'uwina, taunana aubaina i giukamaḡe i nawa. Bi muliḡa Maimaituwa bainewa Deivida i saguna, taunana saledi i gilumi watedi ena pilipili laḡannemo.
1 Tagu laḡan matabuna Bada yà kasaḡesaḡe,
bi em kivivisuvisu yà giuwata nonoḡe.
2 Tagu Bada taunaḡa isana yà kailagelageti,
bi lava malumaluwabidi kalinagu sa vaiyena ba sai nuwavisu.
3 Tada Bada ta kasaḡesaḡe,
tada tai ḡemotida bi Bada isana ta lauduneye.
4 Tagu Bada lisinemo e laupali bi egu pali i waimune,
bi bai e nainailedina lisidimo i wai yawasanigu.
5 Tedi mabai a nuwavitaledi Bada lisinemo sagu aubaina,
ba sai nuwavisu gulata bi tana laḡan matabuna ya sagusagudi.
6 Tagu e wainuwatoitoi bi e laupali te Bada egu pali i vaiye,
bi kauwa gebogebodimo i waiyawasanigu.
7 Tedi mabai Bada sa vivivilena ba ena aneya,
sa kitakita galamedi bi sa labelabe kauwedi.
8 Taunana aubaina ko nuwavitala Bada lisinemo bi ena laukivivisuvisu ko banavi,
bamoda ko nawana lisinemo sagu aubaina ba koi nuwavisu gulata.
9 Temi lava waiwaisumeḡimi Bada ko vivile.
Bi lava mabai Bada sa vivivilena mote bai ḡesau sima maluwabiye.
10 Wali saugemo ba laiyon sa maluwabi bi kani sa peki,
bi geḡa te Bada tauwaisumaḡena tedi mote bai sima maluwabiye. 11 Egu lava ko nato bi egu gagali ko vaiye.
Yai lovelovemi te Bada ko vivile.
12 Bamoda aiyai miya wailofa kwa ḡoena,
ba yawasana visuvisuna kwa vai.
13 Bi lava mote kuma giu wai gebogebodi
bi mote kumai kaikaiyovu.
14 Gebogebo kauwedimo kwa nuwavitala,
bi visu kwa voiye, kwa ḡailisi te lava kwa sagudi bi nuwaubamo kwa miya.
15 Bada didimana lavedi ya kitekitedi,
laḡannemo tana lisinemo sa laupalina ba ya sagudi.
16 Lavedi gebogebo tauvoiyena ba Bada ya miyatautauliyedi,
bi a pekina ba mote aiyai ima noḡoti munaḡedi.
17 Laḡannemo Bada ena lava lisinemo sagu sai baḡaena ba ya vaiyedi,
bi edi pilipilimo ya kuvesidi.
18 Tana lava nuwa kulukuluvidi diyedimo,
bi edi sumaḡa yovoyovodi ba ya sagudi.
19 Lava didimanina pilipili wapewapedi ya banabanavidi,
bi geḡa te pilipilidi nopodimo Bada ya sagusagu.
20 Tana siliḡena matabudi ya labelabe kauwedi,
te mote sima doukoto.
21 Bi gebogebo lavedi ba edi gebogebo ya
vunu munaḡedi, tedi mabai lava didimanina sa dabodabokena ba kovoḡa sa vai.
22 Bada ena taupaula yai yawasanidi.
Lava mabai Bada lisinemo sagu sa waibaḡayena ba ya moito galamedi te mote kovoḡa sima vai.