1 Ḡome Islael lavedi matabudi ai nuwaboya bi a ḡaba malasako. 2 Bi tedi Mousis bi Elon a giuvitavitaledina gado, “I visu te maso Idipmo ke peki. 3 Bai aubaina Bada niga dobunemo i tavaitemai bi niganana ḡaviya sai pekimai bi mwanemwanemai bi natunatumai sa pani nawedi bi sai taupaula yababa aubaidi. I visu te ka munaḡa Idip.” 4 Ḡome edi lava vaitedi ai ogatala bi a giuna gado, “Tada taudaḡa eda taulauetadoli ta vine bi yai dolida te ta munaḡa Idipmo.”

5 Ḡome Islael lavedi matabudi matedimo Mousis bi Elon kaḡedi ai tupagwaliḡedi bi a laudulu doḡamo. 6 Bi Nan natuna Diyosuwa bi Defune Natuna Keleb labuidi nuwedi i gebo bi edi gala a lisidi. 7 Bi a giuna Islael lavedi matabudi lisidimo gado “Ei, tama doḡana matabuna ke vakita kovi, te doḡa visuvisu guletina. 8 Bamo te Bada lisidemo i wainuwavisuna ba ya naweda dobunemo bi doḡana ya viteda. Niga doḡana ba maumaulina bi ḡamoḡamo wapewapedi. 9  Bada lisinemo mote koma giuvitavitala bi mote koma naila. Tada ḡemoḡemotida mba dobuna lavedi ta lauyovoḡedi. Bada tada lisidemo ya miyamiya bi tedi ba yasidi geḡa.”

10 Ḡome lava matabudi a giu te Diyosuwa bi Keleb maso a lauḡakimidi. Bi geḡa te Bada namalina palai waiyawa mataetinemo i laumaḡata lava matabudi matedimo.

26 Kamaina bi Bada, Mousis bi Elon i giuwedina gado, 27 “Laḡan i alawapa niga lavedi lisigumo sa giugiuvitavitala. Tedi edi giuvitavitala kaikana e vaiye. 28 Tagu egu giu te niga lavedi kwa giuwedi: Tagu Bada e giu te temi giu kona vatodi bi e vaivaiyedina kota yà kulavitaledi te mainana lisimimo sa tubuḡa. 29 Temi taugiuvitavitala matabumi niga kalakalalelemo ko peki kovi. Temi mabai a iyevimi bi emi kwalabu 20 bi noke i saḡa i nawanawana ba niga ḡome ko peki kovi. 30 Tagu dobuna e giuwapa te maso e vitemina ba mote ḡome koma tava. Bi Nan natuna Diyosuwa bi Defune Natuna Keleb taudiḡa mba dobunemo sa sola saḡa.

31 “Temi kona giu te emi ḡaviya natunatumi sa pani nawedi. Bi geḡa te tagu mba dobunemo yà tavaitedi. Temi dobuna kona dabodabokena natunatumi sa miya. 32 Bi temi matabumi ba niga kalakalalelemo ko peki kovi. 33  ✡ Giu 7:36Temi tagu kona laukasaḡaiḡaiyegu aubaina kalakalalelemo natunatumi kaka sipu taulabedi sa tubuḡa kwalabu 40 nopodimo, eete matabumi ko peki kovi. 34 Temi laḡan 40 nopodimo dobu kona tigane, mainana kota kwalabu 40 nopodimo yà kovoḡimi. Kwalabu ḡemota ba laḡan ḡemota. Temi kona voiyegu te mai kemi ḡaviya, taunana aubaina yavi kaka mayana ko vai. 35 Tagu Bada giukauwemo yà giugiuwemi te niga kauwidi yà voiyedi. Lava laulaukasaḡaiḡaidi yà kovoḡidi te kalakalalelemo sa peki kovi.”