13
Keinan noponemo, Ablam bi ena lava palaiḡa a miyamiya nawa, malagai bi malagai. Mote vanuwa a ḡaledi bi palai a voiyedi te nopodimo a miyamiya. Bamo bi dobu ḡesaunemo nawa a ḡoena ba edi palai a nokudi bi kamelo dabedimo ai geludi bi kamelo a avaavala.
Tedi mote a bayabayau bi a wai ḡamoḡamo ota. Bi edi ḡamoḡamodi ḡesaudi a vunudi bi a kanikanidi bi ḡesaudi lava lisidimo kani a kunekunedi. Ablam bi ena lava witi lava ḡesaudi lisidimo a kunekunedi. Mba witidimo falawa a voiyedi bi buledi a gabugabudi.
Ablam Bi Loti a dailidi
5 Loti yaḡolo Ablam vaitena a nawanawa ḡemota, Ablam bi Loti edi ḡamoḡamo wapewapedi, sipu, bulumakau bi edi taubagibagi vaitedi ḡalavumo a miyamiya. 6 Gabu i ḡaubo bi ḡamoḡamo edi ani yaba mote ḡemoḡemotina te maso a miya ḡemota.
8 Kamaina bi Ablam Loti i giuwena gado, “Goma, tada ba lava ḡemota mote i visu te tada bi eda taubagibagi matabuda tai kagiu. 9 I visu te tai nawa tabutabu bi dobu kwa kita te em ḡowanemo kwa vai bamoda tam ḡeniyadaḡa kwa nawana ba tagu kataiyadaḡa yà nawa bi kota bamoda tam kataiyadaḡa kwa nawana ba tagu ḡeniyadaḡa yà nawa.”
10 Loti i wai kita nawa bi wapu visuvisuna i kita Diyoudan gaubina diyanemo bi matana i nawa te Diyowa malagaina palatina. Bi kota gauba wapewapedi i kitedi bi kota doḡa visuvisuna maibena Bada ena daibi Idenmo* Iden bayauna, Pakanemo 2:8 e maibena Idip doḡana Sodom diyanemo. Mba laḡannemo Bada yaḡolo mote malagai Sodom bi Gomola i kovoḡidi, muliḡa kaka i kovoḡidi. 11 Kamaina bi, Diyoudan wapuna tabutabuna i wailogo bi i lauḡonaḡona te suwala ani lovotava yawaninaḡa i nawa, niga mainana kauwinemo Ablam ma madiyana Loti ai yamonedi. 12 Ablam Keinan doḡanemo i miyatulu bi Loti tana Sodom malagaina diyanemo ena palai i sako saḡe bi i miyatulu, Diyoudan wapunemo. 13 Sodom oloolotodi edi kauwa a pilipili gulata bi kota kauwa gebogebodi a voivoiyedi Bada matanemo.
14 Loti i modina, mulinemo Bada Ablam i giuwena gado, “Kwa moito vitavitalem dobu kwa kita nawedi. 15 ✡ Giu 7:5Niga dobuna kwa kitakitana tam bi em tubulelesa yà vitemi, mba temi emiya ya kena nonoḡa. 16 Tagu em tubulelesa wapawapa yà vitem bi aiyai mote ḡemoḡemotina ima iyevidi. Mai bena gimoli mote aiyai ḡemoḡemotina te ima iyevi kovi. 17 Niganana kwa nawa bi doḡana kwa vakita nawe bi tagu matabuna yà vitem.”
18 Kamaina bi Ablam i nawa Ḡiblon malagainemo bi ḡome Mamle ena kaipolu dididiga, diyanemo i lauḡalavu bi ḡome olta i voiye Bada ani lauduneyena.