16  Bada lisigumo i gagali munaḡana gado, 17 “Lava ota, saginemo Islael edi dobu otinemo a miyamiya ba edi kauwa gebogebodimo dobu a ka milamila. Edi kauwidi gebogebodi e kitekitedina ba maibena waivini ena nawanawalai ya vai bi kwasina ya miyamiya kamakamaḡena. 18 Tedi koikoitau a lauduneyedi, lava a waipekidi bi edi dobu a kakamilamila, taunana aubaina egu medi kaka ya yovona dabedimo. 19 Tedi edi ai kaukauwemo aubaina, tagu ei dabalalidi te a nawa dobu ḡesaudiḡa bi lavedi vaitedi a miya. 20 Mba dobudi lavedi a giugiuna gado, ‘Niga ba Bada ena lava bi geḡa te ena dobu otina a gose.’ Mba giudimo ba isagu waiyawa a lauyovoḡe bi ai beyabeyakuluye. 21 Tagu egu ḡowana tabutabuna ba lava isagu waiyawa sa vivile. Bi geḡa te Islael lavedi, dobu ḡesaudiḡa a nawanawana ba isagu sa laulauyovoḡe.

22 “Tagu Bada wailewapanigu, kalinagu Islael lavedi kwa giuvitedi te sa sibe. Tagu kaka yà munaḡedi edi dobumo. Niga yà voiyena ba isagu vivilena aubaina. Banina noko dobu ḡesaudimo isagu waiyawa kona laulauyovoḡe. 23 Tagu Bada e giu te isagu waiyawa ḡaiḡailisina yà kamaḡati, Dobu matabumi mba isanana konai beyabeyakuluye. Islael temi dabemimo isagu yà kamaḡati te dobu ḡesaudi sa kita. Te tagu waiyawa bi laḡannemo yà voiyena kaka mba lavedi sa sibe te tagu Bada. 24 Dobu ḡemoḡemotaḡa nopodimo lava vaitedi ko miyamiyana kaka yà natomemi te emi dobumo yài ḡemotimi.

25 “Bi emi laudune kaikaiyovudi koikoitau lisidimo kona voivoiyedina, aubaina te gauba neganegana dabemimo yà lai silosilovudi te emi mila yà koḡa kamaḡe. 26 Tagu nuwapou valivaliuna bi Aluwa valivaliuna nuwapoumimo yà sivudi bi nuwapoumi ḡaiḡaidi maibena ḡakima yà kaikamaḡedi. Bi nuwapou vovoteyateyana yà vitemi. 27 Bi Aluwigu kaka yà vitemi te yà lauetadoliyemi te egu waiḡake ko viviledi bi egu wailovelove ko kaiwata kauwedi.”