1  Bada, Mousis i giuwena gado, “Tagu kovoḡa damodamona yà giukamaḡena ḡalibona bi Idip lisidimo. Mba taunana mulinemo ba ḡalibona ya laukaikamaḡe tautauyemi bi ya kwavimi te ko nawa. 2 Lava kwa giuwedi waiwaivini bi olooloto te Idip lavedi diyedimo a miyamiyana sai baḡedi te waisiya silva bi goldimo voivoiyedi sa vitedi.” 3  Bada mani Idip i voiyedi te Islael lavedi a vivile kauwedi. Bi ḡalibona ena waibabada bi lava matabudi Mousis a kita te tana lava dididiga bi a kasaḡesaḡe.

4 Kamaina bi Mousis ḡalibona i giuwena gado, “Bada niga mainana i giu, ‘Tagu mateya dudubala modonemo Idip dobuna yà nawa yaḡosi 5 bi libilibi oloolotodi tautautuwaḡa Idip noponemo yai pekidi. Noke ḡalibona natuna ena gabu tauvaina te nove ya yovo taupaula witi taututugudana natuna bi kota kau natunatudi geigei tubuḡidi lisidimo. 6 Bi Idip dobuna matabuna ḡaba kwatululu ya nawa yaḡosi. Niga ḡaba kwatululuna mote mai wala bamo i tubuḡa bi kota muliḡa mote mai ima tubuḡa. 7 Bi Islael lavedi mote bai gebogebona lisidimo ima tubuḡa, daḡasi mote kaka Islael lavedi bi edi ḡamoḡamo lisidimo ima gwau.’ Ḡome kaka ko sibe te Islael lavedi bi Idip lavedi Bada ya daidailidi. 8 Tam em waibabada matabudi sa nato kaḡe pakagumo, sa laudune bi sa giuna gado, ‘Aee, niganana kaka em lava vaitedi ko nawa makai.’ Niga taunana mulinemo kaka yà nawa.” Kamaina bi Mousis ma medimedina ḡalibona i gose kamaḡe.

9 Bi Bada, Mousis i giuwena gado, “Ḡalibona mote kalinam ima vaiye, mba mai kauwinemo kaka tagu mataila ḡesaudi yà voiyedi Idip lisidimo.” 10 Mousis bi Elon niga matailidi matabudi ḡalibona matanemo a voiyedi. Bi geḡa te Bada, ḡalibona nopona i voiye te i ḡaiḡai bi Islael lavedi mote i nuwakamaḡedi te ena dobu sa gose.