Tauwailovelove ena giu
Lainuwanega
Niga bukana tauwailovelove, mote ta sibe te aiyai i gilumi. Bi lava ḡesaudi sa giugiu te bena ḡalibona Solomon i gilumi. Bi taugilumina ba nuwauyauya lavana. Bi taunaḡa i waiisa munaḡe te tana tauwailovelove. Tauwailovelove mwali tabuotidi i giuwatedi, taunana aubaina lava wapewapedi Maimaituwa mote a sibe. Bi tedi a laulubu te mwali matabudi a tubutubuḡana banidi a tavuḡedi. Bi bamo mote banidi a banavidi. Tauwailovelove niga lavedi edi noḡota i giuwata. Wali saugemo lava sa kaukauwa yabayababa bi i giuweda te mba maibena lava mabai sa wailaulubu te yavala sa kamoti. Niga mainana giuna ba niga lavedi edi noḡota maibena bu'uwa, tedi yawasana niga dobunemo a banavi te banina geḡa.
1
Mwali matabudi waibanigeḡedi
1 Niga ba tauwailovelove Deivida natuna ena giu, Yelusalem lavedi edi ḡalibona.
2 Tauwailovelove i giuna gado,
“Mwali matabudi waibanigeḡedi,
giukauwa te banidi geḡa.
3 Lava niga dobunemo
sa noyanoya gulata.
Bi damodimo bai mwalina sa banavi?
4 Bi tubulelesa ya pekipeki
bi ya tubutubuḡa.
Bi niga dobuna mainana
kitana ya kenakena.
5 Suwala ya lovotava
bi ya nawa ya bulu,
bi ya nawa te gabunemo
ya tavatava munaḡa.
6 Yavala ya lausuve nawa oyaḡa
bi kota ya lausuve nawa nisaḡa,
ya wai kwaikwaivivila,
bi gabunemo ya tava bi ya wai tubu munaḡe.
7 Gauba matabudi,
sa yovo sa nawanawa nisamo.
Bi nisa mote bamo ima wanawanavu,
bi sa munaḡa gabudimo sa tava
te kota sawai tubu munaḡe.
8 Mwalidi matabudi ḡemotidi sa tubutubuḡa
te ta kitekitedi bi ta vaivaiyedi.
Te tunida ya daboka
bi giuwatedi mote tama ḡoeḡoe.
9 Bi mwali matabudi wala nove a tubutubuḡana
ba niganana kota sa tubutubuḡa munaḡa.
Bai a voivoiyedina ba kota ḡemotidi sa voivoiye munaḡedi.
Bi mote bamo bai ḡesau
valivaliuna niga dobunemo kuma kita.
10 Lava mote kaka ima giu gado,
‘Kwa kita niga mwali valivaliuna.’
Geḡa, mwali nove mai kenekenedi,
muliḡa kaka tada te tubuḡa.
11 Mwali bai wala nove a tubutubuḡana,
ee bai niganana ta voivoiyedina,
mote lava kaka muliḡa sima noḡotiwatedi.”
Nuwauyauya banina geḡa
12 Tagu tauwailovelove, Islael lavedi edi ḡalibona Yelusalem tauninemo. 13 Egu nuwauyauyamo e laulubu te mwali matabudi niga dobunemo maso e sibe kauwedi. Ei noḡotana gado, “Maimaituwa lava noya matabudi i vitedi bi sa noyanoyaedi bi geḡa te noyedimo tunidi sa kwapukwapudi.” 14 Lava niga dobunemo noya matabudi sa voivoiyedina e kita kovidi bi matabuna ba banina geḡa, mba maibena yavala sa kwavikwavi.
15 Lava mote ḡemoḡemotina te mwali bai i balabalana
mote kaka ima ka didimani.
Bi bai mwalina kwa malumaluwabiyena
mote kuma laupatupatuwe.
16 Tauguḡa ei nuwa noḡonoḡotana gado, “Ei, tagu e nuwauyauya kauwa kaka wala ḡaliḡalibona ḡesaudi Yelusalemmo a waibadaena. Tagu egu nuwauyauya bi egu anapu i tausaḡana kaka tedi. 17 Tagu e sibe kauwe te nuwauyauya, bu'uwa bi kauwa yabayababa sibedi ba maibena yavala kwavidi.
18 Bamoda e nuwauyauya gulatana
ba yai nuwaboya gulata.
Bi kota e anapu gulatana
ba kota egu nuwaboya ya didiga gulata.”