1  Bada Samuwel i giuwena gado, “Sol kwaala wainuwaboyae, tagu kaikana Islael edi ḡalibonana e kita kamaḡe. Samuwel olip masina kwagina kwa vai bi kwa nawa Betliḡemmo oloto isana Diyesi lisinemo. Tagu natunatunemo ḡalibona e vine te Sol epaiyanina.”

2 Samuwel i waitalana gado, “Bainewa yà nawa? Sol giugu ima vaiye bi imai pekigu?” Bada i giuwena gado, “Kau gubuna waivinina kwa vai bi kwa giuna gado, ‘E nato Bada lisinemo lausewasewa aubaina.”

3 Mba lausewasewanemo Diyesi kwa giuvai bi ya giuwem te bai kwa voiye. Laḡannemo natuna e vinevinena yai lovemna ba taunana dabanemo buyobuyo kwa ḡini te mataila, tagu egu vinevine.

4 Samuwel i nawa Betliḡemmo bi Bada i giugiuwena mainana i voiye. Ḡome malagai babadidi i banabanavidi ba a naila bi a giuwena gado, “Tam manuwaubam kuna tava, ee?”

5 Bi tana edi giu i waimunena gado, “Bena manuwaubagu e tava Bada lisinemo lausewasewa aubaina. Ko vononoḡa munaḡemi bi ko nato vaitegu ta lausewasewa.” Bi kota Diyesi ma natunatuna i giuwedi te a vononoḡedi kaka lausewasewa aubaina i giuvaidi.

6 Laḡannemo a tavatava ba Samuwel, Diyesi natuna tautuwaḡa Eliyab i kita bi i wainoḡotana gado, “Giukauwa te Bada matanemo, niga olotona ba ena ḡalibona vinevinena.”

7 Bi Bada Samuwel i giuwena gado, “Tagu mote tana ei anine, tubuḡina ena visu ee ena lofa kuma kitakita. Lava edi wai kitamo mote mai tagu yàma wai kita. Lava ba lava tubuḡina sa kitakita bi tagu ba lava nopona yà kitakita.”

10 Kamaina bi Diyesi natunatuna 7 i giuwedi a nawa Samuwel lisinemo. Bi Samuwel, Diyesi i giuwena gado, “Bada mote bamo niga ewaewalidi nopodimo ḡesauna i vine.” 11 Bi i waitalayena gado, “Niga natunatumdi kamaina?”

Bi Diyesi ena giu i waimunena gado, “Natugu damodamona ba sipu ya kitakita watedi.”

Bi Samuwel, Diyesi i giuwena gado, “Natum ḡesauna kwa giukamaḡe te yai doli natome, kaka ta miyatulu. Bi laḡannemo gomana i tavana, kaka ta miya bi ta kani.”

12 Kamaina bi Diyesi natunatuna ḡesaudi i giukamaḡedi te Deivida ai doli tavaite. Tana ewali kitana visuvisuna bi wai matakamokamotina.

Ḡome Bada, Samuwel i giuwena gado, “Ee, tana taunana, kwa nawa bi buyobuyo dabanemo kwa ḡini.”

13 Tana tuwatuwaḡana a kitakita bi Samuwel masi kwagina i vai bi Deivida dabanemo buyobuyo i ḡini. Mba sauginemo te noi i saḡa i nawana ba Maimaituwa Aluwina Deivida nopona i waiwanavu. Kamaina bi Samuwel i munaḡa ena malagai Lamamo.

14 Mba kauwina i tubutubuḡa ba Bada Aluwina Sol i potiyovo kamaḡe. Bi Bada aluwa gebogebona i wai anine te i sola saḡa gabu i vai bi i voiye te ena yawasana i lolalola.