1  ✡ Wai 17:17Ḡalibona Solomon, Idip ḡalibonana natuna i naḡi a miyamiya bi kota wali dobu waiwaivinidi i kita waiviniyedi bi i naḡidi. Bi waivinidi ba Mowab, Amon, Edom, Sidon bi Ḡiti dobudi waivinidi. 2  ✡ Wai 7:3,4Dolinemo Bada Islael lavedi i giu vavasaḡedina gado, “Temi mote niga dobudi lavedi komai naḡinaḡiyedi banina nuwemi sa liuwidi te edi maimaituwa ko lauduneyedi.” 3 Ḡalibona Solomon mwanemwanena 700 ḡalibona damdimo a tubutubuḡana bi waivini 300 ba enaya a paupaula te i naḡidi bi niga waiwaivinidi a voiye te Bada ena Maimaituwa i ḡose kamaḡe.

4 Bi ḡalibona Solomon ena waimagula sauginemo ba mwanemwanena nopona a vitale te edi maimaituwa i lauduneyedi. Bi tana mote i waisumaḡadidi, Bada ena Maimaituwa lisinemo maibena tamana Deivida i waisumaḡana. 5 Tana Sidon lavedi edi maimaituwa waivinina, Astolet bi Amon lavedi edi maimaituwa Molek gebogebo otina, taudidi i kaikaiwatedi.

7 Yelusalemmo beubeu yawannemo olip oyana dabanemo ḡalibona Solomon Mowab lavedi edi maimaituwa gebogebona isana Semos bi Amon lavedi edi maimaituwa gebogebona isana Molek, ani lauduneyedi gabudi i ḡaledi. 8 Bi mainana kota mwanemwanena wali dobu waivinidi edi ani laudune gabudi i ḡaledi te ḡome piupiu a gabugabudi bi a laulausewasewa edi maimaituwa lisidimo.

9-10 Dolinemo Maimaituwa malabu i laumaḡata ḡalibona Solomon lisinemo bi i giu vavasaḡena gado, mote maimaituwa ḡesaudi kuma lauduneyedi bi geḡa te Solomon Maimaituwa i laukasaḡaiḡaiye. Taunana aubaina Maimaituwa i medi gulata Solomon lisinemo. 11 Bi i giuwena gado, “Tam egu waianina bi egu waiḡake mote ku kaiwatedi taunana aubaina em waibada Islael lavedi lisidimo yà kaikamaḡe bi em tauwaibabada ḡemota yà vite. 12 Bi tamam Deivida kananawamo, aubaina niganana ma miyammo mote mainana yàma voiye bi mba waibadana ba natum lisinemo kaka yà kaikamaḡe. 13 Bi ena waibada mote matabuna yàma kaikamaḡe bi egu taupaula Deivida kananawamo aubaina natum tana dam ḡemota yai badaye banina Yelusalem ba e vine aubaigu.”

26 Ḡalibona Solomon ena taubagibagi edi bada ḡemota ba Yelobwam. Bi tamana ba Nabet bi edi taun ba Deleda, Ifleim dobuna noponemo bi tinana ba iwape bi isana ba Deluwa. Tana i miya moito te ena ḡalibona i waiḡaviye.

27 Niga taunana ḡalibona i waiḡaviyena titikunina: Solomon tamana Deivida ena taun ganakukuna pakana tikwali gwagwedi i ḡuluḡuluvidi bi gavogavodi i patipati gududi. 28 Sauginemo ḡalibona Solomon i kita te Yelobwam anaanapuna bi noyanoyana guletina ba i sako te Diyousep ena tubulelesa Ifleim bi Manasa damdi nopodimo taubagibagi taulabedi.

29 Laḡan ḡemota Yelobwam Yelusalem taunina i gose kamaḡe bi i nawanawa etamo te taugiuwatana Aḡida i banavi bi ena gala valivaliuna i kote bi ḡome ba tedi taudiḡa wapumo. Bi tana ba Silowa lavana. 30 Bi Aḡida ena gala valivaliuna i kotekotena i kaikamaḡe bi i lisilisi te wapedi 12 a tubuḡa. 31 Kamaina bi Yelobwam i giuwena gado, “Gala puselidi 10 kwa legaudi banina Bada Islael edi Maimaituwa niga mainana i giu, ‘Tagu ḡotona te Solomon lisinemo waibada ya kenakenana yà kaikamaḡe bi dam wapedi 10 yà vitem. 32-33 Bi egu taupaula Deivida kananawamo bi kota Islael damdi nopodimo tagu Yelusalem malagaina e vine, taunana aubaina Solomon dam ḡemota yai badaye. Bi niga kauwina yà voiyena banina Solomon i ḡose kamaḡegu bi maimaituwa ḡesaudi i lau lauduneyedi: Sidon edi maimaituwa waivinina isana Astolet, Mowab lavedi edi maimaituwa isana Semos bi Amon lavedi edi maimaituwa isana Molek. Bi kota i lau kasaḡaiḡaiyegu bi egu giuvavasaḡa bi egu waiḡake mote i kaiwatedi, niga kauwidi i voivoiyedina matagumo mote i visu. Mote mai tamana Deivida.

35 “ ‘Bi waibada Solomon natuna lisinemo ya kenakenana kaka yà kaikamaḡe te dam 10 yà vitem.’ ”

40 Kamaina bi ḡalibona Solomon i ḡoeḡoe te maso Yelobwam i waipeki bi geḡa te Yelobwam i naila i nawa ḡalibona Sisak lisinemo Idipmo. Bi ḡome i miyamiyana eete Solomon i peki. 42 Bi ḡalibona Solomon Yelusalemmo kwalabu 40 nopodimo Islael lavedi i waibadaedi. 43 Bi Solomon i peki bi tamana Deivida ena taunimo a dobo. Bi natuna Liyabwam ena gabu i vai.